ಇಷ್ಟಿದ್ದೂ ಆ ಅಜೆಂಡಾದಲ್ಲಿ ಇನ್ನೂ ನಿರೀಕ್ಷೆ ಇಟ್ಟುಕೊಂಡಿದ್ದೀರಲ್ಲ, ಏಕೆ?

   1985ರಲ್ಲಿ ರಾಮನಿಗಾಗಿ ಸಂತರು ದೇಶಾದ್ಯಂತ ನಡೆಸಿದ ಪಾದಯಾತ್ರೆ, 1989ರ ಇಟ್ಟಿಗೆ ಚಳವಳಿ, 1990ರ ರಾಮಜ್ಯೋತಿ ಯಾತ್ರೆ, 1992 ಅಕ್ಟೋಬರ್‍ನಲ್ಲಿ ನಡೆದ ರಾಮ ಪಾದುಕಾ ಯಾತ್ರೆ ಮತ್ತು 92 ಡಿಸೆಂಬರ್‍ನಲ್ಲಿ ನಡೆದ ಬಾಬರಿ ಮಸೀದಿಯ ಧ್ವಂಸ.. ಇವುಗಳು ಬಿಜೆಪಿಗೆ ರಾಜಕೀಯವಾಗಿ ಭಾರೀ ಲಾಭವನ್ನು ತಂದುಕೊಟ್ಟಿವೆ ಎಂದು ಅನೇಕ ಮಂದಿ ಬಲವಾಗಿ ನಂಬಿದ್ದಾರೆ. 1984ರಲ್ಲಿ 2 ಲೋಕಸಭಾ ಸೀಟುಗಳನ್ನಷ್ಟೇ (ಅಡ್ವಾಣಿ, ವಾಜಪೇಯಿ) ಹೊಂದಿದ್ದ ಬಿಜೆಪಿ, 96ರಲ್ಲಿ ಸರಕಾರ ರಚಿಸುವಷ್ಟು ಬೆಳೆದಿರುವುದಕ್ಕೆ ಈ ರಾಮ ಮಂದಿರ ಚಳವಳಿಯೇ ಕಾರಣ ಎಂದು ಬಿಜೆಪಿಯ ವಿರೋಧಿಗಳೂ ಅಂದು ಕೊಂಡಿದ್ದಾರೆ. ಆದರೆ ನಿಜಸ್ಥಿತಿ ಹಾಗಿದೆಯೇ? ರಾಮ ಜನ್ಮಭೂಮಿ ಚಳವಳಿ ಬಿಜೆಪಿಗೆ ಎಷ್ಟರ ಮಟ್ಟಿಗೆ ಲಾಭವನ್ನು ತಂದುಕೊಟ್ಟಿದೆ? 96ರಲ್ಲಿ ಸರಕಾರ ರಚಿಸುವಷ್ಟು ಅದು ಪ್ರಬಲ ಪಕ್ಷವಾಗಿ ಮೂಡಿ ಬಂದಿರುವುದಕ್ಕೆ ಕೇವಲ ಮಂದಿರ ಚಳವಳಿಯೊಂದೇ ಕಾರಣವೇ ಅಥವಾ ವಿ.ಪಿ. ಸಿಂಗ್‍ರ ಮಂಡಲ್ ಇಶ್ಯೂ, ಬೋಫೋರ್ಸ್ ಹಗರಣ ಸಹಿತ ಕಾಂಗ್ರೆಸ್ ಮತ್ತು ಇತರ ಪಕ್ಷಗಳು ಅದಾಗಲೇ ಸೃಷ್ಟಿ ಮಾಡಿದ್ದ ಸನ್ನಿವೇಶಗಳೇ? 80 ರ ದಶಕದಲ್ಲಿ ರಾಜೀವ್ ಗಾಂಧಿಯವರ ವಿರುದ್ಧ ಬಂಡೆದ್ದು ತೃತೀಯರಂಗ ಕಟ್ಟಿಕೊಂಡ ವಿ.ಪಿ. ಸಿಂಗ್‍ರ ಜೊತೆ ಬಿಜೆಪಿ ಕೈ ಜೋಡಿಸಿತು. ಸರಕಾರದಲ್ಲಿ ಭಾಗಿಯಾಯಿತು. ಹೀಗೆ ಅಪರಿಚಿತವಾಗಿದ್ದ ಬಿಜೆಪಿಯನ್ನು ಈ ದೇಶದ ಮಂದಿಗೆ ಪರಿಚಯಿಸಿಕೊಟ್ಟಿದ್ದೇ ವಿ.ಪಿ. ಸಿಂಗ್. (ಕರ್ನಾಟಕದಲ್ಲಿ ಯಡಿಯೂರಪ್ಪರನ್ನು ಸೇರಿಸಿ ಕುಮಾರಸ್ವಾಮಿ ಸರಕಾರ ರಚಿಸಿದಂತೆ) ಬಳಿಕ ಬಿಜೆಪಿಯ ಬೆಳವಣಿಗೆಯನ್ನು ತಡೆಯುವುದಕ್ಕಾಗಿ ವಿ.ಪಿ. ಸಿಂಗ್‍ರು ಮಂಡಲ್ ಇಶ್ಯೂವನ್ನು ಹೊರತಂದಾಗ, ಬಿಜೆಪಿ ಮಂದಿರವನ್ನು ಎತ್ತಿಕೊಂಡಿತು. ಬಿಜೆಪಿಯ ಬೆಳವಣಿಗೆಯ ಹಿಂದಿರುವ ಇವನ್ನೆಲ್ಲ ನಿರ್ಲಕ್ಷಿಸಿ ಬರೇ ಮಂದಿರವೊಂದಕ್ಕೇ ಸಂಪೂರ್ಣ ಕ್ರೆಡಿಟ್ ಕೊಡುವುದು ಸೂಕ್ತವೇ? ಹಾಗಿದ್ದರೆ ಕಳೆದು 10 ವರ್ಷಗಳಲ್ಲಿ ಬಿಜೆಪಿ ರಾಮನಿಗಾಗಿ ಒಂದೇ ಒಂದು ಚಳವಳಿ, ಪಾದಯಾತ್ರೆ, ರಥಯಾತ್ರೆಗಳನ್ನು ಕೈಗೊಂಡಿಲ್ಲವೇಕೆ? ಕನಿಷ್ಠ ಮಂದಿರದ ಬಗ್ಗೆ ಒಂದೇ ಒಂದು ಹೇಳಿಕೆ ಕೊಡುವುದಕ್ಕೂ ಅದು ಹಿಂಜರಿದಿರುವುದೇಕೆ, ಮರೆವೇ? ನಿರ್ಲಕ್ಷ್ಯವೇ?
   92ರಲ್ಲಿ ಬಾಬರಿ ಮಸೀದಿಯ ಧ್ವಂಸವಾಯಿತು. ಆ ವಾತಾವರಣ ಇನ್ನೂ ಹಸಿಯಾಗಿರುವಾಗಲೇ ಉತ್ತರ ಪ್ರದೇಶ ಮತ್ತು ಮಧ್ಯ ಪ್ರದೇಶಗಳ ವಿಧಾನಸಭೆಗೆ 93ರಲ್ಲಿ ಚುನಾವಣೆ ನಡೆಯಿತು. ಆದರೆ, ಬಾಬರೀ ಪತನದ ಸಂದರ್ಭದಲ್ಲಿ ಉ. ಪ್ರದೇಶದಲ್ಲಿ ಅಧಿಕಾರದಲ್ಲಿದ್ದ ಬಿಜೆಪಿ ತೀವ್ರ ಮುಖಭಂಗ ಅನುಭವಿಸಿತು. 425 ಸ್ಥಾನಗಳ ವಿಧಾನಸಭೆಯಲ್ಲಿ 221 ಶಾಸಕರನ್ನು ಹೊಂದಿದ್ದ ಅದು ಚುನಾವಣೆಯ ಬಳಿಕ 177ಕ್ಕೆ ಕುಸಿಯಿತು. ಮಧ್ಯ ಪ್ರದೇಶದ ವಿಧಾನಸಭೆಯಲ್ಲಿ 220ರಷ್ಟಿದ್ದ ಬಿಜೆಪಿಯ ಶಾಸಕರ ಸಂಖ್ಯೆ 117ಕ್ಕೆ ಇಳಿಯಿತು. ನಿಜವಾಗಿ, ಬಾಬರಿ ಮಸೀದಿಯ ಪತನದ ಬಳಿಕದಿಂದ ಈವರೆಗೆ ಬಿಜೆಪಿ ಉತ್ತರ ಪ್ರದೇಶದಲ್ಲಿ ಅಧಿಕಾರವನ್ನೇ ಪಡೆದಿಲ್ಲ. ರಾಮ ಜನ್ಮಭೂಮಿ ಚಳವಳಿಯ ಕೇಂದ್ರ ಸ್ಥಾನವಿರುವ, ನೂರಾರು ಸಾಧು-ಸಂತರು, ಇಟ್ಟಿಗೆಗಳು ಒಟ್ಟಾದ ರಾಜ್ಯವೊಂದರ ಮತದಾರರು ಬಿಜೆಪಿಯನ್ನು ಸಾರಾಸಗಟು ತಿರಸ್ಕರಿಸಿದ್ದೇಕೆ? ಬಿಎಸ್‍ಪಿಯಂಥ ತೀರಾ ಜೂನಿಯರ್ ಪಕ್ಷವೂ ಆ ಬಳಿಕ ಅಧಿಕಾರಕ್ಕೆ ಬಂದವಲ್ಲ, ಏನದರ ಗುಟ್ಟು? ಮಂದಿರ, ಮಸೀದಿ ಅಜೆಂಡಾವನ್ನು ತಮ್ಮ ಪ್ರಣಾಳಿಕೆಯಲ್ಲಿ ಬಿಡಿ, ಕನಿಷ್ಠ ತಮ್ಮ ಚುನಾವಣಾ ಪ್ರಚಾರ ಸಭೆಗಳಲ್ಲೂ ಉಲ್ಲೇಖಿಸದ ಮಾಯಾವತಿ, ಅಖಿಲೇಶ್ ಸಿಂಗ್ ಯಾದವ್‍ರು ಆ ಬಳಿಕ ಅಧಿಕಾರಕ್ಕೆ ಬಂದಿರುವುದು ಏನನ್ನು ಸೂಚಿಸುತ್ತದೆ? ಮಂದಿರವು ಇಶ್ಯೂ ಅಲ್ಲ ಎಂಬುದನ್ನೇ ಅಲ್ಲವೇ? ಉತ್ತರ ಪ್ರದೇಶದ ವಿಧಾನಸಭೆಗೆ 2012ರಲ್ಲಿ ನಡೆದ ಚುನಾವಣೆಯಲ್ಲಿ ಬಿಜೆಪಿಯ ನೇತೃತ್ವವನ್ನು ವಹಿಸಿಕೊಂಡದ್ದು ಉಮಾಭಾರತಿ. ಆಕೆ ಎಲ್ಲೆಲ್ಲಿ ಭಾಷಣಕ್ಕೆ ಹೋದರೋ ಅಲ್ಲೆಲ್ಲಾ ರಾಮ ಮಂದಿರವನ್ನು ಭಾಷಣದಲ್ಲಿ ಉಲ್ಲೇಖಿಸಿದ್ದರು. ಆದರೂ ಈ ವರೆಗಿನ ಅತಿ ಕಡಿಮೆ ಸ್ಥಾನಗಳನ್ನು ಪಡೆಯಲಷ್ಟೇ ಅದು ಶಕ್ತವಾಯಿತು. ಇವೆಲ್ಲ ಏನು? ಕೋಮು ಅಜೆಂಡಾಕ್ಕೆ, ವಿಭಜನಕಾರಿ ರಾಜಕೀಯ ಸಿದ್ಥಾಂತಕ್ಕೆ ಈ ದೇಶದ ಮಣ್ಣು ಒಗ್ಗುವುದಿಲ್ಲ ಎಂದಲ್ಲವೆ ಇದರರ್ಥ? ಹಾಗಿದ್ದೂ, ರಾಮ ಮಂದಿರದಿಂದ ಬಿಜೆಪಿಗೆ ಲಾಭವಾಗುತ್ತದೆ ಎಂಬ ಮಾತು ಈ ದೇಶದಲ್ಲಿ ಚಾಲ್ತಿಯಲ್ಲಿರುವುದು ಯಾಕೆ? ಬಿಜೆಪಿಯ ಅಧ್ಯಕ್ಷ ರಾಜನಾಥ್ ಸಿಂಗ್‍ರು ಮತ್ತೆ, ‘ಉಗ್ರ ನಾಯಕರನ್ನು’ ಮುಂಚೂಣಿಗೆ ತರುತ್ತಿದ್ದಾರಲ್ಲ, ಏನಿದರ ಮರ್ಮ? ಬಿಜೆಪಿಯ ಚುನಾವಣಾ ಸಮಿತಿಗೆ ಮೋದಿ, ಉಮಾಭಾರತಿ, ವರುಣ್ ಗಾಂಧಿ, ಅಮಿತ್ ಷಾರನ್ನು ಅವರು ಸೇರ್ಪಡೆಗೊಳಿಸಿರುವುದು ಯಾವ ಸಂದೇಶವನ್ನು ನೀಡುತ್ತದೆ? ಇಷ್ಟಿದ್ದೂ,
   ‘ಮುಸ್ಲಿಮ್ ಮತ್ತು ಹಿಂದೂಗಳ ಮಧ್ಯೆ ಬಿಜೆಪಿ ದ್ವೇಷವನ್ನು ಬಿತ್ತುತ್ತಿದೆ ಎಂದು ಅರೋಪಿಸುವುದಕ್ಕೆ ಕಾಂಗ್ರೆಸ್‍ಗೆ ಏನು ಅರ್ಹತೆಯಿದೆ? ಅದರ ಆಳ್ವಿಕೆಯಲ್ಲಿ ಕೋಮುಗಲಭೆ ನಡೆದಿಲ್ಲವೇ..’ ಎಂದು ಕಳೆದ ತಿಂಗಳು ರಾಜನಾಥ್ ಸಿಂಗ್ ಪ್ರಶ್ನಿಸಿದರಲ್ಲ, ಏನೆನ್ನಬೇಕು?
   ಅಂದಹಾಗೆ, 1961ರಲ್ಲಿ ಮಧ್ಯ ಪ್ರದೇಶದ ಜಬಲ್ಪುರದಲ್ಲಿ ನಡೆದ ಕೋಮುಗಲಭೆಯಿಂದ ಹಿಡಿದು 2012ರಲ್ಲಿ ರಾಜಸ್ಥಾನದ ಭರತ್ಪುರ್‍ನಲ್ಲಿ ನಡೆದ ಕೋಮುಗಲಭೆಯವರೆಗೆ, ಕಾಂಗ್ರೆಸ್ ಆಳ್ವಿಕೆಯಲ್ಲಿ ಸಾಕಷ್ಟು ಕೋಮುಗಲಭೆಗಳು ನಡೆದಿವೆ. ಆದರೆ, ಗಲಭೆಗೆ ಸಂಬಂಧಿಸಿದಂತೆ ಬಿಜೆಪಿ ಮತ್ತು ಕಾಂಗ್ರೆಸ್ ಮಧ್ಯೆ ದೊಡ್ಡದೊಂದು ವ್ಯತ್ಯಾಸ ಇದೆ. ಅದುವೇ ಐಡಿಯಾಲಜಿ. ಬಿಜೆಪಿ ಪ್ರಚೋದಿತ ಕೋಮುಗಲಭೆಗಳಿಗೆ ಸೈದ್ಧಾಂತಿಕ ಹಿನ್ನೆಲೆಯಿರುತ್ತದೆ. ಅದು ಓಟಿಗಾಗಿಯಷ್ಟೇ ಗಲಭೆ ಎಬ್ಬಿಸುವುದಲ್ಲ. ಅದರಾಚೆಗೆ ಕೆಲವು ನಿಗೂಢ ಅಜೆಂಡಾಗಳು ಅದರ ಬಳಿಯಿವೆ. ಕಾಲ ಕಾಲಕ್ಕೆ, ಸಂದರ್ಭಕ್ಕೆ ತಕ್ಕಂತೆ ಮುಸ್ಲಿಮರನ್ನು ದ್ವೇಷಿಸುವುದಕ್ಕೆ ಪೂರಕವಾಗುವ ಇಶ್ಯೂಗಳೊಂದಿಗೆ ಅದು ಗುರುತಿಸಿಕೊಳ್ಳುತ್ತದೆ. ಮಾತ್ರವಲ್ಲ, ಹತ್ತು ಹಲವು ಸತ್ಯಗಳನ್ನು ಮುಚ್ಚಿಡುವುದಕ್ಕೂ ಅದು ಪ್ರಯತ್ನಿಸುತ್ತದೆ. ಹೇಗೆಂದರೆ,
   ‘1949 ಡಿಸೆಂಬರ್ 22-23ರ ಮಧ್ಯರಾತ್ರಿ ಸುಮಾರು ಒಂದು ಗಂಟೆಗೆ ಬಾಬ ಅಭಿರಾಮ್ ದಾಸ್, ವೃಂದಾವನ್ ದಾಸ್ ಮತ್ತು ಇನ್ನೊಬ್ಬರು ಸೇರಿಕೊಂಡು ಬಾಬರಿ ಮಸೀದಿಯ ಮುಖ್ಯ ಗುಂಬಜದ ಕೆಳಗೆ ರಾಮ ವಿಗ್ರಹವನ್ನು ಸ್ಥಾಪಿಸುತ್ತಾರೆ. ಒಳಗೆ ಮಲಗಿಕೊಂಡಿದ್ದ ಮುಅದ್ದಿನ್ (ಬಾಂಗ್ ಕೊಡುವವ) ಮುಹಮ್ಮದ್ ಇಸ್ಮಾಈಲ್‍ರನ್ನು ತೀವ್ರವಾಗಿ ಥಳಿಸಿ ಹೊರ ಹಾಕುತ್ತಾರೆ. ಅಲ್ಲಿರುವ ಚಾಪೆ ಇನ್ನಿತರ ವಸ್ತುಗಳನ್ನು ಹೊರಕ್ಕೆಸೆಯುತ್ತಾರೆ. ಮಸೀದಿಯ ಗೋಡೆಗಳಲ್ಲಿ ಬರೆಯಲಾಗಿದ್ದ ಅರಬಿ ಅಕ್ಷರಗಳನ್ನು ಖುರ್ಪಿ ಎಂಬ ಆಯುಧದಿಂದ ಅಳಿಸಿ ಅವಸರವಸರವಾಗಿ ರಾಮ ಮತ್ತು ಸೀತೆಯನ್ನು ಕೆತ್ತುತ್ತಾರೆ. ಮರುದಿನ ಬೆಳಿಗ್ಗೆ ಸಾಕಷ್ಟು ಸಂಖ್ಯೆಯಲ್ಲಿ ಸಾಧುಗಳು ಬಾಬರಿ ಮಸೀದಿಗೆ ಬಂದು ಸೇರಿಕೊಳ್ಳುತ್ತಾರೆ. ಪ್ರಿಂಟಿಂಗ್ ಪ್ರೆಸ್ ಇಟ್ಟುಕೊಂಡಿದ್ದ ಹಿಂದೂ ಮಹಾಸಭಾದ ಫೈಝಾಬಾದ್ ವರ್ತುಲದ ಅಧ್ಯಕ್ಷ ಗೋಪಾಲ್ ಸಿಂಗ್ ವಿಶಾರದನು, ಮಸೀದಿಯೊಳಗೆ ‘ರಾಮ ವಿಗ್ರಹದ ಪವಾಡಸದೃಶ ಪ್ರತ್ಯಕ್ಷದ’ ಕತೆಯನ್ನು ವಿವರಿಸುವ ಪೋಸ್ಟರ್ ಮತ್ತು ನೋಟಿಸುಗಳನ್ನು ಹಂಚುತ್ತಾನೆ. ನಿಜವಾಗಿ ಮಸೀದಿಯ ಒಳಗೆ ರಾಮ ವಿಗ್ರಹವನ್ನು ಪ್ರತಿಷ್ಠಾಪಿಸುವ ಯೋಜನೆಗೆ ರೂಪುಕೊಟ್ಟಿದ್ದೇ ಫೈಝಾಬಾದ್‍ನ ಆಗಿನ ಜಿಲ್ಲಾ ಮ್ಯಾಜಿಸ್ಟ್ರೇಟರ್ ಕೆ.ಕೆ.ಕೆ. ನಾಯರ್. ವಿಗ್ರಹ ಪ್ರತಿಷ್ಠಾಪನೆಗಾಗಿ ಒಂದು ವಾರ ಮೊದಲೇ ಅಯೋಧ್ಯೆಯ ಒಂದು ದೇವಾಲಯದಲ್ಲಿ ಸಂತರನ್ನು ಭೇಟಿಯಾಗಿ ಅವರು ಯೋಜನೆಗೆ ಅಂತಿಮ ರೂಪ ಕೊಟ್ಟಿದ್ದರು. ಡಿಸೆಂಬರ್ 22ರ ಬೆಳಗಾತ 4 ಗಂಟೆಗೆ ಅವರು ಬಾಬರಿ ಮಸೀದಿಗೆ ತೆರಳಿ ವಿಗ್ರಹ ಪ್ರತಿಷ್ಠಾಪನೆಯನ್ನು ಕಂಡು ಅನಂದಿಸಿದ್ದರು. ಆದರೆ ಈ ಸುದ್ದಿಯನ್ನು ಲಕ್ನೋದ ತನ್ನ ಮೇಲಧಿಕಾರಿಗಳಿಗೆ ಬೆಳಗಿನ 9 ಗಂಟೆಯವರೆಗೂ ತಿಳಿಸಿಯೇ ಇರಲಿಲ್ಲ. ಸಾಧುಗಳು-ಸಾರ್ವಜನಿಕರು ಬಂದು ಇಡೀ ಮಸೀದಿಯನ್ನು ವಶಪಡಿಸಿಕೊಂಡ ಬಳಿಕವಷ್ಟೇ ಅವರು ಸುದ್ದಿಯನ್ನು ರವಾನಿಸಿದರು. ಮಹಾತ್ಮಾಗಾಂಧಿ ಹತ್ಯೆಯ ಆರೋಪದಲ್ಲಿ ಬಂಧನಕ್ಕೀಡಾಗಿ ಬಳಿಕ ಬಿಡುಗಡೆಗೊಂಡ ದಿಗ್ವಿಜಯ್ ನಾಥ್ ಈ ಇಡೀ ಷಢ್ಯಂತ್ರದ ಮಾಸ್ಟರ್ ಮೈಂಡ್ ಆಗಿದ್ದ..’
   ಕೃಷ್ಣ ಝಾ ಮತ್ತು ಧೀರೇಂದ್ರ ಝಾ ಅವರ, ‘ಅಯೋಧ್ಯಾ: ದಿ ಡಾರ್ಕ್ ನೈಟ್’  ಎಂಬ ಕೃತಿಯಲ್ಲಿರುವ ಈ ಸಂಗತಿಗಳನ್ನು ರಾಮ ಮಂದಿರ ಚಳವಳಿಯ ಸಂದರ್ಭದಲ್ಲಾಗಲಿ, ಆ ಬಳಿಕವಾಗಲಿ ಬಿಜೆಪಿ ಸಾರ್ವಜನಿಕರ ಮುಂದೆ ಬಹಿರಂಗಪಡಿಸಿದ್ದಿದೆಯೇ? ರಾಮ ವಿಗ್ರಹವು ಪವಾಡ ಸದೃಶವಾಗಿ ಬಾಬರಿ ಮಸೀದಿಯ ಒಳಗೆ ಪ್ರತ್ಯಕ್ಷವಾಗಿದೆ ಎಂಬ ಸುಳ್ಳನ್ನು ಹೇಳುತ್ತಾ, ಮುಸ್ಲಿಮರನ್ನು ಖಳರಂತೆ ಬಿಂಬಿಸುತ್ತಾ, ಗಲಭೆಗೆ ಪ್ರಚೋದಿಸಿದ್ದನ್ನು ಬಿಟ್ಟರೆ ಉಳಿದಂತೆ ಅದು ಯಾವ ನಿರ್ಮಾಣ ಕೆಲಸವನ್ನು ಮಾಡಿದೆ? ಬಾಂಗ್ಲಾ ನುಸುಳುಕೋರರು, ಮುಸ್ಲಿಮ್ ಭಯೋತ್ಪಾದನೆ, 371ನೇ ವಿಧಿ, ಲವ್ ಜಿಹಾದ್, ಪರ್ಸನಲ್ ಲಾ.. ಹೀಗೆ ಅದು ಎತ್ತುವ ಎಲ್ಲ ಸಂಗತಿಗಳೂ ಯಾಕೆ ಮುಸ್ಲಿಮರನ್ನೇ ಗುರಿಯಾಗಿಸಿಕೊಂಡಿರುತ್ತವೆ? ಕಾಂಗ್ರೆಸ್, ಕಮ್ಯೂನಿಸ್ಟ್, ತೃಣಮೂಲ, ಡಿ.ಎಂ.ಕೆ., ಜನತಾ ದಳಗಳಂಥ ಪಕ್ಷಗಳು ಮಾತಾಡುವ ಶೈಲಿ ಮತ್ತು ಬಿಜೆಪಿ ಮಾತಾಡುವ ಶೈಲಿಗಳನ್ನು ನೋಡಿ. ಕಾಂಗ್ರೆಸ್ ಆಳ್ವಿಕೆಯಲ್ಲಿ ಕೋಮುಗಲಭೆ ನಡೆದಿಲ್ಲವೇ ಎಂದು ಪ್ರಶ್ನಿಸುವ ರಾಜನಾಥ್ ಸಿಂಗ್‍ರೇ, ಈ ಶೈಲಿಗಳಲ್ಲಿರುವ ವ್ಯತ್ಯಾಸವನ್ನು ಗುರುತಿಸಿದ್ದೀರಾ? ಈಶ್ವರಪ್ಪ, ವರುಣ್ ಗಾಂಧಿ, ಉಮಾಭಾರತಿ.. ಮುಂತಾದ ಹತ್ತು-ಹಲವು ನಾಯಕರ ಭಾಷೆ, ವಿಷಯ, ಆವೇಶಗಳು ಹೇಗಿರುತ್ತವೆ? ಮುಸ್ಲಿಮರ ಕುರಿತಂತೆ ಬಳಸುವ ಅವೇ ಭಾಷೆಯನ್ನು, ಅವೇ ಶೈಲಿಯನ್ನು, ಅವೇ ಆವೇಶವನ್ನು ಇತರರಿಗೆ ನೀವೆಲ್ಲ ಉಪಯೋಗಿಸುತ್ತೀರಾ? ಕೋಮುಗಲಭೆಗಳನ್ನು ನಿಯಂತ್ರಿಸುವಲ್ಲಿ ಕಾಂಗ್ರೆಸ್ ವಿಫಲ ಆಗಿರಬಹುದು. 1984ರ ಸಿಖ್ ಹತ್ಯಾಕಾಂಡವನ್ನು ಕಾಂಗ್ರೆಸ್ಸಿನ ಪೂರ್ವಗ್ರಹಪೀಡಿತ ದುಷ್ಟ ಮನಸ್ಥಿತಿಗೆ ಪುರಾವೆಯಾಗಿ ತೋರಿಸಬಹುದು. ಆದರೆ, 2005 ಅಗಸ್ಟ್ 12ರಂದು ಪ್ರಧಾನಿ ಮನ್‍ಮೋಹನ್ ಸಿಂಗ್‍ರು ಸಿಖ್ ಸಮುದಾಯದಲ್ಲಷ್ಟೇ ಅಲ್ಲ, ಇಡೀ ದೇಶಕ್ಕೇ ಕೈ ಮುಗಿದು ಕ್ಷಮೆಯಾಚಿಸಿದರಲ್ಲ, ಮೋದಿಯಿಂದ ಅಂಥದ್ದೊಂದು ಕ್ಷಮೆಯಾಚನೆಯನ್ನು ಮಾಡಿಸಲು ನಿಮ್ಮಿಂದ ಸಾಧ್ಯವಾಗಿದೆಯೇ? ಸಿಖ್ ಹತ್ಯಾಕಾಂಡದ ಪಶ್ಚಾತ್ತಾಪವಾಗಿ ಓರ್ವ ಸಿಖ್ ವ್ಯಕ್ತಿಯನ್ನೇ ಪ್ರಧಾನ ಮಂತ್ರಿಯಾಗಿ ಕಾಂಗ್ರೆಸ್ ಆಯ್ಕೆ ಮಾಡಿತು. ನಿಮಗೆ ಹೀಗೆ ಸಮರ್ಥಿಸಿಕೊಳ್ಳುವುದಕ್ಕೆ ಏನಿದೆ ಹೇಳಿ? ಪ್ರಧಾನಿ ಬಿಡಿ, ವಿಧಾನ ಸಭೆಗೆ ಓರ್ವ ಮುಸ್ಲಿಮ್ ವ್ಯಕ್ತಿಯನ್ನು ಅಭ್ಯರ್ಥಿಯಾಗಿ ನಿಲ್ಲಿಸುವುದನ್ನು ನೋಡುವುದಕ್ಕೆ ನಾವು ಇನ್ನೆಷ್ಟು ವರ್ಷಗಳನ್ನು ಕಾಯಬೇಕು? ಇವೆಲ್ಲ ಏನನ್ನು ಸೂಚಿಸುತ್ತದೆ? ಮುಸ್ಲಿಮರಿಗೆ ಸಂಬಂಧಿಸಿ ಕಾಂಗ್ರೆಸ್‍ನ ಧೋರಣೆಗೂ ಬಿಜೆಪಿಯು ಧೋರಣೆಗೂ ನಡುವೆ ಇರುವ ಅಗಾಧ ಅಂತರವನ್ನೇ ಅಲ್ಲವೇ? ಹೀಗಿರುತ್ತಾ,
   ನೀವೇ ಇಷ್ಟು ಬಾಲಿಶವಾಗಿ ಪ್ರಶ್ನಿಸಿದರೆ ಹೇಗೆ ರಾಜನಾಥ್‍ರೇ..

ಜನಸಾಮಾನ್ಯರಿಗೆ ಏನುತ್ತರ ಕೊಡುತ್ತೀರಿ ಧರ್ಮಗುರುಗಳೇ?

   ರಣರಂಗ. ಸತ್ಯ ಮತ್ತು ಮಿಥ್ಯಗಳ ಮಧ್ಯೆ ತೀವ್ರ ಸಂಘರ್ಷ ನಡೆಯುತ್ತಿತ್ತು. ಓರ್ವ ಯುವಕ ಅತೀವ ಹುರುಪು, ಉತ್ಸಾಹದಿಂದ ಸತ್ಯದ ಮಾರ್ಗದಲ್ಲಿ ಹೋರಾಡುತ್ತಿದ್ದ. ಹೀಗಿರುತ್ತಾ, ಆತನ ದೇಹದ ಮೇಲೆ ಹಲವಾರು ಗಾಯಗಳಾದುವು. ಬಾಣದ ಗಾಯ ಮತ್ತು ತಲವಾರಿನ ಏಟುಗಳು ಆತನ ದೇಹವನ್ನು ಇಂಚಿಂಚಾಗಿ ಇರಿಯತೊಡಗಿದುವು. ಹಾಗಂತ, ಆತ ರಣರಂಗಕ್ಕೆ ಬರುವಾಗ ಇವುಗಳ ಬಗ್ಗೆ ತಿಳಿದಿರಲಿಲ್ಲ ಎಂದಲ್ಲ. ಯುದ್ಧ ಅಂದರೆ ಏನು, ಯಾವೆಲ್ಲ ಆಯುಧಗಳನ್ನು ಈ ಯುದ್ಧದಲ್ಲಿ ಬಳಸಲಾಗುತ್ತದೆ, ತಾನು ಯಾಕಾಗಿ, ಯಾರಿಗಾಗಿ ಮತ್ತು ಯಾವ ಉದ್ದೇಶದಿಂದ ಹೋರಾಡುತ್ತಿದ್ದೇನೆ, ಈ ಮುಖಾಮುಖಿಯಲ್ಲಿ ಯಾರು ಬಲಶಾಲಿ.. ಎಂಬುದೆಲ್ಲಾ ಆತನಿಗೆ ಚೆನ್ನಾಗಿಯೇ ಗೊತ್ತಿತ್ತು. ಮಾತ್ರವಲ್ಲ, ತಾನು ಸತ್ಯದ ಮಾರ್ಗದಲ್ಲಿ ಹೋರಾಡುತ್ತಿರುವುದರಿಂದ, ಒಂದು ವೇಳೆ ಸಾವು ಎದುರಾದರೂ ಅದು ಹುತಾತ್ಮತೆ ಅನ್ನಿಸಿಕೊಳ್ಳುತ್ತದೆ ಮತ್ತು ಸ್ವರ್ಗ ಸಿಗುತ್ತದೆ ಎಂಬುದೂ ತಿಳಿದಿತ್ತು. ಆದರೂ ದೇಹದ ಮೇಲಾದ ಗಾಯ ಆತನನ್ನು ಅಸಾಧ್ಯ ಸಂಕಟಕ್ಕೆ ದೂಡಿತು. ಸಹಿಸಲು ಸಾಧ್ಯವೇ ಇಲ್ಲ ಅನ್ನುವಷ್ಟರ ಮಟ್ಟಿಗೆ ಆ ಗಾಯಗಳು ಆತನನ್ನು ಚುಚ್ಚತೊಡಗಿದುವು. ಕೊನೆಗೆ ಆತ ತಲವಾರಿನಿಂದ ತನ್ನ ಕೈಯನ್ನು ಸ್ವಯಂ ಕಡಿದುಕೊಂಡ. ರಕ್ತ ಹರಿಯತೊಡಗಿತು. ಆತನ ಉದ್ದೇಶ ಕೂಡ, ರಕ್ತ ಹರಿದು ಶೀಘ್ರ ಸಾವು ಬರಲಿ ಎಂದೇ ಆಗಿತ್ತು. ಕೊನೆಗೆ ಆತ ಸಾವಿಗೀಡಾದ..’ ಈ ಘಟನೆಯನ್ನು ತನ್ನ ಅನುಯಾಯಿಗಳ ಜೊತೆ ಹಂಚಿಕೊಳ್ಳುತ್ತಾ ಪ್ರವಾದಿ ಮುಹಮ್ಮದರು(ಸ) ಹೇಳಿದರು,
   ಅದು ಹುತಾತ್ಮತೆಯಲ್ಲ, ಆತ್ಮಹತ್ಯೆ. ಆತ್ಮಹತ್ಯೆಯನ್ನು ಅಲ್ಲಾಹನು ನಿಷಿದ್ಧಗೊಳಿಸಿದ್ದಾನೆ. (ಪವಿತ್ರ ಕುರ್‍ಆನ್: 4: 29)
   ಓರ್ವನು ಜಿಹಾದ್‍ನಲ್ಲಿ ಭಾಗಿಯಾಗಿದ್ದೂ ಆತ್ಮಹತ್ಯೆ ಮಾಡಿಕೊಂಡರೆ ಅದು ಜಿಹಾದೂ ಅಲ್ಲ, ಆತನಿಗೆ ಸ್ವರ್ಗವೂ ಇಲ್ಲ ಎಂಬ ಪ್ರವಾದಿ(ಸ) ವಚನವನ್ನು ಇಲ್ಲಿ ನೆನಪಿಸಿಕೊಳ್ಳುವುದಕ್ಕೆ ಕಾರಣ ಇದೆ.
   ಬೀದರ್ ಜಿಲ್ಲೆಯ ಚೌಳಿ ಮಠದ ಮೂವರು ಸ್ವಾಮೀಜಿಗಳು ಎಪ್ರಿಲ್ 8ರಂದು ಆತ್ಮಹತ್ಯೆ ಮಾಡಿಕೊಂಡರು. ಮಾತ್ರವಲ್ಲ, ಆತ್ಮ ಹತ್ಯೆಗಿಂತ ಮೊದಲು ತಮ್ಮ ಹೇಳಿಕೆಗಳನ್ನು ಚಿತ್ರೀಕರಿಸುವ ವ್ಯವಸ್ಥೆಯನ್ನೂ ಮಾಡಿದರು. ‘ಫೆಬ್ರವರಿ 28ರಂದು ಹಿರಿಯ ಸ್ವಾಮೀಜಿ ಶ್ರೀ ಗಣೇಶ್ ಅವಧೂತರು ಸಾವಿಗೀಡಾಗಿ ಕೈಲಾಸ ಸೇರಿಕೊಂಡಿದ್ದು, ಇದೀಗ ನಾವು ಅವರ ಜೊತೆ ಸೇರ ಬಯಸಿದ್ದೇವೆ. ಇನ್ನು ಇಲ್ಲಿ ನಮಗೆ ಮಾಡುವುದಕ್ಕೇನೂ ಉಳಿದಿಲ್ಲ..' ಎಂಬ ಮೃತ್ಯು ಪತ್ರವನ್ನೂ ಬರೆದಿದ್ದರು. ಮಾಧ್ಯಮಗಳು ಈ ಕುರಿತಂತೆ ಸಾಕಷ್ಟು ಚರ್ಚಿಸಿದುವು. ಆ ಆತ್ಮಹತ್ಯೆಗೆ ಅವು; ಅಗ್ನಿ ಪ್ರವೇಶ, ಆತ್ಮಾಹುತಿ, ಜೀವಂತ ದಹನ, ದೇಹತ್ಯಾಗ, ಅಗ್ನಿ ಸಮಾಧಿ.. ಮುಂತಾದ ಹೆಸರುಗಳನ್ನೂ ಕೊಟ್ಟುವು. ಆದರೆ ಯಾವ ಹೆಸರುಗಳನ್ನು ಕೊಟ್ಟರೂ ಅವುಗಳ ಒಟ್ಟು ಅರ್ಥ ‘ಆತ್ಮಹತ್ಯೆ' ಎಂದೇ ಆಗಿರುತ್ತದೆ ಎಂಬುದು ಎಲ್ಲರಿಗೂ ಗೊತ್ತು. ಇಷ್ಟಕ್ಕೂ, ಗುರುಗಳು ಸಾವಿಗೀಡಾದರೆಂದು ಶಿಷ್ಯರು ಆತ್ಮಹತ್ಯೆ ಮಾಡಿಕೊಳ್ಳುವುದನ್ನು ಪದಗುಚ್ಛಗಳ ಮೂಲಕವೋ ಸಿದ್ಧಿಯ (ಪವಾಡ ಪ್ರಾಪ್ತಿ) ನೆಪದಲ್ಲೋ ಸಮರ್ಥಿಸಿಕೊಳ್ಳಬಹುದೇ? ಒಂದು ಮಠಕ್ಕೆ, ಅದನ್ನು ನೋಡಿಕೊಳ್ಳುವ ಗುರುಗಳಿಗೆ, ಶಿಷ್ಯ ವೃಂದ ಮತ್ತು ಭಕ್ತಾದಿಗಳಿಗೆ ಅವರವರದ್ದೇ ಆದ ಉದ್ದೇಶ, ಗುರಿಗಳಿರುತ್ತದಲ್ಲವೇ? ಸಮಾಜಕ್ಕೆ ಮಾರ್ಗದರ್ಶನ ಮಾಡುವ, ಮೌಲ್ಯಗಳನ್ನು ಹೇಳಿಕೊಡುವ, ತಿದ್ದುವ ಕೆಲಸಗಳನ್ನು ಮಠಗಳು ಮಾಡುತ್ತವೆ ಎಂಬ ನಂಬಿಕೆಯಿಂದಲೇ ಅಲ್ಲವೇ ಜನರು ಮಠ ಗಳತ್ತ ನೋಡುವುದು, ಗುರುಗಳತ್ತ ಧಾವಿಸುವುದು? ಆದರೆ ಮಾರ್ಗದರ್ಶನ ಮಾಡಬೇಕಾದವರೇ ಆತ್ಮಹತ್ಯೆಯ ದಾರಿ ಹಿಡಿದರೆ ಅದು ಭಕ್ತಾದಿಗಳಿಗೆ ಕೊಡುವ ಸಂದೇಶವೇನು? ಸುಖ-ದುಃಖ, ನೋವು-ನಲಿವು, ಸಿಟ್ಟು-ವೈರಾಗ್ಯ.. ಎಲ್ಲವನ್ನೂ ಸಮಚಿತ್ತದಿಂದಲೇ ನಿಭಾಯಿಸುವ ಕಲೆಯನ್ನು ಸಮಾಜಕ್ಕೆ ಕಲಿಸ ಬೇಕಾದವರೇ ‘ಸಮಚಿತ್ತ' ಕಳಕೊಂಡರೆ ಅನುಯಾಯಿಗಳು ಏನಾದಾರು? ಸಾವು ಪ್ರತಿಯೊಂದು ಜೀವಿಗೂ ಶತಃಸಿದ್ಧ. ಗುರುಗಳೂ ಅದರಿಂದ ಹೊರತಲ್ಲ. ಇದನ್ನು ಅತ್ಯಂತ ಚೆನ್ನಾಗಿ ತಿಳಿದು ಕೊಂಡಿರಬೇಕಾದವರು ಅವರ ಆಪ್ತ ಶಿಷ್ಯರೇ. ಸಾವಿನ ಮರ್ಮವನ್ನು ಸಮಾಜಕ್ಕೆ ಹೇಳಿಕೊಡುವುದಕ್ಕೆ, ಗುರುಗಳು ಬೋಧಿಸಿದ ಮೌಲ್ಯಗಳನ್ನು ಪ್ರಚಾರ ಮಾಡುವುದಕ್ಕೆ ಆ ಸಾವು ಒಂದು ಉತ್ತಮ ಅವಕಾಶ. ಆದರೆ, ಶಿಷ್ಯರೇ ಅದಕ್ಕೆ ಬೆನ್ನು ತಿರುಗಿಸಿದರೆ? ಅಗಲಿಕೆಯ ಭಾರದಿಂದ ಕುಸಿದು ಕೂತರೆ?
   ಪ್ರವಾದಿ ಮುಹಮ್ಮದರು(ಸ) ಸಾವಿಗೀಡಾದ ಸುದ್ದಿ ಎಲ್ಲೆಡೆ ಹರಡತೊಡಗಿತು. ಅವರ ಅನುಯಾಯಿಗಳು ಸುದ್ದಿಯನ್ನು ಖಚಿತಪಡಿಸುತ್ತಾ, ಅವರ ಮನೆಯತ್ತ ಧಾವಿಸತೊಡಗಿದರು. ಈ ಸುದ್ದಿ ಅವರ ಆಪ್ತಶಿಷ್ಯ ಉಮರ್(ರ)ರಿಗೂ ತಲುಪಿತು. ಸಾವು ಎಲ್ಲರಿಗೂ ಶತಸಿದ್ಧ ಎಂಬುದನ್ನು ಅವರು ತಿಳಿದಿದ್ದರೂ ಆ ಕ್ಷಣದಲ್ಲಿ ಅವರು ಉದ್ವೇಗಕ್ಕೆ ಒಳಗಾದರು. ವಿಚಲಿತರಾಗಿ ಮನೆಯಿಂದ ಹೊರಟರು. ಯಾರಾದರೂ ತನ್ನ ನಾಯಕನ ಸಾವಿನ ಬಗ್ಗೆ ಮಾತಾಡಿದರೆ ಅವರನ್ನು ಕೊಂದೇ ಬಿಡಬೇಕು ಅನ್ನುವ ಆವೇಶ ಅವರಲ್ಲಿತ್ತು. ದಾರಿಯಲ್ಲಿ ಪ್ರವಾದಿಯವರ(ಸ) ಇನ್ನೋರ್ವ ಶಿಷ್ಯ ಅಬೂಬಕರ್(ರ) ಎದುರಾದರು. ತಮ್ಮ ನಾಯಕನ ಸಾವನ್ನು ಖಚಿತಪಡಿಸಿದರು. ಉಮರ್ ಒಪ್ಪಲಿಲ್ಲ, ವಾದಕ್ಕಿಳಿದರು. ಆಗ ಅಬೂಬಕರ್ ಹೇಳಿದರು, ಯಾರಾದರೂ ಪ್ರವಾದಿ ಮುಹಮ್ಮದರನ್ನು(ಸ) ಆರಾಧಿಸುತ್ತಾರೆಂದಾದರೆ, ಆ ಮುಹಮ್ಮದ್(ಸ) ಸಾವಿಗೀಡಾಗಿದ್ದಾರೆ. ಇನ್ನು, ಸೃಷ್ಟಿಕರ್ತನನ್ನು (ಅಲ್ಲಾಹ್) ಆರಾಧಿಸುವುದಾದರೆ, ಆತ ಸಾವಿಗೀಡಾಗಿಲ್ಲ, ಆಗುವುದೂ ಇಲ್ಲ..' ಉಮರ್‍ರಿಗೆ ತಪ್ಪಿನ ಅರಿವಾಯಿತು. ನನ್ನ ಆರಾಧ್ಯ ಮುಹಮ್ಮದ್(ಸ) ಅಲ್ಲ, ಸೃಷ್ಟಿಕರ್ತ ಅಲ್ಲಾಹ್ ಎಂಬುದಾಗಿ ಸ್ವಯಂ ಸ್ಪಷ್ಟಪಡಿಸಿಕೊಂಡರು.
   ಅಂದಹಾಗೆ, ಪೀಪಲ್ಸ್ ಟೆಂಪಲ್, ದಿ ಆರ್ಡರ್ ಆಫ್ ದಿ ಸೋಲಾರ್ ಟೆಂಪಲ್ಸ್, ಹೆವೆನ್ಸ್ ಗೇಟ್.. ಮುಂತಾದ ಪಂಥಗಳ ಆತ್ಮಹತ್ಯಾ ಇತಿಹಾಸವನ್ನು ಬಲ್ಲವರಿಗೆ ‘ಚೌಳಿ ಮಠ' ಘಟನೆ ಆಘಾತವನ್ನೇನೂ ನೀಡದು.
   1997 ಮಾರ್ಚ್ 26ರಂದು ಅಮೇರಿಕದ ಕ್ಯಾಲಿಫೋರ್ನಿಯಾದಲ್ಲಿ 39 ಮಂದಿ ಸಾಮೂಹಿಕವಾಗಿ ಆತ್ಮಹತ್ಯೆ ಮಾಡಿಕೊಳ್ಳುತ್ತಾರೆ. ಇದಾಗಿ 4 ದಿನಗಳ ಬಳಿಕ ಮಾರ್ಚ್ 30ರಂದು ಅಮೇರಿಕದ ಖ್ಯಾತ ನಟಿ ನಿಚೆಲ್ ನಿಕೋಲಸ್‍ಳ ತಮ್ಮ ಥಾಮಸ್ ನಿಕೋಲಸ್ ಎಂಬವ ಆತ್ಮಹತ್ಯೆಗೆ ಶರಣಾಗುತ್ತಾನೆ. ‘ನನಗಿಂತ ಮೊದಲೇ ತೆರಳಿ ಆಕಾಶದಲ್ಲಿ ತೇಲಾಡುತ್ತಾ ಇರುವವರ ಜೊತೆ ಸೇರಲು ಹೋಗುತ್ತಿದ್ದೇನೆ..' ಅಂತ ಡೆತ್‍ನೋಟ್ ಬರೆದಿಡುತ್ತಾನೆ. ಇದು ಅಮೇರಿಕನ್ ಮಾಧ್ಯಮಗಳಲ್ಲಿ ಬಿಸಿಬಿಸಿ ಚರ್ಚೆಗೆ ಕಾರಣವಾಗುತ್ತದೆ. ಸಾರ್ವಜನಿಕರಲ್ಲಿ ಒಂದು ಬಗೆಯ ಗೊಂದಲ, ತಳಮಳಗಳು ಕಾಣಿಸಿಕೊಳ್ಳುತ್ತವೆ. ಬೋನಿ ನಿಟ್ಟೆಲ್ ಮತ್ತು ಮಾರ್ಶಲ್ ಎಂಬಿಬ್ಬರು 1970ರಲ್ಲಿ ಸ್ಥಾಪಿಸಿದ ಹೆವೆನ್ಸ್ ಗೇಟ್ ಎಂಬ ಧಾರ್ಮಿಕ ಪಂಥದ ಬಗ್ಗೆ, ಅದರ ಆಚಾರ-ವಿಚಾರ, ಆಧ್ಯಾತ್ಮಿಕ ನಿಲುವುಗಳ ಬಗ್ಗೆ ಚರ್ಚೆಗಳಾಗುತ್ತವೆ. ನಿಜವಾಗಿ, 1970ರಲ್ಲಿ ಮಾರ್ಶಲ್‍ಗೆ ಹೃದಯಾಘಾತವಾಗಿತ್ತು. ಬಳಿಕ ಚೇತರಿಸಿಕೊಂಡ ಆತ, ತನಗೆ ಸಾವಿನ ಅನುಭವವಾಗಿದೆ ಎಂದು ಹೇಳಿಕೊಂಡ. ಬೈಬಲ್‍ನಲ್ಲಿ ಉಲ್ಲೇಖಿತವಾಗಿರುವ 11:3 ವಚನಗಳ ಕುರಿತಂತೆ ತನಗೆ ಕ್ರಾಂತಿಕಾರಿ ಬೋಧನೆಗಳು ದೊರಕಿವೆ ಎಂದು ಪ್ರತಿಪಾದಿಸಿದ. ತನಗೆ ಯೇಸುವಿನೊಂದಿಗೆ ನೇರವಾದ ಸಂಬಂಧ ಇದ್ದು, ತಾನು ಮಾನವನ ಮಟ್ಟ ಕ್ಕಿಂತ ಮೇಲ್ತರದ ಸಾಮ್ರಾಜ್ಯದಲ್ಲಿದ್ದೇನೆ ಎಂದು ಹೇಳಿದನಲ್ಲದೇ, ತನ್ನನ್ನು ಆಸ್ಪತ್ರೆಯಲ್ಲಿ ಉಪಚರಿಸಿದ ನರ್ಸ್ ಬೋನಿ ನಿಟ್ಟೆಲ್‍ಳ ಜೊತೆ ಸೇರಿ ಹೆವೆನ್ಸ್ ಗೇಟ್‍ಗೆ ಅಡಿಪಾಯ ಹಾಕಿದ. ಈ ಜಗತ್ತು ನಾಶವಾಗುವ ಬಗ್ಗೆ, ಮೋಕ್ಷ, ಸಾಕ್ಷಾತ್ಕಾರದ ಬಗ್ಗೆ ವಿಚಿತ್ರ ಆಲೋಚನೆಗಳನ್ನು ಸಮಾಜದ ಮುಂದಿಟ್ಟ. ಈ ಭೂಮಿ ಶೀಘ್ರವೇ ಸರ್ವನಾಶವಾಗಲಿದ್ದು, ಈ ಗೋಲದಲ್ಲಿ ಬದುಕುವ ಮಂದಿ ಆದಷ್ಟು ಬೇಗ ಭೂಮಿಯಿಂದ ಹೊರಟು ಬಿಡುವುದು ಇದಕ್ಕಿರುವ ಪರಿಹಾರ ಎಂದು ಕರೆಕೊಟ್ಟ. ಈ ದೇಹವು ಒಂದು ವಾಹನವಾಗಿದೆ, ಜನರ ಸಂಚಾರಕ್ಕೆ ಈ ವಾಹನ ಒಂದು ನಿಮಿತ್ತ ಮಾತ್ರ. ಆತ್ಮವು ಈ ವಾಹನವನ್ನು ಬಿಟ್ಟು ಹೋಗುವುದರ ಅರ್ಥವೇ ಸಾವು.. ಎಂದೆಲ್ಲಾ ಹೇಳಿದ. 1997 ಮಾರ್ಚ್ 26ರ ಸಾಮೂಹಿಕ ಆತ್ಮಹತ್ಯೆಯ ದಿನಗಳ ಮೊದಲು ಆತ ತನ್ನ ಹೇಳಿಕೆಯನ್ನು ಚಿತ್ರೀಕರಿಸಿಕೊಂಡನಲ್ಲದೇ, ಅದರಲ್ಲಿ ಭೂಮಿಯೊಂದಿಗಿನ ಸಂಬಂಧ ಬಿಟ್ಟುಬಿಡಿ. ಕೌಟುಂಬಿಕ ಸಂಬಂಧ, ಪತಿ-ಪತ್ನಿ, ಮಕ್ಕಳು, ಉದ್ಯೋಗ, ದುಡ್ಡು.. ಹೀಗೆ ಎಲ್ಲ ಸಂಬಂಧಗಳನ್ನು ಕಡಿದುಕೊಳ್ಳಿ. ಬದುಕಿನ ಮುಂದಿನ ಹಂತಕ್ಕೆ ಏರಲು ಸಿದ್ಧವಾಗಿ. ಭೂಮಿ ನಾಶವಾಗಲಿದೆ.. ಎಂದೆಲ್ಲಾ ತನ್ನ ಸದಸ್ಯರಿಗೆ ಬೋಧಿಸಿದ.
   ಅಷ್ಟಕ್ಕೂ, ಗುರು ಮತ್ತು ಅನುಯಾಯಿಗಳು ಜೊತೆಯಾಗಿ ಆತ್ಮ ಹತ್ಯೆ ಮಾಡಿಕೊಂಡ ಘಟನೆ ಇದೊಂದೇ ಎಂದು ಭಾವಿಸಬೇಡಿ.
   1978 ನವೆಂಬರ್ 18ರಂದು ಅಮೇರಿಕದಲ್ಲಿ 918 ಮಂದಿ ಸಾಮೂಹಿಕವಾಗಿ ಆತ್ಮಹತ್ಯೆ ಮಾಡಿಕೊಂಡರು. 9/11 ಘಟನೆಯನ್ನು ಬಿಟ್ಟರೆ ಉಳಿದಂತೆ ಅಮೇರಿಕದಲ್ಲಿ ಒಂದೇ ದಿನ ಇಷ್ಟೊಂದು ದೊಡ್ಡ ಸಂಖ್ಯೆಯಲ್ಲಿ ಸಾವಿಗೀಡಾದದ್ದು ಇದೊಂದೇ. ಇಡೀ ಅಮೇರಿಕಕ್ಕೆ ಅಮೇರಿಕವೇ ಪೀಪಲ್ಸ್ ಟೆಂಪಲ್ ಪಂಥದ ಕುರಿತು, ಅದರ ಸ್ಥಾಪಕ ಜಿಮ್ ಜೋನ್ಸ್‍ನ ಬಗ್ಗೆ, ಆತನ ಸೈದ್ಧಾಂತಿಕ ನೆಲೆಗಟ್ಟು, ಹಿನ್ನೆಲೆಯ ಕುರಿತಂತೆ ಗಂಭೀರವಾಗಿ ಚರ್ಚಿಸಿತು. ಇವಾಂಜಲಿಕಲ್ ಪ್ರವಚಕನಾಗಿ ಗುರುತಿಸಿಕೊಂಡಿದ್ದ ಜೋನ್ಸ್, ಕ್ರೈಸ್ತ ಧರ್ಮದಲ್ಲಿ ಕ್ರಾಂತಿಕಾರಿ ನಿಲುವುಗಳನ್ನು ಪ್ರತಿಪಾದಿಸಿದ. ಆತನ ಹೊಸ ಪಂಥದ ಡಜನ್‍ಗಟ್ಟಲೆ ಕಚೇರಿಗಳು ಕ್ಯಾಲಿಫೋರ್ನಿಯಾದಲ್ಲಿ ತೆರೆದವು.  ಆಳದಲ್ಲಿ ಆತ ಕಮ್ಯುನಿಸ್ಟ್ ನಾಸ್ತಿಕನಾಗಿದ್ದರೂ ಅಪ್ಪಟ ಆಸ್ತಿಕನಂತೆ ಗುರುತಿಸಿಕೊಂಡು ಅನುಯಾಯಿಗಳನ್ನು ಕಲೆ ಹಾಕತೊಡಗಿದ. ರಾಜಕೀಯ ನಾಯಕರ ಸಂಬಂಧ ಬೆಳೆಸಿದ. ಅನುಯಾಯಿಗಳ ಸಂಖ್ಯೆ ಬೆಳೆಯಿತು. ಹೀಗಿರುತ್ತಾ ಆತನ ಸುತ್ತ ತನಿಖೆ ನಡೆಯುತ್ತಿದೆ ಮತ್ತು ರಶ್ಯ ಆತನನ್ನು ಹಾಗೂ ಅನುಯಾಯಿಗಳನ್ನು ಸ್ವೀಕರಿಸಲು ಸಿದ್ಧವಿಲ್ಲವೆಂಬುದನ್ನು ತಿಳಿದ ಬಳಿಕ, ತನ್ನೆಲ್ಲಾ ಅನುಯಾಯಿಗಳ ಜೊತೆ ಜೋನ್ಸ್ ಟೌನ್‍ನ ತನ್ನ ಕಚೇರಿಗೆ ತೆರಳಿ, ಅವರನ್ನು ಆತ್ಮಹತ್ಯೆಗೆ ಪ್ರಚೋದಿಸಿದ. ಈ ಜಗತ್ತಿನ ಅಮಾನವೀಯ ಸ್ಥಿತಿಯನ್ನು ಪ್ರತಿಭಟಿಸಿ ‘ಕ್ರಾಂತಿಯುತವಾಗಿ ಆತ್ಮಹತ್ಯೆ ಮಾಡುತ್ತಿದ್ದೇವೆ..’ ಎಂಬ ಒಕ್ಕಣೆಯುಳ್ಳ 45 ನಿಮಿಷಗಳ ಹೇಳಿಕೆಯನ್ನು ಆತ್ಮಹತ್ಯೆಗೆ ಮೊದಲು ಚಿತ್ರೀಕರಿಸಲಾದ ವೀಡಿಯೋದಲ್ಲಿ ಹೇಳಿಕೊಂಡ. ‘ಜನರನ್ನು ಧಾರ್ಮಿಕವಾಗಿ ಒಟ್ಟುಗೂಡಿಸಿ, ಅಮೇರಿಕದಲ್ಲಿ ಕಮ್ಯೂನಿಸ್ಟ್ ಆಡಳಿತವನ್ನು (ಕ್ರಾಂತಿ) ತರಬೇಕೆಂಬುದು ಆತನ ನಿಲುವಾಗಿತ್ತೆಂದು’ ನ್ಯೂಯಾರ್ಕ್ ಟೈಮ್ಸ್ ಗೆ ನೀಡಿದ ಸಂದರ್ಶನದಲ್ಲಿ ಆತನ ಪತ್ನಿ ಮರ್ಸಿ ಆ ಬಳಿಕ ಒಪ್ಪಿಕೊಂಡಿದ್ದಳು. ಇದಲ್ಲದೇ, 1984ರಲ್ಲಿ ಲುಕ್ ಜರ್ನೆಟ್ ಮತ್ತು ಜೋಸೆಫ್ ಡಿ ಮಾಂಬ್ರೆ ಎಂಬವರಿಂದ ಫ್ರಾನ್ಸ್ ನಲ್ಲಿ ಹುಟ್ಟು ಪಡೆದ ಸೋಲಾರ್ ಟೆಂಪಲ್ಸ್ ಎಂಬ ಪಂಥವೂ ತನ್ನ ಅನುಯಾಯಿಗಳನ್ನು ಆತ್ಮಹತ್ಯೆಗೆ ಪ್ರಚೋದಿಸಿದ ಕುಖ್ಯಾತಿಯನ್ನೇ ಹೊಂದಿದೆ. ಈ ಜಗತ್ತಿನ ದೌರ್ಜನ್ಯ ಮತ್ತು ಹಿಪಾಕ್ರಸಿಯಿಂದ ಬಚಾವಾಗುವುದಕ್ಕಾಗಿ ಆತ್ಮಹತ್ಯೆಯನ್ನು ಪರಿಹಾರವಾಗಿ ಆ ಪಂಥ ಮಂಡಿಸಿರುವುದರಿಂದಲೇ 1994-97ರ ಮಧ್ಯೆ ಅದರ 74 ಮಂದಿ ಅನುಯಾಯಿಗಳು ಆತ್ಮಹತ್ಯೆ ಮಾಡಿಕೊಂಡರು. ಇವರಲ್ಲಿ ಓರ್ವ ಮೇಯರ್, ಪತ್ರಕರ್ತ, ಸರಕಾರಿ ಅಧಿಕಾರಿ.. ಕೂಡ ಸೇರಿದ್ದರು..’
   ಹಾಗಂತ, ಚೌಳಿ ಮಠವನ್ನು ಈ ಪಂಥಗಳ ಜೊತೆ ಹೋಲಿಸುವುದಕ್ಕಾಗುವುದಿಲ್ಲ. ಮೂವರು ಸ್ವಾಮೀಜಿಗಳು ಆತ್ಮಹತ್ಯೆ ಮಾಡಿಕೊಂಡರೂ ಭಕ್ತಾದಿಗಳಲ್ಲಿ ಯಾರೂ ಆ ದಾರಿಯನ್ನು ಆಯ್ಕೆ ಮಾಡಿಲ್ಲ. ಆದರೂ ಈ ಸ್ವಾಮೀಜಿಗಳು ತಮ್ಮ ಕೃತ್ಯದ ಮೂಲಕ ಸಾರ್ವಜನಿಕರಲ್ಲಿ ಸಾಕಷ್ಟು ಗೊಂದಲಗಳನ್ನು ಹುಟ್ಟು ಹಾಕಿರುವರೆಂಬುದು ಸ್ಪಷ್ಟ. ಜನಸಾಮಾನ್ಯರು ಊಟ, ಬಟ್ಟೆ, ಮನೆ, ನೀರು.. ಸಹಿತ ಅನೇಕಾರು ಮೂಲಭೂತ ಸಮಸ್ಯೆಗಳಿಂದ ಬಳಲುತ್ತಿರುವಾಗ ಸರಕಾರದಿಂದ ಕೋಟಿಗಟ್ಟಲೆ ಅನುದಾನ ಪಡೆಯುವ ಮಠಗಳು ಹೀಗೆ ‘ಆತ್ಮಹತ್ಯೆ' ಮಾಡಿಕೊಂಡರೆ ಏನು ಮಾಡಬೇಕು? ಜನರ ಸಂಕಷ್ಟಗಳಿಗೆ ಕಣ್ಣು, ಕಿವಿ, ಹೃದಯವಾಗಬೇಕಾದ ಸ್ವಾಮೀಜಿಗಳೇ ಕಣ್ಣು ಮುಚ್ಚಿಕೊಂಡು ಹೊರಟು ಹೋಗುವುದಕ್ಕೆ ಏನರ್ಥವಿದೆ? ಆಧ್ಯಾತ್ಮ ಎಂಬುದು ಆತ್ಮಹತ್ಯೆಯ ಮೂಲಕ ಸಿದ್ಧಿಸುವಂಥದ್ದೇ? ಯಾವುದೇ ಸಮಸ್ಯೆ, ಸಂಕಷ್ಟವನ್ನು ಛಾತಿಯಿಂದ ಎದುರಿಸುವುದಕ್ಕೆ ಪ್ರಚೋದನೆ ಕೊಡುವುದರ ಹೆಸರೇ ಅಲ್ಲವೇ ಧರ್ಮ? ಚೌಳಿ ಮಠ ಘಟನೆಯು ಧರ್ಮದ ಈ ಕಲ್ಪನೆಯನ್ನು ಹೇಗೆ ಪ್ರತಿನಿಧಿಸುತ್ತದೆ? ಅಲ್ಲದೇ, ವಾರಕ್ಕೋ ತಿಂಗಳಿಗೊಮ್ಮೆಯೋ ಮಠಕ್ಕೆ ಭೇಟಿಕೊಟ್ಟು ನಡಕೊಳ್ಳುವ ಭಕ್ತರಂಥಲ್ಲವಲ್ಲ ಸ್ವಾಮೀಜಿಗಳು! ಅವರಿಗೆ ಸರಿ-ತಪ್ಪು, ಕರ್ಮ-ಅಕರ್ಮ, ಪಾಪ-ಪುಣ್ಯ, ವೇದ-ಉಪನಿಷತ್ತುಗಳೆಲ್ಲ ಚೆನ್ನಾಗಿ ಗೊತ್ತಿರುತ್ತದಲ್ಲವೇ? ಹೀಗಿರುವಾಗ ಅವರೇ ಆತ್ಮಹತ್ಯೆ ಮಾಡಿಕೊಂಡರೆ ಆತ್ಮಹತ್ಯೆಯು ‘ಧಾರ್ಮಿಕವಾಗಿ ಸರಿ’ ಎಂಬ ವಾದದ ಹುಟ್ಟಿಗೆ ಕಾರಣವಾಗದೇ? ಮುಂದೆ, ಕೈಲಾಸ ಸೇರುವುದಕ್ಕೆ ಆತ್ಮಹತ್ಯೆಯನ್ನು ಒಂದು ಮಾರ್ಗವಾಗಿ ಆಯ್ಕೆ ಮಾಡಿಕೊಳ್ಳುವವರು ಸೃಷ್ಟಿಯಾದರೆ ಏನು ಮಾಡುವುದು? ಇವೆಲ್ಲ ರವಾನಿಸುವ ಸಂದೇಶವಾದರೂ ಏನು?
   ಪವಿತ್ರ ಕುರ್‍ಆನ್ ಮತ್ತು ಪ್ರವಾದಿ ಮುಹಮ್ಮದ್‍ರ(ಸ) ಬದುಕು-ಬೋಧನೆಗಳು ಇಷ್ಟವಾಗುವುದೇ ಇದಕ್ಕೆ..

ಯುವಕರತ್ತ ಗುರಿ ಮಾಡಿದ್ದ ಬಂದೂಕು ಯುವತಿಯರತ್ತ ತಿರುಗಿತೇಕೆ?

   ಜಿಐಓ (ಗಲ್ರ್ಸ್ ಇಸ್ಲಾಮಿಕ್ ಆರ್ಗನೈಝೇಶನ್)ನ ಮೇಲೆ ನಿಗಾ ಇಡುವಂತೆ ಮಹಾರಾಷ್ಟ್ರದ ಎಲ್ಲಾ ಪೊಲೀಸ್  ಠಾಣೆಗಳಿಗೆ  ಮುಂಬೈಯ ಗುಪ್ತಚರ ಸಂಸ್ಥೆಗಳು ಸುತ್ತೋಲೆ ಹೊರಡಿಸಿರುವುದನ್ನು, Erroreous memo puts Mumbai cops in spot-  ಎಂಬ ಶೀರ್ಷಿಕೆಯಲ್ಲಿ ಪಿಟಿಐ ಕಳೆದವಾರ ವರದಿ ಮಾಡಿತು. Mumbai police shocker: Muslim institute is enrolling for Jihad  ಎಂಬ ಹೆಡ್‍ಲೈನ್‍ನಲ್ಲಿ NDTV ಸುದ್ದಿ ಪ್ರಕಟಿಸಿದರೆ;  Storm after cop memo leak over Girls Islamic Organisation ಎಂದು ದಿ ಟೆಲಿಗ್ರಾಫ್ ಪತ್ರಿಕೆ ಸುದ್ದಿ ಬರೆಯಿತು. ಎಪ್ರಿಲ್ ಒಂದರಂದು ಶಿವಸೇನೆಯ ಮುಖವಾಣಿ ಸಾಮ್ನಾ ಪತ್ರಿಕೆಯಲ್ಲಿ ಮೊದಲ ಬಾರಿಗೆ ಕಾಣಿಸಿಕೊಂಡ ಈ ಸುದ್ದಿ ಮರುದಿನ ಹೆಚ್ಚಿನೆಲ್ಲಾ ಆಂಗ್ಲ ಪತ್ರಿಕೆಗಳಲ್ಲಿ ದೊಡ್ಡ ಸುದ್ದಿಯಾಗಿ ಪ್ರಕಟವಾಯಿತು. ಸುತ್ತೋಲೆಯಲ್ಲಿ,
   ‘ಜಮಾಅತೆ ಇಸ್ಲಾಮೀ  ಹಿಂದ್‍ನ ಅಂಗಸಂಸ್ಥೆಯಾದ ಜಿಐಓವು ಮಹಾರಾಷ್ಟ್ರದಲ್ಲಿ 40 ಹೈಸ್ಕೂಲ್ ಮತ್ತು 3 ಜೂನಿಯರ್ ಕಾಲೇಜುಗಳನ್ನು ನಡೆಸುತ್ತಿದ್ದು, ವಿದ್ಯಾರ್ಥಿನಿಯರ ಬ್ರೈನ್‍ವಾಶ್ ಮಾಡುತ್ತಿದೆ. ಅವರಿಗೆ ಜಿಹಾದ್‍ನ ತರಬೇತಿ ನೀಡುತ್ತಿದೆ. ಸಂಘಟನೆಯ ಸ್ವಾಲಿಹಾ ಬಾಜಿ ಮತ್ತು ಸುಮಯ್ಯ ಎಂಬಿಬ್ಬರು ಈ ವಿಷಯದಲ್ಲಿ ತುಂಬಾ ಮುಂದಿದ್ದಾರೆ. ಅವರ ಬಗ್ಗೆ ವಿಶೇಷ ಗಮನವಿಡಬೇಕು. ಇಸ್ಲಾಮಿನಂತೆ ಬದುಕಲು ಯುವತಿಯರನ್ನು ಪ್ರಚೋದಿಸುತ್ತಾ, ಅವರಲ್ಲಿ ಜಿಹಾದಿ ಪ್ರಜ್ಞೆಯನ್ನು ಅದು ತುಂಬುತ್ತಿದೆ..' ಎಂದೆಲ್ಲಾ ಹೇಳಲಾಗಿತ್ತು. ಆನ್‍ಲೈನ್‍ನಲ್ಲಿ ಈ ಕುರಿತಂತೆ ಧಾರಾಳ ಚರ್ಚೆಗಳು ನಡೆದುವು. ಅಲ್ಲದೇ,
   'ಜನರು ಇವತ್ತು ವಿಜ್ಞಾನದೆಡೆಗೆ ಹೆಚ್ಚೆಚ್ಚು ಆಕರ್ಷಿತರಾಗುತ್ತಿರುವಾಗ, ಈ ಸಂಘಟನೆಯು ಯುವತಿಯರನ್ನು ಬುರ್ಖಾ ಧರಿಸುವಂತೆ ಮತ್ತು ಇಸ್ಲಾಮನ್ನು ಅಧ್ಯಯನ ಮಾಡುವಂತೆ ಪ್ರೇರೇಪಿಸುತ್ತಿದೆ. ಆದ್ದರಿಂದಲೇ ನಾವು ಇವರ ಬಗ್ಗೆ ನಿಗಾ ವಹಿಸುವಂತೆ ಪೊಲೀಸರಿಗೆ ಸೂಚಿಸಿದ್ದೇವೆ..' ಎಂದು ಗುಪ್ತಚರ ಸಂಸ್ಥೆಯ ವಿಶೇಷ ದಳದ ಮುಖ್ಯಸ್ಥ ಸಂಜಯ್ ಶಿಂತ್ರೆ ಪತ್ರಕರ್ತರೊಂದಿಗೆ ಹೇಳಿಕೊಂಡದ್ದು ಚರ್ಚೆಯ ವ್ಯಾಪ್ತಿಯನ್ನು ಇನ್ನಷ್ಟು ವಿಸ್ತರಿಸಿತು. ‘ವೈಜ್ಞಾನಿಕ ಆಲೋಚನೆಗಳನ್ನು ಹೊಂದುವುದೆಂದರೆ ಬಟ್ಟೆಗಳನ್ನೆಲ್ಲಾ ಕಳಚುವುದು ಎಂದರ್ಥವೇ..’ ಎಂದು ಚರ್ಚೆಯಲ್ಲಿ ಭಾಗವಹಿಸಿದ ಒಬ್ಬರು ಪ್ರಶ್ನಿಸಿದರೆ, 'ಮೈ ಮುಚ್ಚುವ ಬಟ್ಟೆ ಧರಿಸುವುದು ವಿಜ್ಞಾನಕ್ಕೆ ವಿರುದ್ಧವೇ'..  ಎಂದು ಇನ್ನೊಬ್ಬರು ಪ್ರಶ್ನಿಸಿದರು. Leaked information is secondary, but how that Mumbai police has issued such an internal notice where an organisation is working for the good cause. Is the police is blind as they cant differentiate between good and bad...  It is very clear that the Mumbai police is acting as per the script written by the RSS and VHP -  ಗುಪ್ತಚರ ಇಲಾಖೆಯು ಹೊರಡಿಸಿದ ಸುತ್ತೋಲೆ ಹೇಗೆ ಸೋರಿಕೆಯಾಯಿತು ಎಂಬುದು ಮುಖ್ಯವಲ್ಲ, ಬದಲು ಒಳಿತಿಗಾಗಿ ಕೆಲಸ ಮಾಡುತ್ತಿರುವ ಸಂಘಟನೆಯ ವಿರುದ್ಧ ಪೊಲೀಸರು ಇಂಥದ್ದೊಂದು ಸುತ್ತೋಲೆ ಹೊರಡಿಸಿದ್ದಾದರೂ ಹೇಗೆ? ಒಳಿತು ಮತ್ತು ಕೆಡುಕಿನ ನಡುವೆ ಇರುವ ವ್ಯತ್ಯಾಸವನ್ನು ತಿಳಿಯದಷ್ಟು ಅವರು ಕುರುಡಾಗಿ ಬಿಟ್ಟರೇ? ಇದಕ್ಕೆ ಪೊಲೀಸರು ಕ್ಷಮೆ ಯಾಚಿಸುವುದು ಪರಿಹಾರವಲ್ಲ. ಅವರು ತಕ್ಷಣ ಈ ಸುತ್ತೋಲೆಯನ್ನು ಹಿಂಪಡೆದು ಜಿಐಓನ ಮೇಲೆ ನಿಗಾ ಇಡುವುದನ್ನು ನಿಲ್ಲಿಸಬೇಕು. ಈ ಬೆಳವಣಿಗೆಯನ್ನು ನೋಡುವಾಗ ಮುಂಬೈ ಪೊಲೀಸರು ಆರೆಸ್ಸೆಸ್ ಮತ್ತು ವಿಹಿಂಪದ ಕಾರ್ಯಸೂಚಿಯಂತೆ ಕೆಲಸ ನಿರ್ವಹಿಸುತ್ತಿದ್ದಾರೆಂಬುದು ಸ್ಪಷ್ಟವಾಗುತ್ತಿದೆ..’ ಅಂತ ಚೆನ್ನೈಯ ಯೂನುಸ್ ಎಂಬವರು ಬರೆದರೆ; ಅಮೇರಿಕದಲ್ಲಿರುವ ಸುರೇಶ್ ಎಂಬವರು,
   ‘ತನಿಖಾ ಸಂಸ್ಥೆಗಳು ವ್ಯಕ್ತಿ ಅಥವಾ ಸಂಘಟನೆಗಳ ವಿರುದ್ಧ ಅನುಮಾನಗೊಂಡಾಗ ಅದರ ವಿರುದ್ಧ ಮುಗಿ ಬೀಳುವುದು ಸರಿಯಲ್ಲ. ಅವರು ತನಿಖೆ ನಡೆಸಲಿ. ದೇಶದ ಸದ್ಯದ ಪರಿಸ್ಥಿತಿಯಲ್ಲಿ ನಿಗಾ ವಹಿಸುವುದು, ಅನುಮಾನಗೊಳ್ಳುವುದೆಲ್ಲ ಅಸಹಜ ಅಲ್ಲ. ದೇಶದ ತನಿಖಾ ಸಂಸ್ಥೆಗಳನ್ನು ಎಲ್ಲ ಬಾಹ್ಯ ಒತ್ತಡಗಳಿಂದ ಮುಕ್ತಗೊಳಿಸುವುದು ಮತ್ತು ತೀರಾ ಸಣ್ಣ ವಿಷಯದಲ್ಲೂ ತನಿಖೆಗೆ ಪೂರ್ಣ ಸ್ವಾತಂತ್ರ್ಯ ಕೊಡುವುದು ನಮ್ಮ ಅಗತ್ಯವಾಗಿದೆ..' ಎಂದು ಬರೆದರು. ಹೀಗೆ ಚರ್ಚೆಗಳು ಸಾಗುತ್ತಿರುವಂತೆಯೇ ಪ್ರಕರಣದ ಎರಡು ದಿನಗಳ ಬಳಿಕ ಮುಂಬೈ ಪೊಲೀಸರು ಕ್ಷಮೆ ಯಾಚಿಸಿದರು. ಜಮಾಅತ್‍ನ ಮಹಾರಾಷ್ಟ್ರ ಘಟಕದ ಅಧ್ಯಕ್ಷ  ಮುಹಮ್ಮದ್ ಅಸ್ಲಮ್ ಖಾನ್ ನೇತೃತ್ವದ ನಿಯೋಗಕ್ಕೆ ತನಿಖೆ ನಡೆಸುವ ಭರವಸೆ ನೀಡಿದರು. ಆದರೆ ಕ್ಷಮೆ, ತನಿಖಾ ಭರವಸೆಗಳೇನೇ ಇರಲಿ, ಸುತ್ತೋಲೆಯು ಸಾರ್ವಜನಿಕವಾಗಿ ಕೆಲವು ಅನುಮಾನಗಳನ್ನಂತೂ ಹುಟ್ಟು ಹಾಕಿದೆ. ಭಯೋತ್ಪಾದನೆಯ ಹೆಸರಲ್ಲಿ ಅಮಾಯಕ ಮುಸ್ಲಿಮ್ ಯುವಕರ ಬಂಧನದ ಕುರಿತಂತೆ ತನಿಖೆ ನಡೆಸಲು ತ್ವರಿತ ನ್ಯಾಯಾಲಯಗಳನ್ನು ರಚಿಸಲಾಗುವುದೆಂದು ಗೃಹ ಸಚಿವ ಶಿಂಧೆಯವರು ಘೋಷಿಸಿದ ಬೆನ್ನಲ್ಲೇ ಮುಸ್ಲಿಮ್ ಯುವತಿಯರ ಮಧ್ಯೆಯೂ 'ಜಿಹಾದಿ' ತರಬೇತಿಗಳು ನಡೆಯುತ್ತಿವೆಯೆಂಬ ಸುದ್ದಿಯನ್ನು ಹರಿಬಿಡುವುದಕ್ಕೆ ಕಾರಣವೇನು? ಇದು ಕಾಕತಾಳೀಯವೇ (Co- inside) ಅಥವಾ ಇದರ ಹಿಂದೆ ನಿಗೂಢ ಉದ್ದೇಶಗಳಿವೆಯೇ? ಜಿಐಓನ ವಿರುದ್ಧ ಒಂದೇ ಒಂದು ಕೇಸು ದಾಖಲಾಗಿಲ್ಲ ಎಂದು ಮುಂಬೈ ಪೊಲೀಸ್ ಮುಖ್ಯಸ್ಥರೇ ಒಪ್ಪಿಕೊಂಡಿದ್ದಾರೆ. ಅಲ್ಲದೇ ಇಸ್ಲಾಮಿನಂತೆ ಬದುಕಲು ಮುಸ್ಲಿಮ್ ಯುವತಿಯರನ್ನು ಜಿಐಓ ಪ್ರೇರೇಪಿಸುತ್ತಿದೆ ಎಂದೂ ಹೇಳುತ್ತಿದ್ದಾರೆ. ಇದೇನು ದೇಶ ವಿರೋಧಿ ಕೃತ್ಯವೇ? ಈ ದೇಶದ ಸಂವಿಧಾನವೇ ಒದಗಿಸಿರುವ ಸ್ವಾತಂತ್ರ್ಯವನ್ನು ಭಯೋತ್ಪಾದನಾ ಚಟುವಟಿಕೆಯಂತೆ, ನಿಗಾ ಇಡುವಷ್ಟು ಉಗ್ರ ಕೃತ್ಯದಂತೆ ಯಾಕೆ ನೋಡಬೇಕು? ಜಿಐಓನ ಚಟುವಟಿಕೆಗಳೇನೂ ಭೂಗತವಾಗಿ ನಡೆಯುತ್ತಿಲ್ಲವಲ್ಲ. ಅದರ ಸಂವಿಧಾನ ಎಲ್ಲರಿಗೂ ಸಿಗುವಷ್ಟು ಮುಕ್ತವಾಗಿದೆ. ಅದರ ಕಚೇರಿಗಳು ಕೂಡ ವಿಳಾಸ ಸಮೇತ ಸಾರ್ವಜನಿಕರಿಗೆ ಲಭ್ಯವಿವೆ. ಯಾರಿಗೆ ಬೇಕಾದರೂ ಅದರ ಚಟುವಟಿಕೆಗಳನ್ನು ವೀಕ್ಷಿಸುವ, ಪಾಲುಗೊಳ್ಳುವ ಅವಕಾಶಗಳೂ ಇವೆ. ಹೀಗಿರುತ್ತಾ, ಜಿಐಓವನ್ನು ಶಂಕಿತಗೊಳಿಸುವ ಸುತ್ತೋಲೆಯೊಂದು ಹೊರಡುತ್ತದೆಂದರೆ ಅದನ್ನು ಕಡೆಗಣಿಸುವುದಾದರೂ ಹೇಗೆ? ಇಷ್ಟಕ್ಕೂ ಈ ದೇಶದಲ್ಲಿ ಜಿಐಓ ಎಂಬ ಸಂಘಟನೆ ಇರುವುದು ಮಹಾರಾಷ್ಟ್ರದಲ್ಲಿ ಮಾತ್ರ ಅಲ್ಲ, ದೇಶದಾದ್ಯಂತ ಇದೆ. ಅಲ್ಲದೆ, ಅದರ ಸಂವಿಧಾನ, ಕಾರ್ಯವಿಧಾನ, ಗುರಿ, ಉದ್ದೇಶಗಳೆಲ್ಲವೂ ದೇಶದಾದ್ಯಂತ ಒಂದೇ. www.giomsz.blogspot.com  ಎಂಬ ಲಿಂಕ್‍ಗೆ ಕ್ಲಿಕ್ ಮಾಡಿದರೆ ಮುಂಬೈಯ ಜಿಐಓ ಘಟಕವು ಈ ವರೆಗೆ ಏನೆಲ್ಲ ಚಟುವಟಿಕೆಗಳನ್ನು ನಡೆಸಿದೆ, ಅದರ ವಿಶೇಷತೆಯೇನು, ಅದರ ಕಾರ್ಯವಿಧಾನ ದೇಶಕ್ಕೆ ಮಾರಕವೋ ಪೂರಕವೋ.. ಎಂಬಿತ್ಯಾದಿಗಳನ್ನೆಲ್ಲ ಗುಪ್ತಚರ ಇಲಾಖೆಯ ಸಹಿತ ಯಾರಿಗೆ ಬೇಕಾದರೂ ಮನವರಿಕೆ ಮಾಡಿಕೊಳ್ಳಬಹುದು. ಇಷ್ಟಿದ್ದೂ ನೈತಿಕತೆ ಅಳವಡಿಸಿಕೊಳ್ಳುವಂತೆ, ಧರ್ಮದ ಪ್ರಕಾರ ಬದುಕುವಂತೆ ಪ್ರೇರೇಪಿಸುವುದನ್ನು ಸುತ್ತೋಲೆಯಲ್ಲಿ ಅಪರಾಧವಾಗಿ ಪರಿಗಣಿಸಿರುವುದು ಮತ್ತು ಪೊಲೀಸ್ ಇಲಾಖೆಯ ಒಳಗೇ ಸುತ್ತಬೇಕಾದ ಈ ಸುತ್ತೋಲೆಯನ್ನು ಶಿವಸೇನೆಯ ಸಾಮ್ನಾ ಪತ್ರಿಕೆಗೆ ಮೊದಲು ಸೋರಿಕೆ ಮಾಡಿರುವುದು ಏನನ್ನು ಸೂಚಿಸುತ್ತದೆ? ಜಿಐಓ ಮತ್ತು ಆ ಮೂಲಕ ಜಮಾಅತ್‍ನ ಮೇಲೆ ಸಾರ್ವಜನಿಕರಲ್ಲಿ ಒಂದು ಬಗೆಯ ಅನುಮಾನವನ್ನು ಮೂಡಿಸುವ ಉದ್ದೇಶ ಇದರ ಹಿಂದೆ ಇಲ್ಲ ಅನ್ನುತ್ತೀರಾ? ಬಂಗ್ಲಾದೇಶದ ಜಮಾಅತೆ ಇಸ್ಲಾಮಿಯ ಕುರಿತಂತೆ ಮಾಧ್ಯಮಗಳಲ್ಲಿ ಪ್ರಕಟವಾಗುತ್ತಿರುವ ಸುದ್ದಿಗಳ ಹಿನ್ನೆಲೆಯಲ್ಲಿ ಈ ಸುತ್ತೋಲೆಯನ್ನು ತಾಳೆ ಮಾಡಿ ನೋಡಿಕೊಳ್ಳಿ. ಪೊಲೀಸರ ಉದ್ದೇಶ ಶುದ್ಧಿಯ ಬಗ್ಗೆ ಅನುಮಾನ ಬರುವುದಿಲ್ಲವೇ? ಬಂದೂಕು ಹಿಡಿದ ಬುರ್ಖಾಧಾರಿ ಮಹಿಳೆಯರ ಪೊಟೋದ ಜೊತೆ ಈ ಸುದ್ದಿಯನ್ನು ಪ್ರಕಟಿಸುವುದಕ್ಕೆ ಸಾಮ್ನಾ ಪತ್ರಿಕೆಗೆ ಅವಕಾಶ ಮಾಡಿಕೊಟ್ಟದ್ದಾದರೂ ಯಾರು? ಸುತ್ತೋಲೆಯು ಯಾಕೆ ಮುಸ್ಲಿಮ್ ವಿರೋಧಿ ಧೋರಣೆಯುಳ್ಳ ಸಾಮ್ನಾಕ್ಕೇ ಪ್ರಥಮವಾಗಿ ಸೋರಿಕೆಯಾಗಬೇಕು? ಜಿಐಓವು ಯುವತಿಯರಿಗೆ ಬಂದೂಕಿಗೆ ತರಬೇತಿ ಕೊಡುತ್ತಿದೆ ಎಂಬ ಸುಳ್ಳು ಸಂದೇಶವನ್ನು ಸಾರ್ವಜನಿಕವಾಗಿ ಬಿತ್ತುವುದಕ್ಕೆ ಗುಪ್ತಚರ ಇಲಾಖೆಯ ಅಧಿಕಾರಿಗಳು ಸಾಮ್ನಾದ ಮುಖಾಂತರ ನಡೆಸಿರುವ ಸಂಚು ಇದಾಗಿರಬಾರದೇಕೆ? ಅಂದಹಾಗೆ,
  1. ಒಳಿತಿನ ಅಭಿವೃದ್ಧಿ ಮತ್ತು ಕೆಡುಕಿನ ನಿರ್ಮೂಲನಕ್ಕಾಗಿ ಯುವತಿಯರನ್ನು ಪ್ರೇರೇಪಿಸುವುದು.
  2. ಸಮಾಜದಲ್ಲಿರುವ ಕೆಡುಕುಗಳ ನಿರ್ಮೂಲನಕ್ಕಾಗಿ ಪ್ರಯತ್ನಿಸುವುದು.
  3. ಇಸ್ಲಾಮೀ  ಜೀವನ ಕ್ರಮದ ಆಧಾರದಲ್ಲಿ ಕುಟುಂಬ ನಿರ್ಮಾಣಕ್ಕಾಗಿ ಯುವತಿಯರನ್ನು ತಯಾರುಗೊಳಿಸುವುದು.
  4. ಶಿಕ್ಷಣ ವ್ಯವಸ್ಥೆಯಲ್ಲಿ ನೈತಿಕ ಮೌಲ್ಯಗಳನ್ನು ಮತ್ತು ಶೈಕ್ಷಣಿಕ ಕೇಂದ್ರಗಳಲ್ಲಿ ಉತ್ತಮ ಚಾರಿತ್ರ್ಯ ಹಾಗೂ ಉನ್ನತ ಶಿಷ್ಟಾಚಾರಗಳನ್ನು ಬೆಳೆಸುವುದು.
  5. ನೈತಿಕ ಮೇರೆಗಳನ್ನು ಪಾಲಿಸುತ್ತಾ, ಕುರ್‍ಆನ್ ಮತ್ತು ಪ್ರವಾದಿ ಚರ್ಯೆಯ ಆಧಾರದಲ್ಲಿ ಕೋಮು ದ್ವೇಷ, ಅಶಾಂತಿಗೆ ಕಾರಣವಾಗುವ ವಿಧಾನಗಳಿಂದ ದೂರವಿದ್ದುಕೊಂಡು ರಚನಾತ್ಮಕ ರೂಪದಲ್ಲಿ ಇವುಗಳ ಜಾರಿಗಾಗಿ ಪ್ರಯತ್ನಿಸುವುದು..
   ಮುಂತಾದ ಅಂಶಗಳಿರುವ ಜಿಐಓನ ಸಂವಿಧಾನದಲ್ಲಿ ದೇಶದ ಸಮಗ್ರತೆಗೆ, ಶಾಂತಿಯುತ ವ್ಯವಸ್ಥೆಗೆ ಭಂಗ ತರುವಂಥದ್ದು ಏನಿದೆ? ಇಸ್ಲಾಮಿನಂತೆ ಜೀವಿಸಿ ಎಂದು ಕರೆಕೊಟ್ಟು, ಅದಕ್ಕಾಗಿ ಪ್ರಯತ್ನಿಸುವುದು ಶಂಕಿತ ಚಟುವಟಿಕೆಯೇ? ಮುಂಬೈಯ ಜಿಐಓವಂತೂ, ‘ಪರೀಕ್ಷೆಯನ್ನು ಎದುರಿಸುವುದು ಹೇಗೆ; ಪ್ರಬಂಧ, ಸಂವಾದ, ಪೈಂಟಿಂಗ್ಸ್ ಸ್ಪರ್ಧೆಗಳು, ಇಸ್ಲಾಮೀ  ರಜಾದಿನ ಶಿಬಿರ (VIC), ಕ್ಯಾರಿಯರ್ ಗೈಡೆನ್ಸ್, ಸೆಮಿನಾರ್, ಅಧ್ಯಯನ ತರಗತಿಗಳು, ಗೆಟ್ ಟುಗೆದರ್.. ಮುಂತಾದ ವಿವಿಧ                ಕಾರ್ಯಕ್ರಮಗಳನ್ನು ನಡೆಸಿರುವುದಾಗಿ ಬ್ಲಾಗ್‍ನಲ್ಲಿಯೇ ಹೇಳಿಕೊಂಡಿದೆ. ಇದರಲ್ಲಿ ಭಯೋತ್ಪಾದನೆಗೆ ಪೂರಕವಾಗಿರುವುದು ಯಾವುದಿದೆ? ಅಲ್ಲದೇ, ದೇಶದಾದ್ಯಂತ ಜಿಐಓ ವಿವಿಧ ಕಾರ್ಯಕ್ರಮಗಳನ್ನು ನಡೆಸುತ್ತಾ ಬರುತ್ತಿದೆ. ತಮಿಳುನಾಡಿನ ಕುಡಂಕುಲಮ್‍ನಲ್ಲಿ ನಿರ್ಮಾಣವಾಗುತ್ತಿರುವ ಅಣುವಿದ್ಯುತ್ ಸ್ಥಾವರದ ವಿರುದ್ಧ ಮರಳಿನಲ್ಲಿ ಸ್ವಯಂ ಅರ್ಧ ಹೂತುಕೊಂಡು ಪ್ರತಿಭಟಿಸಿ ದೇಶದ ಗಮನ ಸೆಳೆದಿದ್ದರೆ ಅದು ಜಿಐಓ ಮಾತ್ರ. ದೆಹಲಿ ಅತ್ಯಾಚಾರದ ವಿರುದ್ಧ ಜಿಐಓ ರಾಲಿ, ಪ್ರತಿಭಟನೆ, ಸೆಮಿನಾರ್‍ಗಳನ್ನು ನಡೆಸಿದೆ. ಕರ್ನಾಟಕದ ಜಿಐಓ ಘಟಕವಂತೂ ಇತ್ತೀಚೆಗಷ್ಟೇ, 'ಲಜ್ಜೆ- ನನ್ನ ಜೀವನದ ಪ್ರತಿಬಿಂಬ '- ಎಂಬ ವಿಷಯದಲ್ಲಿ ರಾಜ್ಯದಾದ್ಯಂತ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡಿದೆ. ಯುವತಿಯರಲ್ಲಿ ನೈತಿಕ ಮೇರೆಗಳನ್ನು ಪಾಲಿಸುವಂತೆ ಕರೆ ಕೊಡುವ ಕ್ಯಾಂಪಸ್ ಉಪನ್ಯಾಸಗಳನ್ನು ನಡೆಸುತ್ತಿದೆ. ಹೆಚ್ಚು ಅಂಕ ಪಡೆದ ವಿದ್ಯಾರ್ಥಿನಿಯರನ್ನು ಅವರ ಧರ್ಮ ನೋಡದೇ ಬಹುಮಾನ ಕೊಟ್ಟು ಪ್ರೋತ್ಸಾಹಿಸುತ್ತಿದೆ. ಇವೆಲ್ಲ ಶಂಕಿತ ಚಟುವಟಿಕೆಗಳು ಎಂದಾದರೆ ಅಶಂಕಿತ ಚಟುವಟಿಕೆಗಳಾದರೂ ಯಾವುದು? ನಿಜವಾಗಿ, ಇವತ್ತು ದೇಶದಲ್ಲಿ ಅತ್ಯಂತ ಹೆಚ್ಚು ಚರ್ಚೆಯಲ್ಲಿರುವುದೇ ಯುವತಿಯರು. ಅತ್ಯಾಚಾರದ ಸುದ್ದಿಗಳು ಸುದ್ದಿ-ಮಾಧ್ಯಮಗಳನ್ನಿಡೀ ತುಂಬಿಕೊಂಡು ಭೀತಿಯ ವಾತಾವರಣ ನಿರ್ಮಾಣವಾಗಿರುವ ಸನ್ನಿವೇಶ ಇವತ್ತಿನದು. ಅತ್ಯಾಚಾರಿಗಳಿಗೆ ಮರಣ ದಂಡನೆ ವಿಧಿಸುವ ಬಗ್ಗೆ ಕಾನೂನೇ ನಿರ್ಮಾಣವಾಗಿದ್ದರೂ ಪ್ರಕರಣಗಳು ಕಡಿಮೆಯಾಗುತ್ತಿಲ್ಲ. ಇದರ ಜೊತೆಗೇ ಅತ್ಯಾಚಾರಕ್ಕೆ ಪ್ರಚೋದಕವಾಗುವ ಹೆಣ್ಣಿನ ವರ್ತನೆಗಳೂ ಸಾರ್ವಜನಿಕವಾಗಿ ಚರ್ಚೆಯಲ್ಲಿವೆ. ನೈತಿಕ-ಅನೈತಿಕಗಳು ವಿವಿಧ ಸೆಮಿನಾರ್‍ಗಳ, ಪತ್ರಿಕಾ ಬರಹಗಳ ವಸ್ತುವಾಗುತ್ತಿವೆ. ಇಂಥ ಹೊತ್ತಲ್ಲಿ, ಅತ್ಯಾಚಾರಿಗಳ ಬದಲು ನೈತಿಕ ಮೇರೆಗಳ ಬಗ್ಗೆ ಜಾಗೃತಿ ಮೂಡಿಸುವ ಯುವತಿಯರು ಶಂಕಿತಗೊಳ್ಳುವುದಕ್ಕೆ ಏನೆನ್ನಬೇಕು? ಅಂಥ ಸುತ್ತೋಲೆಯನ್ನು ತಯಾರುಗೊಳಿಸಿ ಸೋರಿಕೆ ಮಾಡಿದವರ ಉದ್ದೇಶ ಏನಿರಬಹುದು? ಈ ಸೋರಿಕೆ ಆಕಸ್ಮಿಕವೋ ಉದ್ದೇಶಪೂರ್ವಕವೋ?
   ಮುಸ್ಲಿಮ್ ಯುವಕರತ್ತ ಗುರಿ ಮಾಡಿದ್ದ ವ್ಯವಸ್ಥೆಯ ಬಂದೂಕು ಇದೀಗ ಯುವತಿಯರತ್ತ ತಿರುಗಿರುವುದಕ್ಕೆ ಖಂಡಿತ ಶಂಕಿತ ಉದ್ದೇಶವೊಂದು ಇರಲೇಬೇಕು.

ಕುದಿಯುವ ಅಪ್ಪನಿಂದ ತಣ್ಣನೆಯ ಮಗಳು ಹೇಗೆ ಸೃಷ್ಟಿಯಾದಾಳು ಹೇಳಿ?

ತೀರ್ಥಹಳ್ಳಿಯ ಘಟನೆ

   ಮೇಜಿನ ಮೇಲೆ ಚಿಕ್ಕದೊಂದು ಫೈಲು. ಅದರ ಪಕ್ಕ ಆ ಅಪ್ಪ ಕೂತಿದ್ದಾರೆ. ಬ್ಯುಝಿ ಇರ್ಬೇಕು, ಫೈಲನ್ನು ಭಾರೀ ಗಂಭೀರವಾಗಿ ಪರಿಶೀಲಿಸುತ್ತಿದ್ದಾರೆ. ಏನೋ ಬರೆಯುವುದು, ತುಸು ಹೊತ್ತು ನಿಂತು, ಆಲೋಚಿಸಿ ಪುನಃ ಬರೆಯೋದು.. ಹೀಗೆ ನಡೆಯುತ್ತಿರುತ್ತದೆ. 8 ವರ್ಷದ ಆ ಮಗಳಿಗೆ ಅಪ್ಪ ಅಂದರೆ ಇಷ್ಟ. ಅಪ್ಪನಿಗೂ ಮಗಳೆಂದರೆ ಇಷ್ಟವೇ. ಅಪ್ಪ ಬರೆಯುವಾಗ ಆಕೆ
ಪೆನ್ನು ಕೇಳುವಳು. ಲೈಟು ಆಫ್ ಮಾಡುವಳು. ಅಪ್ಪ ಸಿಟ್ಟಾದರೆ ಸುಮ್ಮನೆ ನಗುವಳು. ತನ್ನ ಬ್ಯಾಗ್‍ನಿಂದ ಪುಸ್ತಕ ತೆಗೆದು ಫೈಲಿನ ಮೇಲಿಟ್ಟು ತಂಟೆ ಕೊಡುವಳು. ಅಪ್ಪನ ಮಡಿಲಲ್ಲಿ ಬಂದು ಕೂರುವಳು. ‘ಅಸಾಧ್ಯ ತುಂಟಿ ನನ್ನ ಪುಟ್ಟಿ’ ಎಂದು ಅಪ್ಪ ಮುದ್ದು ಮಾಡಿ ಪಕ್ಕಕ್ಕೆ ಕೂರಿಸುವರು. ಹೀಗಿರುತ್ತಾ 3ನೇ ಕ್ಲಾಸಿನ ವಾರ್ಷಿಕ ಪರೀಕ್ಷೆಯ ಸಮಯ ಹತ್ತಿರ ಬಂತು. ‘ಚೆನ್ನಾಗಿ ಕಲಿತು ಹೆಚ್ಚು ಅಂಕ ಪಡೆದು ಪಾಸಾದರೆ ಗಿಫ್ಟ್ ಕೊಡುತ್ತೇನೆ’ ಮಗಳೇ'.. ಎಂದು ಅಪ್ಪ ಶಾಲೆಯ ಆರಂಭದಲ್ಲಿ ಹೇಳಿದ್ದು ಆಕೆಗಿನ್ನೂ ನೆನಪಿತ್ತು. ಹಾಗಂತ ಆಕೆಯೇನೂ ದಡ್ಡಿಯಲ್ಲ. ಮೊದಲ ನಾಲ್ಕೈದು ರಾಂಕುಗಳಲ್ಲಿ ಯಾವಾಗಲೂ ಒಂದು ಆಕೆಗೇ ಮೀಸಲಿರುತ್ತಿತ್ತು. ಆದರೆ ಅಂತಿಮ ಪರೀಕ್ಷೆಗೆ ತಯಾರಿ ನಡೆಸುವ ಹೊತ್ತಿನಲ್ಲೇ ಆರೋಗ್ಯ ಕೈಕೊಟ್ಟಿತು. ಹುಡುಗಿ ತೀವ್ರ ಅಸ್ವಸ್ಥಳಾದಳು. ಅಪ್ಪ ಅಧೀರನಾಗಿಬಿಟ್ಟ. ಮಗಳನ್ನು ಉಳಿಸಿಕೊಳ್ಳಬೇಕಾದರೆ ದೊಡ್ಡದೊಂದು ತ್ಯಾಗಕ್ಕೆ ಆತ ಸಿದ್ಧನಾಗಬೇಕಿತ್ತು. ಅಪ್ಪ ಸಿದ್ಧನಾದ. ಮಗಳು ಚೇತರಿಸಿಕೊಂಡಳು. ತಂಟೆ, ತಕರಾರು, ಮುದ್ದು, ಲವಲವಿಕೆ.. ಎಲ್ಲವನ್ನೂ ಕಳಕೊಂಡು ಆಸ್ಪತ್ರೆಯ ಮಂಚದಲ್ಲಿ ಮುದುಡಿ ಮಲಗಿದ್ದ ಮಗಳು ಮತ್ತೆ ಅವೆಲ್ಲವನ್ನೂ ಪಡಕೊಂಡಳು. ಪರೀಕ್ಷೆ ಬರೆದಳು. ಒಂದು ದಿನ ಸಂಜೆ ಅಪ್ಪನನ್ನೇ ಕಾಯುತ್ತಾ ಗೇಟಿನಲ್ಲಿ ನಿಂತಿದ್ದ ಅವಳು ಓಡೋಡಿ ಅಪ್ಪನ ಕೈ ಹಿಡಿದಳು. ಗಿಫ್ಟ್ ಕೊಡಿ ಅಂದಳು. ಅಪ್ಪ ಆಕೆಯನ್ನು ಎತ್ತಿ ಮುದ್ದಿಸಿ ಬೆನ್ನು ತಟ್ಟಿದರು. ಡ್ರೆಸ್ಸು ಬದಲಿಸಿ, ನೀರು ಕುಡಿಯುತ್ತಿದ್ದ ಅಪ್ಪನ ಮಡಿಲಲ್ಲಿ ಕೂತ ಮಗಳು ಮತ್ತೆ ಪ್ರಶ್ನಿಸಿದಳು,
  ಅಪ್ಪ, ಏನು ಗಿಫ್ಟ್ ಕೊಡುತ್ತೀರಿ?
ಅಪ್ಪ ಮಗಳನ್ನೇ ನೋಡಿದರು. ಆಸ್ಪತ್ರೆಯ ಮಂಚದಲ್ಲಿ ಸಾವು-ಬದುಕಿನ ಹೋರಾಟದಲ್ಲಿ ಅಸಾಧ್ಯ ಸಂಕಟ ಅನುಭವಿಸುತ್ತಿದ್ದ ಮಗಳನ್ನು ನೋಡಲಾರದೇ ಕಣ್ಣೀರಿಳಿಸಿದ್ದು, ನಿದ್ದೆಯಿಲ್ಲದ ರಾತ್ರಿಗಳನ್ನು ಕಳೆದದ್ದು, ಸಿಕ್ಕ-ಸಿಕ್ಕ ವೈದ್ಯರನ್ನು ಸಂಪರ್ಕಿಸಿದ್ದು, ಪ್ರಾರ್ಥಿಸಿದ್ದು.. ಎಲ್ಲವೂ ನೆನಪಿಗೆ ಬಂತು. ಅವರು ಮಗಳನ್ನು ಸಂತೈಸುತ್ತಾ ಹೇಳಿದರು,
  ನಿನಗೆ ಈಗಾಗಲೇ ದೊಡ್ಡದೊಂದು ಗಿಫ್ಟ್ ಕೊಟ್ಟಿದ್ದೇನೆ ಮಗೂ.
  ಏನಪ್ಪ ಅದು?
  ಕಿಡ್ನಿ
  ಕಿಡ್ನಿಯಾ? ಎಲ್ಲಿದೆ ಅದು?
  ನಿನ್ನ ಹೊಟ್ಟೆಯೊಳಗಿದೆ ಪುಟ್ಟಿ
  ಹೋಗಪ್ಪ ನೀನು. ಹೊಟ್ಟೆಯೊಳಗಿಟ್ಟು ಏನು ಪ್ರಯೋಜನ? ನೀನೇ ಅದನ್ನು ತಗೊ. ನನಗೆ ಬೇರೆಯದೇ ಗಿಫ್ಟ್ ಕೊಡಪ್ಪಾ..
  ಅವರು ಮೃದುವಾಗಿ ನಕ್ಕು ಮಗಳನ್ನು ಎತ್ತಿಕೊಂಡರು. ಮುತ್ತು ಕೊಟ್ಟರು. ಕಣ್ಣು ಮಂಜಾಗುತ್ತಿತ್ತು.

ಸೋನಂ

   ಅಪ್ಪ-ಮಕ್ಕಳ ನಡುವಿನ ಸಂಬಂಧ, ಮಕ್ಕಳ ಬೆಳವಣಿಗೆಯಲ್ಲಿ ಯಾರ ಪಾತ್ರ ಮೇಲು- ಅಪ್ಪನದ್ದೋ  ಅಮ್ಮನದ್ದೋ ಎಂಬೆಲ್ಲಾ ಚರ್ಚೆಗಳು ಈ ಸಮಾಜದಲ್ಲಿ ಧಾರಾಳ ನಡೆದಿವೆ. ಹೆಚ್ಚಿನ ಚರ್ಚೆಗಳ ಕೇಂದ್ರ ಬಿಂದು ಅಮ್ಮನೇ. ಅಮ್ಮನ ಪಾತ್ರವನ್ನೇ ಮುಖ್ಯ ವಾಗಿಸಿ, ‘ಅಮ್ಮ ಹೇಗಿರುತ್ತಾಳೋ ಹಾಗೆಯೇ ಮಕ್ಕಳು' ಎಂಬಲ್ಲಿಗೆ ಹೆಚ್ಚಿನ ಚರ್ಚೆಗಳು ಮುಕ್ತಾಯಗೊಳ್ಳುತ್ತವೆ. ಇದು ತಪ್ಪು ಎಂದಲ್ಲ. ಆದರೆ, ಕಿಡ್ನಿ ಕೊಟ್ಟೂ ಅದರ ಮಹತ್ವವನ್ನು ಮನದಟ್ಟಾಗಿಸಲು ಚಡಪಡಿಸುವ, ಒತ್ತಿ ಬರುವ ಕಣ್ಣೀರನ್ನು ಮುಖ ತೊಳೆದೊ, ನೆಪ ಹೇಳಿಯೋ ಅಡಗಿಸುವ, ಮಕ್ಕಳಿಗೆ ಪತ್ನಿ ಏಟು ಕೊಡುತ್ತಿದ್ದರೆ ಒಳಗೊಳಗೇ ಕರುಬುವ ಅಪ್ಪ.. ಚರ್ಚೆಯ ವ್ಯಾಪ್ತಿಗೆ ಬರುವುದೇ ಕಡಿಮೆ. ಅಮ್ಮನಿಗೆ ಕಣ್ಣೀರಿಳಿಸಲು ಬರುತ್ತದೆ; ತನ್ನ ಭಾವನೆಗಳನ್ನು ಎಲ್ಲರೆದುರು ವ್ಯಕ್ತಪಡಿಸುವುದಕ್ಕೂ ಆಗುತ್ತದೆ. ಆದರೆ, ಅಪ್ಪ ಈ ವಿಷಯಗಳಲ್ಲಿ ತೀರಾ ಕಂಜೂಸು. ಕಣ್ಣೀರಿಳಿಸಲು ಬರುತ್ತದಾದರೂ ಎಲ್ಲರೆದುರು ಕಣ್ಣೀರಿಳಿಸುವುದಕ್ಕೆ, ಮಕ್ಕಳ ಮೇಲಿನ ಪ್ರೀತಿಯನ್ನು ಬಹಿರಂಗವಾಗಿ ಅಷ್ಟೇ ತೀವ್ರತನದಿಂದ ವ್ಯಕ್ತಪಡಿಸುವುದಕ್ಕೆ ಆತನಿಗೆ ಬರುವುದಿಲ್ಲ. ಸ್ನಾನ ಗೃಹದಲ್ಲಿ, ಕತ್ತಲ ಕೋಣೆಯಲ್ಲಿ ಒಂಟಿಯಾಗಿ ಕಣ್ಣೀರಿಳಿಸಿ, ಹೊರಗೆ ಆತ ನಗು ನಗುತ್ತಾ ಬದುಕುತ್ತಾನೆ. ಈ ದೌರ್ಬಲ್ಯವೇ ಆತನನ್ನು ‘ಅಮುಖ್ಯ' ವ್ಯಕ್ತಿಯಾಗಿ ಪರಿಗಣಿಸುವುದಕ್ಕೆ ಮುಖ್ಯ ಕಾರಣವಾಗಿದೆ. ಇಷ್ಟಕ್ಕೂ, ಟಿ.ವಿ. ಜಾಹೀರಾತಿನಲ್ಲಿ ಬರುವ ಸೂಪರ್ ವೇಗದಲ್ಲಿ ಓಡುವ ಬೈಕನ್ನು ತೋರಿಸಿ, ‘ನೀನು ಹಾಗೆ ಓಡಿಸಬಲ್ಲೆಯಾ..’ ಎಂದು ಮಕ್ಕಳು ಕೇಳುವುದು ಅಪ್ಪನಲ್ಲೇ. ಸೂಪರ್‍ಮ್ಯಾನ್, ಸ್ಪೈಡರ್‍ಮ್ಯಾನ್‍ಗಳನ್ನೆಲ್ಲಾ ಯಾವ ಮಕ್ಕಳೇ ಆದರೂ ತಾಯಿಗೆ ಹೋಲಿಸಿ ನೋಡುತ್ತಾರಾ? ಮುಖ್ಯವಾಗಿ, ಹೆಣ್ಣು ಮಕ್ಕಳ ಪಾಲಿಗೆ ಅಪ್ಪ ಯಾವಾಗಲೂ ಹೀರೋನೇ. ಶಾಲೆಗೆ ಹೋಗುವ ಪುಟ್ಟ ಮಕ್ಕಳು ಪರಸ್ಪರ ತಂದೆಯಂದಿರನ್ನು ಹೋಲಿಸಿಕೊಂಡು ಜಗಳ ಮಾಡುತ್ತಾರೆ. ನನ್ನ ಅಪ್ಪ ಅಷ್ಟು ಸ್ಪೀಡ್ ಬೈಕ್ ಓಡಿಸ್ತಾರೆ, ನನ್ನ ಅಪ್ಪನಲ್ಲಿ ಅಂಥ ಕಾರಿದೆ, ನನ್ನ ಅಪ್ಪ ಅಷ್ಟು ಎತ್ತರ ಇದ್ದಾರೆ, ಅವರು ಹಾಗೆ, ಅವರು ಹೀಗೆ.. ಎಂದೆಲ್ಲಾ ಹೆಮ್ಮೆ ಪಟ್ಟುಕೊಳ್ಳುತ್ತಾರೆ. ಇಂಥ ಸಂದರ್ಭಗಳಲ್ಲೆಲ್ಲಾ ತಾಯಿಯ ಪ್ರಸ್ತಾಪವಾಗುವುದು ಕಡಿಮೆ. ಹಾಗಂತ ತಾಯಿ ಅಮುಖ್ಯ ಎಂದಲ್ಲ. ತಾಯಿ ಯಾವಾಗಲೂ ತಾಯಿಯೇ. ಅಪ್ಪ ಆಕೆಯನ್ನು ಸರಿಗಟ್ಟಲಾರ. ಆದರೂ, ಮಕ್ಕಳ ಪಾಲಿಗೆ ಹೀರೋ ಪಾತ್ರವೊಂದರ ಅಗತ್ಯವಿರುತ್ತದೆ. ಯಾವಾಗಲೂ ಮಕ್ಕಳು ತಾಯಿಯನ್ನು ಅತಿಯಾಗಿ ಅವಲಂಬಿಸುವುದಾದರೂ ತಂದೆಯ ವರ್ಚಸ್ಸನ್ನು ಪಡೆದುಕೊಳ್ಳಲು ಹಂಬಲಿಸುತ್ತವೆ. ಅದರಲ್ಲೂ ಹೆಣ್ಣು ಮಕ್ಕಳು ತಂದೆಯಿಂದ ಹೆಚ್ಚು ಪ್ರಭಾವಿತವಾಗುತ್ತವೆ. ತಂದೆಗೆ ಮನೆಯಲ್ಲಿ ಸಿಗುವ ಗೌರವ, ಉಪಚಾರ, ಅವರ ಮಾತಿಗಿರುವ ಮನ್ನಣೆಗಳನ್ನೆಲ್ಲಾ ಮಗು ಅತ್ಯಂತ ಆಸಕ್ತಿಯಿಂದ ಅಭ್ಯಸಿಸುತ್ತದೆ. ಅಪ್ಪ ಮಾತಾಡುವ ಶೈಲಿಯಲ್ಲಲ್ಲ ಅಮ್ಮ ಮಾತಾಡುವುದು. ಬೈಕಲ್ಲಿ ಝುಯ್ಯನೆ ಹೋಗಿ ಇಷ್ಟದ ವಸ್ತುಗಳನ್ನು ತಂದುಕೊಡುವುದು ಅಪ್ಪನೇ ಹೊರತು ಅಮ್ಮನಲ್ಲ. ಪೇಟೆಗೆ ಹೋದರೂ ಅಪ್ಪನದ್ದೇ ಕಾರುಬಾರು. ಒಂದು ರೀತಿಯಲ್ಲಿ ದೈಹಿಕವಾಗಿ, ಭಾವನಾತ್ಮಕವಾಗಿ, ಆಧ್ಯಾತ್ಮಿಕವಾಗಿ ಅಪ್ಪನನ್ನು ತುಂಬಿ ಕೊಂಡೇ ಮಕ್ಕಳು ಬೆಳೆಯುತ್ತವೆ. ಆದ್ದರಿಂದಲೇ ಇವತ್ತಿನ ದಿನಗಳಲ್ಲಿ ಮಾಧ್ಯಮ ಸುದ್ದಿಗಳನ್ನು ಓದುವಾಗ ಆಘಾತವಾಗುವುದು, ಹತ್ತು-ಹಲವು ಪ್ರಶ್ನೆಗಳು ಮೂಡುವುದು.
    ಆತ್ಮಹತ್ಯೆಯ ಸುದ್ದಿಯನ್ನು ಕೇಳದ, ಓದದ ಒಂದೇ ಒಂದು ದಿನವಾದರೂ ಇವತ್ತಿದೆಯೇ? ಮುಖ್ಯವಾಗಿ ಹೆಣ್ಣು ಮಕ್ಕಳು ಆತ್ಮಹತ್ಯೆಗೆ ಶರಣಾಗುವ ಸುದ್ದಿಗಳು ಎಷ್ಟಿಲ್ಲ ಹೇಳಿ? ಕೊಲೆಗಾರ ಯುವಕರೂ ಧಾರಾಳ ಇದ್ದಾರಲ್ಲವೇ? ಎಲ್ಲೋ ದೂರದಲ್ಲಿ ಉನ್ನತ ವಿದ್ಯಾಭ್ಯಾಸಕ್ಕೆಂದು ಹೋದ ಮಗಳು ಕೊಲೆಗೀಡಾಗಿಯೋ ಸ್ವಯಂ ಜೀವ ಕಳಕೊಂಡೋ ಸುದ್ದಿ ಮಾಡುತ್ತಿರುವುದು ಇವತ್ತಿನ ದಿನಗಳಲ್ಲಿ ಮಾಮೂಲಿ ಆಗುತ್ತಿರುವುದೇಕೆ? ಅದಕ್ಕೆ ಲವ್ ಅಫೇರು, ಅದು-ಇದುಗಳನ್ನು ಕಾರಣವಾಗಿ ಕೊಡಬಹುದಾದರೂ ಅವು ಸಾಯುವಷ್ಟು ಮತ್ತು ಸಾಯಿಸುವಷ್ಟು ಭೀಕರ ಅಪರಾಧಗಳೇ? ಅಷ್ಟಕ್ಕೂ ‘ಸಾಯುವ' ಮನಸ್ಥಿತಿಯನ್ನು ಮಕ್ಕಳಲ್ಲಿ ತುಂಬಿದ ಪ್ರಚೋದನೆಗಳು ಯಾವುದಿರಬಹುದು? ಅವರನ್ನು ಅಷ್ಟು ಕಟು ತೀರ್ಮಾನಕ್ಕೆ ದೂಡುವಲ್ಲಿ ಅವರು ಬಾಲ್ಯದಲ್ಲಿ ಕಂಡುಂಡ ಸಂಗತಿಗಳು ಕಾರಣವಾಗಿರಬಹುದೇ? ಮನೆಯ ವಾತಾವರಣ, ಹೆತ್ತವರ ವರ್ತನೆಗಳು ಒಂದು ಹಂತದ ವರೆಗೆ ಮಕ್ಕಳ ನಿರ್ಧಾರದ ಮೇಲೆ ಪ್ರಭಾವ ಬೀರಿರಬಹುದೇ?
   ನಿಜವಾಗಿ, ಓರ್ವ ಹೆಣ್ಣು ಮಗಳಿಗೆ ‘ಗಂಡಿನ' ಪರಿಚಯ ಆಗುವುದೇ ತಂದೆಯಿಂದ. ಹಾಗೆಯೇ ಹೆಣ್ಣಿನ ಪರಿಚಯ ಆಗುವುದು ತಾಯಿಯಿಂದ. ಹೆಣ್ಣು ಅಂದರೆ ಹೀಗಿರಬೇಕು ಮತ್ತು ಗಂಡು ಅಂದರೆ ಹೀಗಿರಬೇಕು ಅನ್ನುವುದನ್ನು ಇವರಿಬ್ಬರ ಮಾತು, ವರ್ತನೆ, ನಗು, ತಮಾಷೆ, ಭಾವ-ಭಂಗಿಗಳಿಂದ ಹೆಣ್ಣು ಮಗು ಕಲಿತುಕೊಳ್ಳಲು ಪ್ರಾರಂಭಿಸುತ್ತದೆ. ಅಪ್ಪ ಮನೆಯಲ್ಲಿ ಪಾಸಿಟಿವ್ ಆಗಿದ್ದರೆ ಮಗಳು ಪಾಸಿಟಿವ್ ಆಗುತ್ತಾಳೆ. ಅಮ್ಮನಿಗಿಂತ ಹೆಚ್ಚು ಆಸಕ್ತಿಯಿಂದ ಅಪ್ಪನನ್ನು ನೋಡುವ ಮಗಳಿಗೆ ಅಪ್ಪ ದೊಡ್ಡದೊಂದು ರೋಲ್ ಮಾಡೆಲ್. ಅಪ್ಪ ಸಿಡುಕನಾದರೆ, ಕ್ರಮೇಣ ಮಗಳೂ ಸಿಡುಕುತನವನ್ನು ಅಳವಡಿಸಿಕೊಳ್ಳುತ್ತಾಳೆ. ಅಪ್ಪ ಸುಳ್ಳುಗಾರನಾದರೆ, ಮಗಳಿಗೂ ಅದು ಅಂಟಿಕೊಂಡುಬಿಡುತ್ತದೆ. ಸದಾ ಸಂಶಯ ಸ್ವಭಾವದ ಅಪ್ಪನಿಂದ ಮಗಳು ಕಲಿತುಕೊಳ್ಳುವುದು ಅನುಮಾನಗಳನ್ನೇ. ಅಪ್ಪನಲ್ಲಿ ಯಾವ ಕ್ವಾಲಿಟಿಯಿದೆಯೋ ಅದು ಮಗನಿಗಿಂತ ಹೆಚ್ಚು ವರ್ಗಾವಣೆಯಾಗುವುದು ಮಗಳಿಗೆ. ಆದ್ದರಿಂದಲೇ, ವಿವಾಹ ವಿಚ್ಛೇದನಗಳಲ್ಲಿ, ಆತ್ಮಹತ್ಯೆಗಳಲ್ಲಿ, ಇನ್ನಿತರ ಅನಾಹುತಕಾರಿ ನಿರ್ಧಾರಗಳಲ್ಲಿ ಹೆಣ್ಣಿನ ಪಾತ್ರ ಏನಿದೆಯೋ ಅವುಗಳ ಮೇಲೆ ತಂದೆಯ ಪ್ರಭಾವವಿರುತ್ತದೆ ಎಂದು ಮನಃಶಾಸ್ತ್ರಜ್ಞರು ಹೇಳುವುದು. ಹೆಣ್ಣು ದಿಢೀರ್ ನಿರ್ಧಾರ ಕೈಗೊಳ್ಳುವ, ಮುಂಗೋಪದ ಮನಸ್ಥಿತಿಯವಳಾಗಿದ್ದರೆ ಅದಕ್ಕೆ ಆಕೆಯಷ್ಟೇ ಕಾರಣ ಅಲ್ಲ, ಬಾಲ್ಯದಲ್ಲಿ ಆಕೆಯ ‘ಅಪ್ಪ' ನಿರ್ವಹಿಸಿದ ಪಾತ್ರವೂ ಕಾರಣವಾಗಿರುತ್ತದೆ. ಅನೇಕ ಬಾರಿ, ‘ನೀನೇಕೆ ಗಂಡು ಮಕ್ಕಳಂತೆ ವರ್ತಿಸುತ್ತಿ..' ಎಂದು ಹೆತ್ತವರು ಮಗಳನ್ನು ತರಾಟೆಗೆ ಎತ್ತಿಕೊಳ್ಳುವುದಿದೆ. ‘ಹೆಣ್ಣು ಹೆಣ್ಣಿನಂತೆ ಇರಬೇಕು' ಎಂಬ ಬುದ್ಧಿವಾದವೂ ಇರುತ್ತದೆ. ನಿಜವಾಗಿ, ಹೆಣ್ಣು ಗಂಡಿನಂತೆ ವರ್ತಿಸುವುದಕ್ಕೆ ಕಾರಣ, ಗಂಡು ಎಂಬ ಅಪ್ಪ ಆಕೆಯನ್ನು ಪ್ರಭಾವಿಸಿದ್ದು. ಇಷ್ಟಕ್ಕೂ, ಯಾವ ಮಕ್ಕಳೂ ದಿಢೀರ್ ಆಗಿ ಬೆಳೆಯುವುದಿಲ್ಲವಲ್ಲ. ಹೆಣ್ಣು ಮಕ್ಕಳಾಗಲಿ, ಗಂಡು ಮಕ್ಕಳಾಗಲಿ ಅಮ್ಮ-ಅಪ್ಪ ಎಂಬ ಹೆಣ್ಣು-ಗಂಡನ್ನು ನೋಡುತ್ತಾ, ಅಭ್ಯಸಿಸುತ್ತಾ ಬೆಳೆಯುತ್ತಾರೆ. ಮನೆಯಲ್ಲಿ ಅಪ್ಪನ ಚಟುವಟಿಕೆಗಳನ್ನು ಹತ್ತಿರದಿಂದ ವೀಕ್ಷಿಸುತ್ತಾರೆ. ಅಮ್ಮ ಎಂಬ ಹೆಣ್ಣು- ಮಕ್ಕಳ ಚಾಕರಿ ಮಾಡುತ್ತಾ, ಅಡುಗೆ ಮಾಡುತ್ತಾ, ಬಟ್ಟೆ ಒಗೆಯುತ್ತಾ, ನೆಲ ಗುಡಿಸುತ್ತಾ, ಪಾತ್ರೆ ತೊಳೆಯುತ್ತಾ, ಇಸ್ತ್ರಿ ಹಾಕುತ್ತಾ.. ಹೀಗೆ ತನ್ನನ್ನು ಗುರುತಿಸಿಕೊಳ್ಳುವಾಗ ಅಪ್ಪ ಎಂಬ ಗಂಡು ಅದಕ್ಕೆ ಭಿನ್ನವಾಗಿ ಗುರುತಿಸಿಕೊಳ್ಳುತ್ತಾನೆ. ಆತನದು ನೀಟಾಗಿ ಪ್ಯಾಂಟು ಧರಿಸುವ, ಸಂಜೆ ಮನೆಗೆ ಬಂದು ಯಜಮಾನಿಕೆ ಪ್ರದರ್ಶಿಸುವ, ಸೇವೆ ಮಾಡಿಸಿಕೊಳ್ಳುವ.. ಪಾತ್ರ. ಹೀಗಿರುವಾಗ ಮಕ್ಕಳ ಮೇಲೆ ಅಪ್ಪ ಎಂಬ ಈ ಗಂಡಿನ ಪಾತ್ರ ಪ್ರಭಾವ ಬೀರದೆಂದು ಹೇಗೆ ಹೇಳುವುದು? ಮಕ್ಕಳಿಗೆ ಒಂದೊಮ್ಮೆ ಆಯ್ಕೆಯ ಅವಕಾಶ ಕೊಟ್ಟರೆ, ಅವರು ಪಾತ್ರೆ ತೊಳೆಯುವ ಪಾತ್ರಕ್ಕಿಂತ ಯಜಮಾನಿಕೆ ಪ್ರದರ್ಶಿಸುವ ಪಾತ್ರವನ್ನೇ ಆಯ್ದುಕೊಳ್ಳಲಾರರೇ? ಒಂದು ರೀತಿಯಲ್ಲಿ ಹೆಣ್ಣು ಮತ್ತು ಗಂಡಿನ ತಪ್ಪಾದ ಇಮೇಜನ್ನು ಅಮ್ಮ ಮತ್ತು ಅಪ್ಪ ಮನೆಯಲ್ಲಿ ದಿನಂಪ್ರತಿ ಮಕ್ಕಳಿಗೆ ನೀಡುತ್ತಿರುವಾಗ, ಮಕ್ಕಳು ಅದರಿಂದ ಪ್ರಭಾವಿತವಾಗಬಾರದೆಂದು ಬಯಸುವುದಕ್ಕೆ ಏನರ್ಥವಿದೆ? ಅಪ್ಪ ಎಂಬ ಗಂಡು ಅಮ್ಮ ಎಂಬ ಹೆಣ್ಣನ್ನು ದ್ವಿತೀಯ ದರ್ಜೆಗೆ ಇಳಿಸದೇ ಇದ್ದರೆ, ಮನೆ ಗೆಲಸದಲ್ಲಿ ತಾನೂ ಭಾಗಿಯಾದರೆ, ಯಜಮಾನಿಕೆಯ ದರ್ಪವನ್ನು ಕೈಬಿಟ್ಟು ಬದುಕಿದರೆ, ಪಾತ್ರೆ ತೊಳೆಯುವ, ಮನೆ ಗುಡಿಸುವ ಕೆಲಸಗಳನ್ನು ತಾನೂ ನಿರ್ವಹಿಸಿದರೆ.. ಪತ್ನಿ ಸಂತೃಪ್ತಳಾಗುವುದಷ್ಟೇ ಅಲ್ಲ, ಮಕ್ಕಳೂ ಸಂತುಲಿತವಾಗಿ ಬೆಳೆಯುತ್ತಾರೆ. ಬೆಳೆದ ಮಗಳು ದುಡುಕಿದಳೆಂದೋ ತಪ್ಪು ಹೆಜ್ಜೆ ಇಟ್ಟಳೆಂದೋ ಮನೆ ಬಿಟ್ಟಳೆಂದೋ ದೂರುವ ಮೊದಲು, ಆಕೆಯ ಬಾಲ್ಯ ಹೇಗಿತ್ತೆಂಬುದರ ಬಗ್ಗೆ ಪ್ರತಿ ಹೆತ್ತವರೂ ಅವಲೋಕನ ನಡೆಸಬೇಕು. ಬಾಲ್ಯದಲ್ಲಿ ಅಪ್ಪನ ಪಾತ್ರ ದುಡುಕಿನದ್ದಾದರೆ, ಜೋರು ಮಾಡಿ ಬಾಯಿ ಮುಚ್ಚಿಸುವ ರೂಪದ್ದಾದರೆ, ಔಟ್ ಗೋಯಿಂಗ್ ಮಾತ್ರ ಎಂಬ ರೀತಿಯದ್ದಾದರೆ, ಅದರ ಪ್ರಭಾವ ಮಕ್ಕಳ ಮೇಲೆ ಬಿದ್ದಿರುವುದಕ್ಕೆ ಖಂಡಿತ ಸಾಧ್ಯವಿದೆ. ಮಕ್ಕಳು ಕೀಳರಿಮೆ, ನಿರುತ್ಸಾಹಿ, ಪರಾವಲಂಬನೆಯವರಾಗಿದ್ದರೆ, ಅದರಲ್ಲಿ ಅವರ ಬಾಲ್ಯದ ಮಾದರಿಗಳ ಪಾತ್ರ ದೊಡ್ಡದಿದೆ ಎಂದೇ ಅರ್ಥ. ಅಂದಹಾಗೆ, ಪ್ರವಾದಿ ಮುಹಮ್ಮದ್(ಸ) ಎಂಬ ಗಂಡು ನಿರ್ವಹಿಸಿದ ಮಾದರಿ ಅಪ್ಪನ ಪಾತ್ರ ದಿಂದಾಗಿಯೇ ಅಲ್ಲವೇ ಫಾತಿಮಾ(ರ) ಎಂಬ ಮಾದರಿ ಹೆಣ್ಣು ಮಗಳು ಸಮಾಜಕ್ಕೆ ದಕ್ಕಿದ್ದು? ಮುಹಮ್ಮದುಲ್ ಗಝ್ಝಾಲಿ ಎಂಬ ಅಪ್ಪನ ಮಾದರಿ ವ್ಯಕ್ತಿತ್ವವಲ್ಲದಿದ್ದರೆ ಝೈನಬುಲ್ ಗಝ್ಝಾಲಿ ಎಂಬ ಧೀರ ಮಹಿಳೆ ಸೃಷ್ಟಿಯಾಗಲು ಸಾಧ್ಯವಿತ್ತೇ?
  
ಲವ್‍ನ ಕಾರಣಕ್ಕಾಗಿ ಮಾರ್ಚ್ 28ರಂದು ಸೋನಂ ಎಂಬ ಕಾಲೇಜು ತರುಣಿಯನ್ನು ತೀರ್ಥಹಳ್ಳಿಯ ನಡುಬೀದಿಯಲ್ಲಿ ವಿದ್ಯಾರ್ಥಿ ಗಳೆದುರೇ ಇರಿದು ಕೊಂದು ತಾನೂ ಆತ್ಮಹತ್ಯೆಗೆ ಪ್ರಯತ್ನಿಸಿದ ಯುವಕನ ಸುದ್ದಿಯನ್ನು ಓದುತ್ತಾ ಇವೆಲ್ಲ ನೆನಪಾಯಿತು..

ಪೊಲೀಸ್ ಠಾಣೆಯಲ್ಲಿರುವ ಎತ್ತು ತಪ್ಪಿಸಿಕೊಳ್ಳದಂತೆ ನೋಡಿಕೊಳ್ಳಿ..

   ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಬಿಜೆಪಿಯು ತನ್ನ ಭದ್ರ ನೆಲೆಗಳಾದ ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಗಳಲ್ಲಿ ಸಂಪೂರ್ಣವಾಗಿ ನೆಲ ಕಚ್ಚಿದ್ದೇಕೆ ಎಂಬ ಪ್ರಶ್ನೆಗೆ; ಕಲ್ಲಡ್ಕ ಪ್ರಭಾಕರ ಭಟ್ಟರ ಸರ್ವಾಧಿಕಾರಿ ನಿಲುವು, ಬಿಜೆಪಿಯ ಒಳಜಗಳ, ಭ್ರಷ್ಟಾಚಾರ, ಯಡಿಯೂರಪ್ಪ ಫ್ಯಾಕ್ಟರ್.. ಮುಂತಾದ ಕಾರಣಗಳನ್ನು ಕೊಡುತ್ತಾ ಹೋದರೆ ಈ ಜಿಲ್ಲೆಗಳ ಸಾಮಾನ್ಯ ಮಂದಿ ಸುಮ್ಮನೆ ನಗುತ್ತಾರೆ. ಯಾಕೆಂದರೆ, ಇವನ್ನೆಲ್ಲಾ ಕಾರಣ ಎಂದು ಅವರು ಒಪ್ಪುವುದೇ ಇಲ್ಲ. ಅವರು ಕೊಡುವ ಕಾರಣವೇ ಬೇರೆ,
   ಕೋಮುಗಲಭೆ ಆಗಿಲ್ಲ..
  ಬಿಜೆಪಿ-ಜೆಡಿಎಸ್ ಸಮ್ಮಿಶ್ರ ಸರಕಾರ ರಾಜ್ಯವನ್ನಾಳುತ್ತಿದ್ದ ಸಂದರ್ಭ. 2006 ಅಕ್ಟೋಬರ್ 5ರಂದು ಮಂಗಳೂರು ಬಂದ್‍ಗೆ ಸಂಘಪರಿವಾರ ಕರೆ ಕೊಡುತ್ತದೆ. ಅಕ್ರಮವಾಗಿ ಗೋಸಾಗಾಟ ನಡೆಸುತ್ತಿದ್ದ ಕ್ವಾಲಿಸ್ ವಾಹನವೊಂದನ್ನು ಮಂಗಳೂರಿನ ಸಂಘಪರಿವಾರದ ಕಾರ್ಯಕರ್ತರು ಬೆನ್ನಟ್ಟಿದಾಗ ಅದು ಮಹಿಳೆಗೆ ಢಿಕ್ಕಿ ಹೊಡೆದು, ಗಂಭೀರವಾಗಿ ಗಾಯಗೊಳಿಸಿ ಪರಾರಿಯಾಗಿದೆ ಅನ್ನುವ ಕಾರಣಕ್ಕಾಗಿ ಬಂದ್‍ಗೆ ಕರೆ ಕೊಡಲಾಗಿತ್ತು. ಶಶಿಧರ್ ಭಟ್ ಅನ್ನುವ ವ್ಯಕ್ತಿ ಸಾವಿಗೀಡಾಗಿದ್ದಾರೆ ಅನ್ನುವ ಸುದ್ದಿಯನ್ನು ಪತ್ರಿಕೆಯೊಂದು ಇದೇ ಸಂದರ್ಭದಲ್ಲಿ ತೇಲಿ ಬಿಟ್ಟಿತ್ತು. ನಿಜವಾಗಿ, ಮಹಿಳೆಗೆ ಢಿಕ್ಕಿ ಹೊಡೆದದ್ದಾಗಲಿ, ಭಟ್ ಸಾವಿಗೀಡಾದದ್ದಾಗಲಿ ನಡೆದೇ ಇಲ್ಲ ಎಂದು ಅಕ್ಟೋಬರ್ 5ರಂದು ಜಿಲ್ಲಾ  ಎಸ್.ಪಿ.ಯವರು ಮಾಧ್ಯಮದೆದುರು ಘೋಷಿಸಿದರೂ ದೊಂಬಿ ಜಿಲ್ಲೆಯನ್ನಿಡೀ ಆವರಿಸಿಬಿಟ್ಟಿತ್ತು. ತೊಕ್ಕೊಟ್ಟು, ಸುರತ್ಕಲ್, ನಂತೂರು, ಫರಂಗಿಪೇಟೆ, ಕಣ್ಣೂರು, ಕೃಷ್ಣಾಪುರ, ಬಿ.ಸಿ. ರೋಡ್, ಸಿದ್ಧಕಟ್ಟೆ, ಮೆಲ್ಕಾರ್, ಕಲ್ಲಡ್ಕ.. ಮುಂತಾದ ಹತ್ತಾರು ಪ್ರದೇಶಗಳು ಹೊತ್ತಿ ಉರಿದುವು. ಅಬ್ದುಲ್ ಗಫೂರ್ ಮದನಿ ಮತ್ತು ಇಬ್ರಾಹೀಮ್ ಬೋಳಿಯಾರ್ ಎಂಬಿಬ್ಬರನ್ನು ಇರಿದು ಕೊಲ್ಲಲಾಯಿತು. ಮುಸ್ಲಿಮರ ಅಂಗಡಿ-ಮುಂಗಟ್ಟುಗಳು ಅತ್ಯಂತ ಯೋಜಿತ ರೀತಿಯಲ್ಲಿ ಆಕ್ರಮಣಕ್ಕೆ ತುತ್ತಾದುವು. ಮುಂದಿನ ಐದಾರು ವರ್ಷಗಳ ವರೆಗೆ ಮುಸ್ಲಿಮರು ಆರ್ಥಿಕವಾಗಿ ತಲೆ ಎತ್ತದಂಥ ‘ಪಾಠ ಕಲಿಸಿ' ಬಂದ್ ಕೊನೆಗೊಂಡಿತು. ಮುಂದಿನ ಒಂದು ವರ್ಷದ ಅವಧಿಯಲ್ಲಿ (2008) ವಿಧಾನ ಸಭೆಗೆ ಚುನಾವಣೆ ಘೋಷಣೆಯಾದಾಗ ಈ ಗಲಭೆಯ ಕಾವು ಇನ್ನೂ ಆರಿರಲಿಲ್ಲ. ಒಂದು ಹಂತದ ವರೆಗೆ ‘ಗಲಭೆಯ ವಾತಾವರಣವನ್ನು' ಉಳಿಸಿಕೊಳ್ಳುವುದಕ್ಕೆ ಬಿಜೆಪಿ ಯಶಸ್ವಿಯಾಗಿತ್ತು. ಇಲ್ಲದಿದ್ದರೆ ಮಲ್ಲಿಕಾ ಪ್ರಸಾದ್ ಎಂಬ ‘ಅಡುಗೆಮ್ಮ’ ಪುತ್ತೂರಿನಿಂದ ಗೆದ್ದು ಬರಲು ಸಾಧ್ಯವಿತ್ತೇ? ವಿಧಾನಸಭೆಗೆ ಆಯ್ಕೆಯಾದ ಮಹಿಳಾ ಜನಪ್ರತಿನಿಧಿಗಳಲ್ಲೇ ಅತ್ಯಂತ ಹೆಚ್ಚು ಚಟುವಟಿಕೆಯಿಂದಿದ್ದ, ಕ್ಷೇತ್ರದ ಸಮಸ್ಯೆಯನ್ನು ವಿಧಾನಸಭೆಯಲ್ಲಿ ಪ್ರಸ್ತಾಪಿಸಿ ಸದಾ ಗಮನ ಸೆಳೆಯುತ್ತಿದ್ದ ಮಾತುಗಾರ್ತಿ, ಶಕುಂತಳಾ ಶೆಟ್ಟಿಯೆದುರು ಮಾತೇ ಬಾರದ ಮಲ್ಲಿಕಾ ಗೆಲ್ಲುವುದೆಂದರೇನು? ಹಾಲಿ ಶಾಸಕಿಯಾಗಿದ್ದ ಶಕುಂತಳಾರಿಗೆ ಬಿಜೆಪಿ ಟಿಕೇಟು ನಿರಾಕರಿಸಿದಾಗ ಅವರು ಬಂಡಾಯವೆದ್ದಿದ್ದರು. ನಿಜವಾಗಿ, ಇಲ್ಲಿನ ಸಮಸ್ಯೆ ಬಂಡಾಯವಲ್ಲ. ಈ ಜಿಲ್ಲೆಗಳಲ್ಲಿ ಒಂದು ‘ಎಲೆಕ್ಟ್ರಿಕ್ ಕಂಭ' ಅಭ್ಯರ್ಥಿಯಾಗಿ ನಿಂತರೂ ಗೆಲುವು ಶತಸಿದ್ಧ ಅನ್ನುವ ವಾತಾವರಣ ವೊಂದನ್ನು ಕಟ್ಟಿ ಬೆಳೆಸುವಲ್ಲಿ ಬಿಜೆಪಿ ಇಂದು ಯಶಸ್ವಿಯಾಗಿದೆ. ಅದಕ್ಕೆ ಪೂರಕವಾಗಿ ಕೋಮುಗಲಭೆಗಳನ್ನು ‘ಉತ್ಪಾದಿಸಲಾಗುತ್ತದೆ’.
   2013 ಮಾರ್ಚ್ 19
  ಉಡುಪಿ ಜಿಲ್ಲೆಯ ಅಡ್ಡಬೆಂಗ್ರೆಯಲ್ಲಿ ಜಾವೀದ್ ಎಂಬವರ ಮನೆಯಿದೆ. ಅವರೇನೂ ಗೋ ವ್ಯಾಪಾರಿಯಲ್ಲ. ರಿಯಲ್ ಎಸ್ಟೇಟ್ ಮತ್ತು ವಾಹನ ವ್ಯಾಪಾರದಲ್ಲಿ ತೊಡಗಿಸಿಕೊಂಡಿರುವ ಅವರ ಮನೆಗೆ ಮೊನ್ನೆ ಮಾರ್ಚ್ 19ರಂದು ಸಂಜೆ ಸಂಘಪರಿವಾರದ ಸುಮಾರು 60-70ರಷ್ಟು ಮಂದಿ ಪೊಲೀಸರ ಜೊತೆ ಬಂದರಲ್ಲದೇ, ಮನೆಯಲ್ಲಿದ್ದ ಒಂದೂವರೆ ವರ್ಷದ ಎತ್ತನ್ನು ಠಾಣೆಗೆ ಎತ್ತಿಕೊಂಡು ಹೋದರು. ಅಕ್ರಮ ಗೋಸಾಗಾಟದಲ್ಲಿ ಜಾವೀದ್ ಭಾಗಿಯಾಗಿದ್ದಾರೆ ಅನ್ನುವ ವದಂತಿಯನ್ನು ಅದರ ಜೊತೆಗೇ ಹಬ್ಬಿಸಿದರು. ವದಂತಿಯಲ್ಲಿ ಎತ್ತು, ಗೋವಾಗಿ ಪರಿವರ್ತನೆಯಾಗಿತ್ತು. ನಿಜವಾಗಿ, ಜಾವೀದ್‍ರು ಕುರ್ಬಾನಿಗಾಗಿ ಎತ್ತು ಖರೀದಿಸಿ ತರುತ್ತಿದ್ದರು. ಸ್ವಯಂ ಕುರ್ಬಾನಿಯನ್ನೂ ಮಾಡುತ್ತಿದ್ದರು. ಅಲ್ಲದೇ ಕುರ್ಬಾನಿಯ ಸಂದರ್ಭದಲ್ಲಿ ಎತ್ತುಗಳನ್ನು ಮಾರುವುದೂ ಇತ್ತು. ಅಕ್ರಮ ಗೋಸಾಗಾಟಕ್ಕೂ ಕುರ್ಬಾನಿಗಾಗಿ ಎತ್ತು ಸಾಕುವುದಕ್ಕೂ ವ್ಯತ್ಯಾಸ ಇಲ್ಲವೇ? ಮುಸ್ಲಿಮರ ಮನೆಯಲ್ಲಿ ಎತ್ತು ಅಥವಾ ಗೋವು ಇದ್ದರೆ, ಅದನ್ನು ‘ಅಕ್ರಮ ಚಟುವಟಿಕೆ'ಯಂತೆ ಕಾಣುವ ಸಂಘ ಪರಿವಾರದ ಮನಸ್ಥಿತಿಗೆ ಏನೆನ್ನಬೇಕು? ಮುಸ್ಲಿಮರು ಎತ್ತು ಸಾಕುವುದನ್ನು ಸಾಂವಿಧಾನಿಕವಾಗಿ ನಿಷಿದ್ಧಗೊಳಿಸಲಾಗಿದೆಯೇ? ಆದರೆ ಇಂಥ ಪ್ರಶ್ನೆಗಳನ್ನೆಲ್ಲಾ ಸುಳ್ಳು ವ್ಯಾಖ್ಯಾನದ ಆರ್ಭಟದಲ್ಲಿ ಹತ್ತಿಕ್ಕುವುದನ್ನು ಸಂಘಪರಿವಾರ ಚೆನ್ನಾಗಿ ಕಲಿತುಕೊಂಡಿದೆ. 40-50ರಷ್ಟಿದ್ದ ಸಂಘ ಪರಿವಾರದ ಮಂದಿ ರಾತ್ರಿ ಪುನಃ ಬಂದರಲ್ಲದೇ ನಮಾಝ್‍ಗೆ ಬಂದವರ ಟೊಪ್ಪಿಯನ್ನು ಎಳೆದರು. ಪಾಕಿಸ್ತಾನ್ ಮುರ್ದಾಬಾದ್, ಅಲ್ಲಾಹ್ ಮುರ್ದಾಬಾದ್.. ಘೋಷಣೆ ಗಳನ್ನು ಕೂಗಿದರು. ಮರುದಿನ ಮಧ್ಯಾಹ್ನ ಒಂದು ಗಂಟೆಯ ಸುಮಾರಿಗೆ ಪೊಲೀಸರ ಸಮ್ಮುಖದಲ್ಲೇ ಜಾವೀದ್‍ರ ಮನೆಗೆ ಕಲ್ಲೆಸೆಯಲಾಯಿತು. ಬಾಗಿಲಿಗೆ ಹಾನಿ ಮಾಡಿ, ಮನೆಯ ಟಿ.ವಿ. ಮತ್ತಿತರ ವಸ್ತುಗಳನ್ನು ಧ್ವಂಸ ಮಾಡಲಾಯಿತು..
   ಇಷ್ಟಕ್ಕೂ ಪಡಿತರ ಚೀಟಿ, ಮತದಾನದ ಗುರುತು ಚೀಟಿ ಸಹಿತ ಈ ದೇಶದ ನಾಗರಿಕನೆಂದು ಗುರುತಿಸಿಕೊಳ್ಳುವುದಕ್ಕೆ ಎಲ್ಲವೂ ಇರುವ ಓರ್ವ ವ್ಯಕ್ತಿ ಎತ್ತು ಸಾಕುವುದನ್ನು ಈ ಮಟ್ಟದ ಅಪರಾಧವಾಗಿ ಪರಿಗಣಿಸಲು ಆತ ಮುಸ್ಲಿಮ್ ಆಗಿರುವುದರ ಹೊರತು ಇನ್ನಾವುದನ್ನಾದರೂ ಕಾರಣವಾಗಿ ಹೇಳಲು ಸಾಧ್ಯವಾ? ನಿಜವಾಗಿ ಈ ಎರಡು ಜಿಲ್ಲೆಗಳಲ್ಲಿ ಮುಸ್ಲಿಮರು ದನ ಸಾಕುವುದು, ದನದ ವ್ಯಾಪಾರ ಮಾಡುವುದನ್ನೆಲ್ಲಾ ಅಪರಾಧದ ಪಟ್ಟಿಯಲ್ಲಿ ಸೇರಿಸಲಾಗಿದೆ. ಅಂಥ ‘ಅಪರಾಧ' ಮಾಡುವವರನ್ನು ಥಳಿಸುವುದು ಸರಿ ಅನ್ನುವ ಭಾವನೆಯನ್ನು ಬಿತ್ತುವ ಪ್ರಯತ್ನಗಳು ನಡೆಯುತ್ತಲೇ ಇವೆ. ಬಿಜೆಪಿಯ ಇಮೇಜಿಗೆ ತುಸು ಮುಕ್ಕಾದರೆ ಈ ಜಿಲ್ಲೆ ಗಳಲ್ಲಿ ‘ಗೋವು' ಸುದ್ದಿ ಮಾಡುತ್ತದೆ. ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ 4 ದಶಕಗಳ ಇತಿಹಾಸದಲ್ಲಿಯೇ ಮೊತ್ತಮೊದಲ ಬಾರಿಗೆ ಶಾಸಕ ರಘುಪತಿ ಭಟ್ಟರ ಕ್ಷೇತ್ರವಾದ ಉಡುಪಿ ನಗರ ಸಭೆಯಲ್ಲಿ ಬಿಜೆಪಿಗೆ ಸೋಲಾಗಿದೆ. ಸದ್ಯ ಒಂದು ಕೋಮುಗಲಭೆಯ ಹೊರತು ಈ ಎರಡು ಜಿಲ್ಲೆಗಳಲ್ಲಿ ಬಿಜೆಪಿಯನ್ನು ಹಳಿಗೆ ತರುವ ಸಾಧ್ಯತೆಯಂತೂ ಕಾಣುತ್ತಿಲ್ಲ. ಹೀಗಿರುವಾಗ ಜಾವೀದ್‍ರ ಮನೆಯ ಎತ್ತನ್ನು ಏ.ಕೆ. 47ನಂತೆ ಬಿಂಬಿಸುವುದು ಪರಿವಾರದ ತುರ್ತು ಅಗತ್ಯವಾಗಿತ್ತು.
   2005 ಮಾರ್ಚ್ 13
   ಆದಿ ಉಡುಪಿಯ 60 ವರ್ಷದ ಹಾಜಬ್ಬ ಮತ್ತು ಅವರ ಮಗ 28 ವರ್ಷದ ಹಸನಬ್ಬ ಎಂಬಿಬ್ಬರನ್ನು ಇಲ್ಲಿಯ ಮೈದಾನಕ್ಕೆ ಪರಿವಾರದ ಮಂದಿ ಸಂಜೆ 7ರ ಸುಮಾರಿಗೆ ಎಳೆದು ತಂದರು. ದನದ ಕಳ್ಳ ಸಾಗಾಣಿಕೆಯಲ್ಲಿ ತೊಡಗಿದ್ದಾರೆ ಅನ್ನುವ ಆರೋಪವನ್ನು ಅವರ ಮೇಲೆ ಹೊರಿಸಲಾಗಿತ್ತು. ದನದ ವ್ಯಾಪಾರ ಮಾಡುವ ಮುಸಲ್ಮಾನರನ್ನು ಬೆತ್ತಲೆ ಮಾಡಿದರೂ, ಥಳಿಸಿದರೂ ಅವಮಾನಿಸಿದರೂ ಅದು ಅಪರಾಧವಲ್ಲ ಅನ್ನುವ ವಾತಾವರಣವನ್ನು ಅದಾಗಲೇ ಜಿಲ್ಲೆಯಲ್ಲಿ ಒಂದು ಹಂತದ ವರೆಗೆ ಬಿತ್ತಲಾಗಿತ್ತು. ನಿಜವಾಗಿ ಅವರು ದನದ ವ್ಯಾಪಾರಿಗಳಾಗಿದ್ದರೂ ಗೋಮಾಂಸದ ವ್ಯಾಪಾರಿಗಳಾಗಿರಲಿಲ್ಲ. ದನ ಕರುಗಳನ್ನು ಖರೀದಿಸಿ ಮಾರಾಟ ಮಾಡುವ ದಲ್ಲಾಳಿ ಕೆಲಸವನ್ನು ಅವರಿಬ್ಬರೂ ನಿರ್ವಹಿಸುತ್ತಿದ್ದರು. ನಿಜವಾಗಿ ಕರಾವಳಿ ವಲಯದಲ್ಲಿ ಇದೊಂದು ಉಪವೃತ್ತಿ. ಈ ವ್ಯವಹಾರ ಮಾಡುವ ಹಿಂದೂಗಳೂ ಇದ್ದಾರೆ. ಆದರೆ ಅವರಿಬ್ಬರನ್ನು ಮೈದಾನಕ್ಕೆ ತಂದವರು ಬೆತ್ತಲೆಗೊಳಿಸಿದರು. ಅವರ ಹೊಡೆತ, ಬಡಿತವನ್ನು ತಾಳಲಾರದೇ ತಂದೆ-ಮಗ ಬೆತ್ತಲೆಯಾಗಿ ಮೈದಾನದಲ್ಲಿ ಓಡುವುದು, ತರುಣರು ಅವರನ್ನು ಅಟ್ಟಿಸಿಕೊಂಡು ಥಳಿಸುವುದು.. ಇದು ಸುಮಾರು ಎರಡು ಗಂಟೆಗಳ ಕಾಲ ನಡೆಯಿತು. ಮೈದಾನದಲ್ಲಿ 500-600 ಜನ ಈ ವಿಕಟ ವಿನೋದವನ್ನು ನೋಡುತ್ತಾ ನಿಂತಿದ್ದರು. ಒಂದು ವೇಳೆ ಅವರಿಬ್ಬರು ಬೆತ್ತಲಾಗಿ ಕೂತಿರುವ ಮತ್ತು ಹಸನಬ್ಬರ ತಲೆಗೂದಲನ್ನು ಒಬ್ಬ ಎತ್ತಿ ಹಿಡಿದಿರುವ ಪೊಟೋವೊಂದನ್ನು ಮಾರ್ಚ್ 15ರ ಪತ್ರಿಕೆಯೊಂದು ಪ್ರಕಟಿಸದೇ ಇರುತ್ತಿದ್ದರೆ ಈ ಘಟನೆಯೂ ಹತ್ತರಲ್ಲಿ ಹನ್ನೊಂದಾಗಿ ಬಿಡುವ ಎಲ್ಲ ಸಾಧ್ಯತೆಯೂ ಇತ್ತು. ಆಘಾತದ ಸಂಗತಿಯೆಂದರೆ, ಅಲ್ಲಿ ನೆರೆದಿರುವವರ ಮೌನ ಮನಸ್ಥಿತಿ. ಅವರೆಲ್ಲ ಪರಿವಾರದ ಬೆಂಬಲಿಗರೆಂದಲ್ಲ. ಆದರೆ ಮುಸ್ಲಿಮರ ವಿರುದ್ಧ ದ್ವೇಷ ಮತ್ತು ಸಂಶಯದ ಭಾವನೆಗಳನ್ನು ಬಿಜೆಪಿಯೇತರ ಮಂದಿಯಲ್ಲಿ ಕೂಡ ಬಿತ್ತಿ ಬೆಳೆಸಲು ಅದಕ್ಕೆ ಸಾಧ್ಯವಾಗಿತ್ತು. ಹಾಗಂತ, ನೋಡುಗರಿಗೆಲ್ಲ ಮುಸ್ಲಿಮರ ಬಗ್ಗೆ ಅಸಾಧ್ಯ ದ್ವೇಷ ಇತ್ತು ಎಂದಲ್ಲ. ಆದರೆ ಅವರನ್ನು ಥಳಿಸುವುದು, ಅವಮಾನಿಸುವುದೆಲ್ಲ ‘ನಾವು ಪ್ರತಿಭಟಿಸುವಷ್ಟು' ಗಂಭೀರ ಪ್ರಕರಣ ಅಲ್ಲ ಎಂಬ ಭಾವನೆಯೊಂದನ್ನು ಪರಿವಾರ ಈ ಜಿಲ್ಲೆಗಳಲ್ಲಿ ಒಂದು ಹಂತದ ವರೆಗೆ ಬಿತ್ತಿ ಬಿಟ್ಟಿದೆ. ಜರ್ಮನಿಯಲ್ಲಿ ಯಹೂದಿಯರ ಮೇಲೆ ಸೇನೆಯು ನಡೆಸುತ್ತಿದ್ದ ನರಮೇಧವನ್ನು ಮೂಕ ಪ್ರೇಕ್ಷಕರಾಗಿ ನೋಡುತ್ತಿದ್ದ ಜರ್ಮನಿಯ ಜನಸಾಮಾನ್ಯರ ಬಗ್ಗೆ ಬರೆಯುತ್ತಾ ಖ್ಯಾತ ಲೇಖಕ ಗುಂಥರ್‍ಗ್ರಾಸ್,             ‘ಅವರು ಯಾರೂ ಅಸಾಧ್ಯ ದುಷ್ಟರಾಗಿರಲಿಲ್ಲ. ಅವರೆಲ್ಲ ಭಾನುವಾರ ಸಂಜೆ ತಮ್ಮ ಮಕ್ಕಳನ್ನು ಪಾರ್ಕಿಗೆ ಕರಕೊಂಡು ಹೋಗಿ ಐಸ್‍ಕ್ರೀಮ್ ಕೊಡಿಸುವ ಸದ್ಗೃಹಸ್ಥರಾಗಿದ್ದರು..' ಎಂದಿದ್ದಾರೆ. ಪರಿವಾರ ಈ ಜಿಲ್ಲೆಗಳಲ್ಲಿ ಇಂಥದ್ದೊಂದು ಸದ್ಗೃಹಸ್ಥ ಸಮೂಹವನ್ನು ಕಟ್ಟಲು ಆರಂಭದಿಂದಲೂ ಯತ್ನಿಸಿದೆ. ಅನ್ಯ ಧರ್ಮೀಯ ಹೆಣ್ಣು-ಗಂಡು ಮಾತಾಡಿದ ನೆಪದಲ್ಲಿ ಥಳಿಸುವುದು; ಹೊಟೇಲು-ಪಬ್‍ಗಳಿಗೆ ದಿಢೀರ್ ದಾಳಿ, ಅಕ್ರಮ ಗೋಸಾಗಾಟ, ಲವ್ ಜಿಹಾದ್..ನ ಹೆಸರಲ್ಲಿ ಆಗುವ ಹಿಂಸೆಗಳನ್ನು ನಾಗರಿಕ ಸಮೂಹ ಬಹುತೇಕ ಮೌನದಿಂದ ನೋಡುತ್ತದೆಯೇ ಹೊರತು, ಅದನ್ನು ತಡೆಯುವಲ್ಲಿ ಮುತುವರ್ಜಿ ವಹಿಸಿದ್ದು ಇಲ್ಲವೇ ಇಲ್ಲ.  
      ಕರಾವಳಿಯಲ್ಲಿ ಸಂಘ ಪರಿವಾರ ನಡೆಸುತ್ತಿರುವ ದ್ವೇಷದ ಪ್ರಚಾರಕ್ಕೂ ಈ ಮೌನಕ್ಕೂ ಖಂಡಿತ ಆಳ ಸಂಬಂಧ ಇದೆ. ಆ ದ್ವೇಷದ ಪ್ರಚಾರವನ್ನು ಬಿಜೆಪಿಯೇತರ ಮಂದಿಯೂ ನಂಬುವಷ್ಟರ ಮಟ್ಟಿಗೆ ಅತ್ಯಂತ ಯೋಜಿತವಾಗಿ ಹರಡಿ ಬಿಡಲಾಗುತ್ತಿದೆ. ಹುಬ್ಬಳ್ಳಿಯ ಈದ್ಗಾ ಮೈದಾನವನ್ನು ಚೆನ್ನಮ್ಮ ಮೈದಾನವೆಂದು ಕರೆದು, ‘ರಾಷ್ಟ್ರ ಧ್ವಜ ಗೌರವ ಸಂರಕ್ಷಣಾ ಸಮಿತಿ’ ಎಂಬ ತಂಡವನ್ನು ಕಟ್ಟಿಕೊಂಡು ಗಲಭೆಯೆಬ್ಬಿಸಿ ಕರ್ನಾಟಕದ ಉತ್ತರ ಭಾಗವನ್ನು ಬಿಜೆಪಿಯ ತೆಕ್ಕೆಗೆ ಸೆಳೆಯಲು ಪ್ರಹ್ಲಾದ್ ಜೋಷಿ 1992ರ ಬಳಿಕ ನಡೆಸಿದ ತಂತ್ರ ಮತ್ತು ಬುಡನ್‍ಗಿರಿಯನ್ನು ವಿವಾದಿತ ಕೇಂದ್ರವನ್ನಾಗಿಸಿ ಹಿಂದೂ-ಮುಸ್ಲಿಮರನ್ನು ವಿಭಜಿಸಿದ್ದು.. ಎಲ್ಲವೂ ಚುನಾವಣೆಯಲ್ಲಿ ಬಿಜೆಪಿಗೆ ಧಾರಾಳ ಫಲ ಕೊಟ್ಟಿದೆ. ಅದೇ ಪ್ರಹ್ಲಾದ್ ಜೋಷಿ ಈಗ ಬಿಜೆಪಿಯ ರಾಜ್ಯಾಧ್ಯಕ್ಷರಾಗಿದ್ದಾರೆ. ಕರ್ನಾಟಕದ ಕರಾವಳಿ ಭಾಗದಲ್ಲಿ ಮತ್ತೆ ಸಣ್ಣ-ಪುಟ್ಟ ಪ್ರಕರಣಗಳು ನಡೆಯತೊಡಗಿವೆ. ಅಡ್ಡ ಬೆಂಗ್ರೆಯ ಎತ್ತು ಪೊಲೀಸು ಠಾಣೆ ಹತ್ತಿರುವುದು ಅದರ ಒಂದು ಸೂಚನೆ ಅಷ್ಟೇ. ಕೋಮುಗಲಭೆಯಿಲ್ಲದೇ ಚುನಾವಣೆಗೆ ಹೋಗುವುದೆಂದರೆ ಬಿಜೆಪಿಯ ಮಟ್ಟಿಗೆ ಆಯುಧವಿಲ್ಲದೇ ರಣಾಂಗಣಕ್ಕೆ ಇಳಿದಂತೆ. ಅಂಥದ್ದೊಂದು ಸಾಹಸಕ್ಕೆ ಕೈ ಹಾಕಿ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಬಿಜೆಪಿ ಈಗಾಗಲೇ ಕೈ ಸುಟ್ಟುಕೊಂಡಿದೆ. ಆದ್ದರಿಂದ ಮುಂದೆ ಅಸೆಂಬ್ಲಿ ಚುನಾವಣೆಯಲ್ಲೂ ಇದನ್ನೇ ಮುಂದುವರಿಸಿಕೊಂಡು ಹೋಗುತ್ತದೆಂಬ ಬಗ್ಗೆ ಕರಾವಳಿಯಲ್ಲಿ ಯಾರಿಗೂ ನಂಬುಗೆಯಿಲ್ಲ. ಎತ್ತು, ಕರುಗಳೆಲ್ಲ ಮತ್ತೆ ಸುದ್ದಿ ಮಾಡಲು ಪ್ರಾರಂಭಿಸಿರುವುದು ಅವರ ಅನುಮಾನವನ್ನು ಬಲಗೊಳಿಸುತ್ತಿದೆ. ಆದ್ದರಿಂದಲೇ,
ಅಡ್ಡಬೆಂಗ್ರೆಯ ಎತ್ತು ಪೊಲೀಸು ಠಾಣೆಯಿಂದ ತಪ್ಪಿಸಿಕೊಂಡು ಊರಿಗೆ ಬರದಿರಲಿ ಎಂದೇ ಜನಸಾಮಾನ್ಯರು ಪ್ರಾರ್ಥಿಸುತ್ತಿದ್ದಾರೆ..

'ದೆವ್ವದ' ವಿರುದ್ಧ ಅಮೆರಿಕನ್ನರೇ ದಂಗೆ ಏಳುವ ದಿನಗಳೂ ಬರಬಹುದಲ್ಲವೇ?

ಖಾಲಿದ್ ಮಿಶ್‍ಅಲ್

    1997 ಸೆ. 25
  ಜೋರ್ಡಾನ್‍ನ ರಾಜಧಾನಿ ಅಮ್ಮಾನ್‍ನಲ್ಲಿರುವ ತಮ್ಮ ಕಚೇರಿಗೆ ಹಮಾಸ್‍ನ ನಾಯಕ ಖಾಲಿದ್ ಮಿಶ್‍ಅಲ್ ಬರುತ್ತಿ ದ್ದರು. ಆಗ ಇಸ್ರೇಲ್‍ನ ಪ್ರಧಾನ ಮಂತ್ರಿಯಾಗಿದ್ದುದು ಬೆಂಜಮಿನ್ ನೇತನ್ಯಾಹು. ಬಾಲ್ಯದಲ್ಲೇ ಫೆಲೆಸ್ತೀನಿನಿಂದ ಕುವೈಟ್‍ಗೆ ವಲಸೆ ಹೋಗಿ, ರಸಾಯನ ಶಾಸ್ತ್ರದಲ್ಲಿ ಪದವಿ ಪಡೆದಿದ್ದ ಮಿಶ್‍ಅಲ್‍ರು 1984ರಿಂದ ಹಮಾಸ್‍ನ ಪೂರ್ಣಕಾಲಿಕ ಕಾರ್ಯಕರ್ತರಾಗಿ ನಿಯುಕ್ತರಾಗಿದ್ದರು. 1991ರ ಗಲ್ಫ್ ಯುದ್ಧದ ಸಂದರ್ಭದಲ್ಲಿ ಕುವೈಟ್‍ನಿಂದ ಜೋರ್ಡಾನ್‍ಗೆ ತೆರಳಿದ ಅವರು ಅಲ್ಲೂ ಹಮಾಸ್ ಪರ ಚಟುವಟಿಕೆಯ ನಡೆಸುತ್ತಿರುವುದು ನೇತನ್ಯಾಹುರನ್ನು ಸಿಟ್ಟುಗೆಬ್ಬಿಸಿತು. ಅವರು ಮೊಸಾದ್‍ನ (ಇಸ್ರೇಲ್ ನ ಗುಪ್ತ ಚರ ಸಂಸ್ಥೆ) ಜೊತೆ ಸೇರಿ ಮಿಶ್‍ಅಲ್‍ರ ಹತ್ಯೆಗೆ ಷಡ್ಯಂತ್ರ ರೂಪಿಸಿದರು. ಅದರಂತೆ ಮೊಸಾದ್‍ನ ಇಬ್ಬರು ಏಜಂಟರನ್ನು ಕೆನಡದ ನಕಲಿ ಪಾಸ್ ಪೋರ್ಟ್ ನೊಂದಿಗೆ ಜೋರ್ಡಾನ್‍ಗೆ ಕಳುಹಿಸಲಾಯಿತು. 1997 ಸೆ. 25ರಂದು ತನ್ನ ಕಚೇರಿಯ ಕಡೆಗೆ ಮಿಶ್‍ಅಲ್‍ರು ನಡೆದು ಬರುತ್ತಿರುವಂತೆಯೇ ಹಿಂದಿನಿಂದ ಬಂದ ಓರ್ವ ಮೊಸಾದ್ ಏಜೆಂಟ್, ಅವರ ಎಡಕಿವಿಯ ಕಡೆಗೆ ಒಂದು ವಸ್ತುವನ್ನು ಹಿಡಿದ. ಅಪಾಯಕಾರಿ ವಿಷವನ್ನು ದೇಹಕ್ಕೆ ವರ್ಗಾಯಿಸುವ ಉಪಕರಣವಾಗಿತ್ತು ಅದು. ಬಳಿಕ ಮುಹಮ್ಮದ್ ಅಬೂ ಸೈಫ್ ಎಂಬ ಅಂಗರಕ್ಷಕನ ನೆರವಿನೊಂದಿಗೆ ಆ ಇಬ್ಬರು ಏಜಂಟರನ್ನೂ ಬಂಧಿಸಲಾಯಿತು. ತಕ್ಷಣ ಜೋರ್ಡಾನಿನ ಅಧ್ಯಕ್ಷ ಕಿಂಗ್ ಹುಸೈನ್‍ರು ಆ ಘಟನೆಯನ್ನು ತೀವ್ರವಾಗಿ ಖಂಡಿಸಿದರು. ಕಿಂಗ್ ಹುಸೈನ್ ಮೆಡಿಕಲ್ ಸೆಂಟರ್‍ನಲ್ಲಿ ಕೋಮಾ ಸ್ಥಿತಿಯಲ್ಲಿ ಮಲಗಿರುವ ಮಿಶ್‍ಅಲ್‍ರಿಗೆ ಚಿಕಿತ್ಸೆ ನೀಡಲು ಪ್ರತ್ಯೌಷಧ (Antidote) ಕಳುಹಿಸಿಕೊಡುವಂತೆ  ನೇತನ್ಯಾಹುರನ್ನು ಆಗ್ರಹಿಸಿದರು. ಇಲ್ಲದಿದ್ದರೆ, ರಾಜತಾಂತ್ರಿಕ ಸಂಬಂಧವನ್ನು ಕಡಿದುಕೊಳ್ಳುವ ಮತ್ತು ಇಬ್ಬರು ಮೊಸಾದ್ ಏಜಂಟರನ್ನು ಕಠಿಣವಾಗಿ ಶಿಕ್ಷಿಸುವ ಬೆದರಿಕೆ ಹಾಕಿದರು. ಆರಂಭದಲ್ಲಿ ನೇತನ್ಯಾಹು ತನ್ನ ಕೈವಾಡವನ್ನು ಒಪ್ಪಿಕೊಳ್ಳಲಿಲ್ಲ. ಆದರೆ ಪ್ರಕರಣವು ಅಂತಾರಾಷ್ಟ್ರೀಯ ಗಮನ ಸೆಳೆಯುತ್ತಿರುವಂತೆಯೇ ಅಮೇರಿಕದ ಅಧ್ಯಕ್ಷ ಬಿಲ್ ಕ್ಲಿಂಟನ್ ಮಧ್ಯೆ ಪ್ರವೇಶಿಸಿದರಲ್ಲದೇ, ಪ್ರತ್ಯೌಷಧ ಕೊಡುವಂತೆ ನೇತನ್ಯಾಹುರನ್ನು ಬಲವಂತಪಡಿಸಿದರು. ಹೀಗೆ ನೇತನ್ಯಾಹುರ ಆದೇಶದಂತೆ ಮೊಸಾದ್‍ನ ಮುಖ್ಯಸ್ಥ ಡ್ಯಾನಿ ಯತೂಮ್(Danny yatom )ರು ಔಷಧಿಯೊಂದಿಗೆ ಜೋರ್ಡಾನಿಗೆ ಪ್ರಯಾಣಿಸಿದರು. ಆದರೆ ಅದಾಗಲೇ ಕಿಂಗ್ ಹುಸೈನ್ ಆಸ್ಪತ್ರೆಯ ವೈದ್ಯರು ವಿಷದ (Opioid) ಲಕ್ಷಣಗಳನ್ನು ಪತ್ತೆಹಚ್ಚಿ ಚಿಕಿತ್ಸೆ (Narcan) ಪ್ರಾರಂಭಿಸಿದ್ದರು. ಒಂದು ರೀತಿಯಲ್ಲಿ ಇಸ್ರೇಲ್‍ನ ವರ್ಚಸ್ಸು ಜಾಗತಿಕ ಮಟ್ಟದಲ್ಲೇ ಮಬ್ಬಾದ ಪ್ರಕರಣ ಅದು. ನೇತನ್ಯಾಹು ತೀವ್ರ ಮುಖಭಂಗಕ್ಕೆ ಒಳಗಾದರು. ಮಾತ್ರವಲ್ಲ, ಹಮಾಸ್‍ನ ಬೆಳವಣಿಗೆಗೆ ಈ ಘಟನೆಯು ಭಾರೀ ಸಹಕಾರಿಯಾಯಿತು. ಮೊಸಾದ್‍ನ ಆ ಇಬ್ಬರು ಏಜೆಂಟರನ್ನು ಜೋರ್ಡಾನ್ ಗಡೀಪಾರು ಮಾಡಿತಲ್ಲದೇ ಇಸ್ರೇಲ್‍ನ ವಶದಲ್ಲಿದ್ದ ಅನೇಕಾರು ಫೆಲೆಸ್ತೀನಿ ಕೈದಿಗಳನ್ನು  ಬಿಡಿಸಿಕೊಂಡಿತು..
  ಆದ್ದರಿಂದಲೇ,
ಅಮೆರಿಕಾದ ಮಾಜಿ ಅಧ್ಯಕ್ಷ ಜಾರ್ಜ್ ಡಬ್ಲ್ಯು ಬುಶ್‍ರನ್ನು ‘ದೆವ್ವ’ ಎಂದು ವಿಶ್ವಸಂಸ್ಥೆಯಲ್ಲಿ ಎಲ್ಲರೆದುರೇ ಕರೆದ, ಬುಶ್‍ರ ಎದುರು ಹಿಟ್ಲರನು ‘ಎದೆಹಾಲುಣ್ಣುವ ಸಣ್ಣ ಮಗು’ ಎಂದು ಕುಟುಕಿದ, ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಕಾಂಡೊಲಿಸಾ ರೈಸ್‍ರನ್ನು ‘ಓ ಪುಟ್ಟ ಬಾಲಕಿ’ ಎಂದು ಟೀಕಿಸಿದ ಮತ್ತು ಅಮೆರಿಕನ್ ಸಾಮ್ರಾಜ್ಯಶಾಹಿತ್ವಕ್ಕೆ ಸಡ್ಡು ಹೊಡೆಯುವಂತೆ ದಕ್ಷಿಣ ಅಮೆರಿಕನ್ ರಾಷ್ಟ್ರಗಳನ್ನು ಕಟ್ಟಲು ಶ್ರಮಿಸಿದ ವೆನೆಜುವೇಲದ ಅಧ್ಯಕ್ಷ ಹ್ಯೂಗೋ ಚಾವೇಝ್‍ರ ಸಾವಿನಲ್ಲೂ ಅನುಮಾನಗಳು ಮೂಡುವುದು. ಅಷ್ಟಕ್ಕೂ,
  1. ಫರ್ನಾಂಡೋ ಲುಗೊ
  2. ಲೂಯಿಸ್ ಇನಾಸಿಯೊ ಲುಲ ಡ ಸಿಲ್ವ
  3. ಹ್ಯೂಗೋ ಚಾವೇಝ್
  4. ಕ್ರಿಸ್ಟಿನಾ ಫೆರ್ನಾಂಡಿಸ್ ಡೆ ಕಿರ್ಚ್ ನರ್
ಎಂಬ ದಕ್ಷಿಣ ಅಮೆರಿಕದ ಈ ನಾಲ್ವರು ಸಮಾಜವಾದಿ (ಕಮ್ಯೂನಿಸ್ಟ್) ನಾಯಕರು ಬೆನ್ನು ಬೆನ್ನಿಗೆ ಕ್ಯಾನ್ಸರ್‍ಗೆ ತುತ್ತಾಗಿ ರುವುದೇಕೆ? ಕಳೆದ 20 ತಿಂಗಳ ಅವಧಿಯೊಳಗೆ ಈ ನಾಲ್ವರು ನಾಯಕರಲ್ಲಿ ಕ್ಯಾನ್ಸರ್  ಕಾಣಿಸಿಕೊಂಡಿರುವುದು ಬರೇ ಆಕಸ್ಮಿಕವೇ ಅಥವಾ The disease may be a new wepon of the empaire to eliminate unwanted leaders  (ತನಗಿಷ್ಟವಿಲ್ಲದ ನಾಯಕರನ್ನು ನಾಶಪಡಿಸಲು ಅಮೆರಿಕವು ಈ ರೋಗವನ್ನು ಅಭಿವೃದ್ಧಿಪಡಿಸಿರ ಬಹುದು) ಎಂಬ ಚಾವೇಝ್‍ರ ಮಾತೇ ನಿಜವಾಗಿರಬಹುದೇ? ಇಲ್ಲದಿದ್ದರೆ ಚಾವೇಝ್‍ರ ನಿಧನ ವಾರ್ತೆಯನ್ನು ಘೋಷಿಸುವುದಕ್ಕಿಂತ ಗಂಟೆಗಳ ಮೊದಲು ಇಬ್ಬರು ಅಮೇರಿಕನ್ ರಾಜತಾಂತ್ರಿಕರನ್ನು ವೆನೆಝವೇಲ ತನ್ನ ದೇಶದಿಂದ ಉಚ್ಛಾಟಿಸಿದ್ದೇಕೆ? ಅಮೆರಿಕನ್ ಕ್ಯಾನ್ಸರ್ ಸೊಸೈಟಿಯ ಮಾಜಿ ಅಧ್ಯಕ್ಷ ಆಲ್ಟನ್ ಓಸ್ಚನರನ್ನು ಬಳಸಿಕೊಂಡು 1970ರಲ್ಲಿ ‘ಡರ್ಟ್ ಗನ್ನನ್ನು’ (ಇದು ಹೃದಯಾಘಾತಕ್ಕೆ ಸಂಬಂಧಿಸಿದ್ದು) ನಿರ್ಮಿಸಿ ವಿರೋಧಿಗಳ ಮೇಲೆ ಪ್ರಯೋಗಿಸಿದ್ದ CIA, (ಅಮೆರಿಕದ ಗುಪ್ತಚರ ಸಂಸ್ಥೆ) ಈ 20ನೇ ಶತಮಾನದಲ್ಲಿ ಸುಮ್ಮನಿರುವುದಕ್ಕೆ ಸಾಧ್ಯವೇ?
    2008ರಲ್ಲಿ ದಕ್ಷಿಣ ಅಮೆರಿಕದ ಸಮಾಜವಾದಿ ರಾಷ್ಟ್ರವಾದ ಪರಾಗ್ವೆಯಲ್ಲಿ ಚುನಾವಣೆಯ ತಯಾರಿ ನಡೆಯುತ್ತಿತ್ತು. ಎಲ್ಲ 4 ಮಂದಿ ಅಧ್ಯಕ್ಷೀಯ ಅಭ್ಯರ್ಥಿಗಳ ಬಯೋಡಾಟಾ, DNA ಮಾಹಿತಿಗಳನ್ನು ಸಂಗ್ರಹಿಸಿ ಕಳುಹಿಸಿಕೊಡುವಂತೆ CIAಯು ಅಲ್ಲಿನ ಅಮೆರಿಕನ್ ರಾಯಭಾರಿಯಲ್ಲಿ ಕೇಳಿಕೊಂಡಿರುವುದನ್ನು ಇತ್ತೀಚೆಗೆ ವಿಕಿಲೀಕ್ಸ್ ಬಹಿರಂಗಪಡಿಸಿತ್ತು. ಆ ಬಳಿಕ ಫರ್ನಾಂಡೋ ಲುಗೋ ಅಧ್ಯಕ್ಷರಾಗಿ ಆಯ್ಕೆಯಾದರು. 60 ವರ್ಷದ ಲುಗೋ 2010ರಲ್ಲಿ ಕ್ಯಾನ್ಸರ್ ಗಡ್ಡೆಗಾಗಿ ಚಿಕಿತ್ಸೆಗೆ ಒಳಗಾದರು. ಬ್ರೆಝಿಲ್‍ನ ಮಾಜಿ ಅಧ್ಯಕ್ಷ 66 ವರ್ಷದ ಲುಲ ಡ ಸಿಲ್ವ 2011ರಲ್ಲಿ ಲಂಗ್ಸ್ ಕ್ಯಾನ್ಸರ್‍ಗೆ ತುತ್ತಾದರು. ಈ ಕಾರಣದಿಂದಲೇ ತನ್ನ ಹುದ್ದೆಯನ್ನು ಡೆಲ್ಮ ರಸ್ಸೆಫ್‍ಗೆ ವರ್ಗಾಯಿಸಿದರು. ನಿಜವಾಗಿ ಅಮೆರಿಕಕ್ಕೆ ತಲೆಬಾಗದೆಯೇ ದೇಶವನ್ನು ಅಭಿವೃದ್ಧಿ ಪಡಿಸಲು ಸಾಧ್ಯ ಎಂಬುದನ್ನು ಮೊದಲಾಗಿ ಸಾಧಿಸಿ ತೋರಿಸಿದ್ದೇ ಲುಲ ಡ ಸಿಲ್ವ. ಬ್ರೆಝಿಲನ್ನು ಜಾಗತಿಕವಾಗಿಯೇ ಪ್ರಬಲ ಆರ್ಥಿಕ ಶಕ್ತಿಯಾಗಿ ಮಾರ್ಪಡಿಸಿದ್ದು ಅವರ ಅಮೋಘ ಸಾಧನೆಯಾಗಿತ್ತು. ಇದೀಗ ಡೆಲ್ಮಾ ರಸ್ಸೆಫ್‍ರೂ ಕ್ಯಾನ್ಸರ್ ಚಿಕಿತ್ಸೆಗೆ ಒಳಗಾಗಿದ್ದಾರೆ. 2011ರಲ್ಲಿ ವೆನೆಝುವೇಲದ ಹ್ಯೂಗೋ ಚಾವೇಝ್ ಮೊದಲ ಬಾರಿ ಕ್ಯೂಬಾದ ಹವಾನದಲ್ಲಿ ಕ್ಯಾನ್ಸರ್‍ಗಾಗಿ ಚಿಕಿತ್ಸೆ ಪಡೆದರು. ಅರ್ಜಂಟೀನಾದ ಅಧ್ಯಕ್ಷೆ ಕ್ರಿಸ್ಟಿನಾ 2012ರ ಜನವರಿಯಲ್ಲಿ ಥೈರಾಯಿಡ್ ಗ್ರಂಥಿಯ ಕ್ಯಾನ್ಸರ್ ಗಾಗಿ ಸರ್ಜರಿಗೆ ಒಳಗಾಗಿದ್ದಾರೆ. ಈ ಮೊದಲು ಅರ್ಜಂಟೀನಾದ ಅಧ್ಯಕ್ಷರಾಗಿದ್ದ ಅವರ ಪತಿ ನೆಸ್ಟರ್ ಕಿರ್ಚನರ್ ರು 2010ರಲ್ಲಿ ಕ್ಯಾನ್ಸರ್ ಗೆ ತುತ್ತಾಗಿ ಆ ಬಳಿಕ ಸಾವಿಗೀಡಾಗಿದ್ದರು. ದಕ್ಷಿಣ ಅಮೇರಿಕದ ಇನ್ನೊಂದು ಸಮಾಜವಾದಿ ರಾಷ್ಟ್ರವಾದ ಪೆರುವಿನ ಅಧ್ಯಕ್ಷ ಒಲ್ಲಂಟ ಹುಮಾಲ 2011ರಲ್ಲಿ ಕ್ಯಾನ್ಸರ್ ಗಡ್ಡೆಯ ನಿವಾರಣೆಗಾಗಿ ಚಿಕಿತ್ಸೆ ಪಡೆದಿದ್ದಾರೆ.
   ಅಮೆರಿಕದ ದಬ್ಬಾಳಿಕೆ, ಸಾಮ್ರಾಜ್ಯಶಾಹಿ ನೀತಿಗಳೇನೇ ಇರಲಿ, ಅದರ ದಕ್ಷಿಣಕ್ಕಿರುವ ಸುಮಾರು 20ರಷ್ಟು ರಾಷ್ಟ್ರಗಳು ಅಮೆರಿಕವನ್ನು ಅನುಮಾನಿಸಿದ್ದೇ ಹೆಚ್ಚು. ಅಮೆರಿಕ ತನ್ನ ದೊಡ್ಡತನವನ್ನು ಪ್ರದರ್ಶಿಸಿದಂತೆಲ್ಲಾ ಈ ರಾಷ್ಟ್ರಗಳು ಹೆಚ್ಚೆಚ್ಚು ಸಮಾಜವಾದಿ ವಿಚಾರಧಾರೆಗೆ ಆಕರ್ಷಿತವಾಗುತ್ತಾ ಹೋದುವು. ಕ್ಯೂಬಾದ ಫಿಡೆಲ್ ಕ್ಯಾಸ್ಟ್ರೊ, ವೆನೆಝುವೇಲದ ಚಾವೇಝ್, ಬ್ರೆಝಿಲ್‍ನ ಲುಲ ಡ ಸಿಲ್ವ... ಸಹಿತ ಪ್ರಮುಖ ನಾಯಕರು ದಕ್ಷಿಣ ಅಮೆರಿಕವನ್ನು ಸಾಮ್ರಾಜ್ಯಶಾಹಿ ವಿರೋಧಿಯಾಗಿ ಕಟ್ಟ ತೊಡಗಿದರು. ನಿಜವಾಗಿ, ಈ ದೇಶಗಳು ಅಮೆರಿಕದ ವಿರುದ್ಧ ವಷ್ಟೇ ಒಂದುಗೂಡಿದ್ದಲ್ಲ, ಇಸ್ರೇಲ್‍ನ ವಿರುದ್ಧವೂ ಇವು ಬಹುತೇಕ ಒಂದೇ ದನಿಯಲ್ಲಿ ಮಾತಾಡಿವೆ. ಫೆಲೆಸ್ತೀನ್‍ನ ಸಾರ್ವ ಭೌಮತೆಯನ್ನು ಬಹಿರಂಗವಾಗಿ ಘೋಷಿಸಿದ್ದು ಈ ರಾಷ್ಟ್ರಗಳೇ. ಅಲ್ಲದೆ, ಚಾವೇಝ್‍ರಂತೂ ಲ್ಯಾಟಿನ್ ಅಮೆರಿಕನ್ ರಾಷ್ಟ್ರಗಳ ಸಂಬಂಧವನ್ನು ಆಫ್ರಿಕ ಮತ್ತು ಅರಬ್  ಜಗತ್ತಿನೊಂದಿಗೆ ಬೆಳೆಸಲು ತೀವ್ರವಾಗಿ ಶ್ರಮಿಸಿದ್ದರು. ಆದ್ದರಿಂದಲೇ, Chavez take care. These people have developed technology. You are very careless. Take care what you eat. What they give you to eat. A little needle and they inject you with. I dont know what.  (ಚಾವೇಝ್ ಜಾಗ್ರತೆ, ಅವರು (ಅಮೆರಿಕ) ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಿದ್ದಾರೆ. ನೀನು ತುಂಬಾ ಅಜಾಗರೂಕತೆಯ ವ್ಯಕ್ತಿ. ನೀನು ತಿನ್ನುವಾಗಲೂ ತುಂಬಾ ಜಾಗರೂಕನಾಗಿರಬೇಕು. ತಿನ್ನುವ ಆಹಾರದ ಮೂಲಕವೂ ಅವರು ನಿನಗೆ ಸಣ್ಣ ಸೂಜಿಯನ್ನು ಚುಚ್ಚಬಹುದು) ಎಂದು ಕ್ಯಾಸ್ಟ್ರೊ ಆಗಾಗ ಚಾವೇಝ್‍ರನ್ನು ಎಚ್ಚರಿಸುತ್ತಿದ್ದರು. ಸ್ವತಃ ಫಿಡೆಲ್ ಕ್ಯಾಸ್ಟ್ರೋರ ಮೇಲೆ 900ರಷ್ಟು ಬಾರಿ ಹತ್ಯಾ ಯತ್ನಗಳು ನಡೆದಿವೆ ಎಂದು ಖ್ಯಾತ ಬರಹಗಾರ ಲೂಯಿಸ್ ಬ್ರಿಟ್ಟೊ ಗಾರ್ಸಿಯ ಇತ್ತೀಚೆಗೆ ಬರೆದಿದ್ದರು. ಅಂದ ಹಾಗೆ, ಮೆದುಳು ಆಘಾತದಿಂದ 2004ರಲ್ಲಿ ಮೃತಪಟ್ಟ ಫೆಲೆಸ್ತೀನಿನ ಅಧ್ಯಕ್ಷ ಯಾಸಿರ್ ಅರಫಾತ್‍ರ ಸಾವಿನ ಹಿಂದೆ ಇಸ್ರೇಲ್‍ನ ಕೈವಾಡ ಇದೆ ಎಂಬುದು ಇವತ್ತು ಗುಟ್ಟಾಗಿಲ್ಲವಲ್ಲ.
   ಒಂದು ರೀತಿಯಲ್ಲಿ ಅಮೆರಿಕದ ಅಪ್ಪಣೆಯನ್ನು ಶಿರಸಾ ಪಾಲಿಸುವ ರಾಷ್ಟ್ರಗಳು ಜಗತ್ತಿನಲ್ಲಿ ಅನೇಕಾರು ಇದ್ದರೂ ಅಮೆರಿಕದ ಸುತ್ತಮುತ್ತಲಿನ ಕೆಲವು ರಾಷ್ಟ್ರಗಳು ಅದರ ಹಂಗಿಲ್ಲದೇ ಬದುಕುವ ಪಣತೊಟ್ಟದ್ದು, ಅದಕ್ಕಾಗಿ ಶ್ರಮಿಸಿದ್ದು ಆ ರಾಷ್ಟ್ರಗಳ ನಾಯಕರಿಗೆ ಕ್ಯಾನ್ಸರ್ ಹರಡಲು ಕಾರಣ ಎಂದು ನಂಬುವಂತಹ ವಾತಾವರಣ ಇವತ್ತು ಸೃಷ್ಟಿಯಾಗಿದೆ. ಚಾವೇಝ್ ಅಂತೂ ಅಂಥ ಅನುಮಾನವನ್ನು ವ್ಯಕ್ತಪಡಿಸಿಯೇ ಸಾವಿಗೆ ತುತ್ತಾದರು. ಒಂದು ವೇಳೆ ಇನ್ನೊಂದು ಹತ್ತು ವರ್ಷ ಅವರು ಬದುಕಿರುತ್ತಿದ್ದರೆ ದಕ್ಷಿಣ ಅಮೆರಿಕದ ಒಟ್ಟು ಭೂಪಟವೇ ಬದಲಾಗಿ ಬಿಡುವ ಸಾಧ್ಯತೆಯಿತ್ತು. ಅವರು 2008ರಲ್ಲಿ 12 ರಾಷ್ಟ್ರಗಳ ದಕ್ಷಿಣ ಅಮೆರಿಕನ್ ಒಕ್ಕೂಟವನ್ನು ರಚಿಸಿದರು. ಮಾತ್ರವಲ್ಲ, ಈ ಒಕ್ಕೂಟವನ್ನು ಯುರೋಪಿಯನ್ ಯೂನಿಯನ್‍ಗೆ ಸಡ್ಡು ಹೊಡೆಯುವಂತೆ ಕಟ್ಟುವಲ್ಲಿ ನಿರತರಾದರು. ಈ ಒಕ್ಕೂಟದ ಸದಸ್ಯ ರಾಷ್ಟ್ರಗಳು ಪರಸ್ಪರ ಆರ್ಥಿಕ, ವೈಜ್ಞಾನಿಕ, ರಾಜಕೀಯ ಸಹಕಾರದೊಂದಿಗೆ ಸಮೃದ್ಧವಾಗಿ ಬೆಳೆಯುವುದಕ್ಕೆ ನೀಲನಕ್ಷೆ ರೂಪಿಸಿದರು. ಆದ್ದರಿಂದಲೇ ಈ ರಾಷ್ಟ್ರಗಳು ತಮ್ಮ ಅಗತ್ಯಗಳಿಗೆ ಅಮೆರಿಕವನ್ನು ಅಲಂಬಿಸುವುದರ ಬದಲು, ಪರಸ್ಪರ ಅವಲಂಬಿಸುವ ಹೊಸ ದಾರಿಯನ್ನು ಕಂಡುಕೊಂಡವು. ವಿಶ್ವ ಬ್ಯಾಂಕ್‍ಗೆ ಪರ್ಯಾಯವಾಗಿ ದಿ ಬ್ಯಾಂಕ್ ಆಫ್ ಸೌತ್ ಎಂಬ ಸಂಸ್ಥೆಯನ್ನು ಸ್ಥಾಪಿಸಿದರು. ಬಹುಶಃ ಅಮೆರಿಕವನ್ನು ಮತ್ತು ಅದರ ನೆರವನ್ನು ಅವಲಂಬಿಸದೇ ಬದುಕುವ ಹೊಸ ಸಾಧ್ಯತೆಯನ್ನು ನಿಜಗೊಳಿಸುವತ್ತ ಅವರು ಯಶಸ್ವಿಯಾಗುತ್ತಿರುವುದನ್ನು ಮನಗಂಡೇ 2009ರಲ್ಲಿ ಅವರನ್ನು ಮತ್ತು ಬೊಲಿವಿಯನ್‍ನ ಅಧ್ಯಕ್ಷ ಇವೊ ಮಾರೆಲ್ಸ್ ರನ್ನು ಕೊಲ್ಲಲು CIA  ಶ್ರಮಿಸಿರಬೇಕು. ವಿಮಾನದಲ್ಲಿ ಇವರಿಬ್ಬರು ಸಾಲ್ವಡೋರ್‍ಗೆ ಪ್ರಯಾಣಿಸುತ್ತಿದ್ದಾಗ ಪೊಸಾಡ ಕ್ಯಾರಿಲ್ಸ್ ಎಂಬ ಲಾಂಚರ್ ತಜ್ಞನ ಮುಖಾಂತರ ರಾಕೆಟ್ ಹಾರಿಸಿ ವಿಮಾನವನ್ನು ಉರುಳಿಸಲು CIA ಪ್ರಯತ್ನಿ ಸಿತ್ತು. ಅಲ್ಲದೇ 2002ರಲ್ಲಿ ವೆನೆಜುವೇಲದ ಕೆಲವು ಅತೃಪ್ತ ಮಿಲಿಟರಿ ಅಧಿಕಾರಿಗಳು ಚಾವೇಝ್‍ರನ್ನು 48 ಗಂಟೆಗಳ ಕಾಲ ದಿಗ್ಬಂಧನದಲ್ಲಿರಿಸಿ ಕ್ಷಿಪ್ರ ಕ್ರಾಂತಿಗೆ ಮುಂದಾದಾಗ, ಅಷ್ಟು ಸಣ್ಣ ಅವಧಿಯೊಳಗೆ ಅಮೆರಿಕ ಮತ್ತು IMF  ಆ ಹೊಸ ಸರಕಾರಕ್ಕೆ ಬೆಂಬಲ ಸಾರಿತ್ತು. ಆದರೆ ಆ ಬಳಿಕ ವೆನೆಝುವೇಲದ ಜನರೇ ದಂಗೆಯೆದ್ದು ಕ್ಷಿಪ್ರಕ್ರಾಂತಿಯನ್ನು ವಿಫಲಗೊಳಿಸಿದ್ದರು.
   ಹೀಗಿರುವಾಗ,
ಮುಂದೊಂದು ದಿನ ಅಮೆರಿಕದ ಜನರೇ ದಂಗೆಯೆದ್ದು ಚಾವೇಝ್‍ರ ‘ದೆವ್ವ’(ಅಮೆರಿಕನ್  ಸಾಮ್ರಾಜ್ಯಶಾಹಿ ನೀತಿ)ವನ್ನು ಪದಚ್ಯುತಗೊಳಿಸಲೂಬಹುದಲ್ಲವೇ? ಯಾರಿಗೆ ಗೊತ್ತು?

ಈ ಬ್ಲ್ಯಾಕ್ ನ ಎದುರು ಆ ಯೆಲ್ಲೋ ಏನೇನೂ ಅಲ್ಲ..

1. ಗಾಬರಿ ಹುಟ್ಟಿಸುವ, ತಪ್ಪು ದಾರಿಗೆಳೆಯುವ ಶೀರ್ಷಿಕೆಗಳು.
2. ಅನಗತ್ಯವಾಗಿ ಮತ್ತು ಧಾರಾಳವಾಗಿ ಚಿತ್ರಗಳನ್ನು ಬಳಸುವುದು.
3. ಸುಳ್ಳು ಸುದ್ದಿಗಳನ್ನು ಕಲ್ಪಿತ ವಿವರಣೆಗಳೊಂದಿಗೆ ಕೊಡುವುದು.
4. ಸುದ್ದಿಗಳು ಉತ್ಪ್ರೇಕ್ಷಿತವಾಗಿ ಅತಿ ಭಾವುಕತೆಯಿಂದ ಕೂಡಿರುವುದು.
   ಯೆಲ್ಲೋ ಜರ್ನಲಿಝಮ್ (Yellow journalism - ಪೀತ ಪತ್ರಿಕೋದ್ಯಮ) ಎಂಬ ಪದ ಪ್ರಯೋಗವಾದಾಗಲೆಲ್ಲಾ ಅಮೇರಿಕದ ಫ್ರಾಂಕ್ ಲುದರ್‍ಮೋಟ್ ನೆನಪಾಗುತ್ತಾನೆ. ಪುಲಿಟ್ಝರ್ ಪ್ರಶಸ್ತಿ ವಿಜೇತ ಪತ್ರಕರ್ತನಾಗಿರುವ ಈತ, ಪೀತ ಪತ್ರಿಕೋದ್ಯಮದ ಲಕ್ಷಣಗಳನ್ನು ಮೊತ್ತಮೊದಲು ಪಟ್ಟಿ ಮಾಡಿದಾತ. ಆವರೆಗೆ ಯೆಲ್ಲೋ ಜರ್ನಲಿಝಮ್ ಎಂಬ ಪದ ಅಷ್ಟಾಗಿ ಚಾಲ್ತಿಯಲ್ಲಿರಲಿಲ್ಲ. ಓದುಗರಲ್ಲೂ ಆ ಬಗ್ಗೆ ಖಚಿತ ಅಭಿಪ್ರಾಯವಿರಲಿಲ್ಲ. ನಿಜವಾದ ಪತ್ರಿಕೋದ್ಯಮವೆಂದರೆ ‘ಇದು’ ಮತ್ತು ‘ಇದಲ್ಲ’ ಎಂದು ದೃಢವಾಗಿ ಹೇಳುವಂಥ ಪ್ರಯತ್ನಗಳೂ ಆ ವರೆಗೆ ನಡೆದಿರಲಿಲ್ಲ. ಆದರೆ 1896ರ ಬಳಿಕ ಅಮೇರಿಕದಲ್ಲಿ ಕಾಣಿಸಿಕೊಂಡ ಈ ಯೆಲ್ಲೋ ಜರ್ನಲಿಝಮನ್ನು ಅತ್ಯಂತ ಆಸಕ್ತಿಯಿಂದ ಗಮನಿಸಿಕೊಂಡು ಬಂದ ಫ್ರಾಂಕ್, 1941ರಲ್ಲಿ ಮೇಲಿನಂತೆ ಅದರ ಲಕ್ಷಣಗಳನ್ನು ಪಟ್ಟಿ ಮಾಡಿದ. ಅದು ವ್ಯವಸ್ಥೆ ಮತ್ತು ಸಮಾಜದ ಮೇಲೆ ಬೀರುವ ಅಡ್ಡ ಪರಿಣಾಮಗಳ ಬಗ್ಗೆಯೂ ವಿವರಿಸಿದ. ಆತನ ಈ ಅಧ್ಯಯನಕ್ಕೆ ಕಾರಣವೂ ಇದೆ..
1 ಜೋಸೆಫ್ ಪುಲಿಟ್ಝರ್
2 ವಿಲಿಯಂ ರ್ಯಾಂಡಲ್ಪ್ ಹಸ್ರ್ಟ್
   ಯೆಲ್ಲೋ ಜರ್ನಲಿಝಮ್‍ಗೆ ಜನ್ಮ ಕೊಟ್ಟದ್ದೇ ಈ ಇಬ್ಬರು ಅಮೇರಿಕದ ಪತ್ರಿಕೋದ್ಯಮಿಗಳು. 1883ರಲ್ಲಿ ದಿ ನ್ಯೂಯಾರ್ಕ್ ವರ್ಲ್ದ್  ಎಂಬ ಪತ್ರಿಕೆಯನ್ನು ಜೋಸೆಫ್ ಪುಲಿಟ್ಝರ್ ಖರೀದಿಸಿದ. ಆಗ ಆ ಪತ್ರಿಕೆಯ ಪ್ರಸಾರ ಸಂಖ್ಯೆ ತೀರಾ ತಳಮಟ್ಟದಲ್ಲಿತ್ತು. ಆತ ಪತ್ರಿಕೆಯ ಇಡೀ ಸ್ವರೂಪವನ್ನೇ ಬದಲಿಸಲು ತೀರ್ಮಾನಿಸಿದ. ಪತ್ರಿಕೆಯ ದರವನ್ನು ಇಳಿಸಿದ. ಪುಟಗಳನ್ನು 12ಕ್ಕೆ ಏರಿಸಿದ. ಆವತ್ತು ಇತರ ಪತ್ರಿಕೆಗಳು ಅಷ್ಟೇ ದರದಲ್ಲಿ ಕೇವಲ 4 ಪುಟಗಳನ್ನಷ್ಟೇ ನೀಡುತ್ತಿದ್ದವು. ಅಲ್ಲದೇ ಪತ್ರಿಕೆಯಲ್ಲಿ ಕ್ರೈಮ್ ನ್ಯೂಸ್‍ಗಳಿಗೆ ಮುಖಪುಟದಲ್ಲೇ ಜಾಗ ಕೊಟ್ಟ. ರಸವತ್ತಾದ, ಮಸಾಲೆಭರಿತ ಸುದ್ದಿಗಳನ್ನು ಧಾರಾಳ ಕೊಡತೊಡಗಿದ. ಈ ಮೂಲಕ ಓದುಗರಲ್ಲಿ ಒಂದು ಬಗೆಯ ಥ್ರಿಲ್ ಅನ್ನು ಹುಟ್ಟಿಸಲು ಪುಲಿಟ್ಝರ್ ಯಶಸ್ವಿಯಾದ. ಹೀಗೆ ಕೇವಲ ಎರಡೇ ವರ್ಷಗಳಲ್ಲಿ ಇಡೀ ನ್ಯೂಯಾರ್ಕ್ ನಗರದಲ್ಲೇ ಅತ್ಯಂತ ಹೆಚ್ಚು ಖರ್ಚಾಗುವ ಪತ್ರಿಕೆಯಾಗಿ ನ್ಯೂಯಾರ್ಕ್ ವರ್ಲ್ದ್  ಅನ್ನು ತಂದು ನಿಲ್ಲಿಸಿದ. ನಿಜವಾಗಿ, ಸಮಸ್ಯೆ ಪ್ರಾರಂಭವಾದದ್ದೇ ಇಲ್ಲಿ. ಹಾರ್ವರ್ಡ್ ಯುನಿವರ್ಸಿಟಿಯಲ್ಲಿ ಕಲಿಯುತ್ತಿದ್ದ ವಿಲಿಯಂ ರಾಂಡಲ್ಪ್ ಹರ್ಸ್ಟ್  ಎಂಬ ವಿದ್ಯಾರ್ಥಿ ಈ ಬೆಳವಣಿಗೆಯನ್ನು ಆಸಕ್ತಿಯಿಂದ ಗಮನಿಸುತ್ತಿದ್ದ. ಸಣ್ಣ ಅವಧಿಯಲ್ಲಿ ಪುಲಿಟ್ಝರ್ ಏರಿದ ಎತ್ತರ ಆತನನ್ನು ಚಕಿತಗೊಳಿಸಿತ್ತು. ಅಲ್ಲದೇ ಹರ್ಸ್ಟ್ ನ ತಂದೆಯು ‘ಸ್ಯಾನ್ ಫ್ರಾನ್ಸಿಸ್ಕೋ ಎಕ್ಸಾಮಿನರ್’ ಎಂಬ ಪತ್ರಿಕೆಯನ್ನು ನಡೆಸುತ್ತಿದ್ದುದರಿಂದ ಆತನ ಕುತೂಹಲ ಸಹಜವೂ ಆಗಿತ್ತು. ಅಪ್ಪನಿಂದ ‘ಎಕ್ಸಾಮಿನರ್’ ಪತ್ರಿಕೆಯನ್ನು ಪಡಕೊಂಡ ಆತ, ಶೇ. 25ರಷ್ಟು ಜಾಗವನ್ನು ಕ್ರೈಮ್ ನ್ಯೂಸ್‍ಗೇ ಮೀಸಲಿಟ್ಟ. ಇದರ ಮಧ್ಯೆಯೇ, ದಿ ನ್ಯೂಯಾರ್ಕ್ ಜರ್ನಲ್ ಎಂಬ ಪತ್ರಿಕೆಯನ್ನು 1895ರಲ್ಲಿ ಖರೀದಿಸಿದ. ಮಾತ್ರವಲ್ಲ, ನ್ಯೂಯಾರ್ಕ್ ವರ್ಲ್ದ್ ನೊಂದಿಗೆ ಸೆಣಸುವುದಕ್ಕಾಗಿ ದರ ಸಮರಕ್ಕಿಳಿದ. ಪತ್ರಿಕೆಯ ಬೆಲೆಯನ್ನು ಇಳಿಸಿದ. ಭಾವುಕ ಶೀರ್ಷಿಕೆ, ನೈತಿಕ-ಅನೈತಿಕತೆಯನ್ನು ಪರಿಗಣಿಸದ ಚಿತ್ರಗಳು ಮತ್ತು ಮಸಾಲೆ ಲೇಪಿತ ವಿವರಗಳನ್ನು ಪತ್ರಿಕೆಯಲ್ಲಿ ಕೊಡತೊಡಗಿದ. ಎರಡೇ ವರ್ಷಗಳಲ್ಲಿ ನ್ಯೂಯಾರ್ಕ್ ಜರ್ನಲ್‍ನ ಪ್ರಸಾರ ಸಂಖ್ಯೆಯು ನ್ಯೂಯಾರ್ಕ್ ವರ್ಲ್ದ್ ನ  ಪ್ರಸಾರ ಸಂಖ್ಯೆಗೆ ಸಮವಾಗುವಷ್ಟರ ಮಟ್ಟಿಗೆ ಏರಿಬಿಟ್ಟಿತು. ಒಂದು ರೀತಿಯಲ್ಲಿ ಯೆಲ್ಲೋ ಜರ್ನಲಿಝಮ್ ಹುಟ್ಟು ಪಡೆದದ್ದೇ ಇಲ್ಲಿ. ಆದರೆ ಅದು ಅಷ್ಟಕ್ಕೇ ನಿಲ್ಲಲಿಲ್ಲ.
   ಅಮೇರಿಕ - ಸ್ಪೈನ್ ನಡುವೆ ಯುದ್ಧ..
ಬಹುತೇಕ 1800ರಲ್ಲಿಯೇ ಕ್ಯೂಬಾವು ಸ್ಪೈನ್‍ನ ವಸಾಹತು ಆಗಿತ್ತು. ಈ ವಸಾಹತಿನ ವಿರುದ್ಧ ಕ್ಯೂಬಾದಲ್ಲಿ ಬಂಡಾಯವೂ ಕಾಣಿಸಿಕೊಂಡಿತ್ತು. ಆದರೆ ಸ್ಪೈನ್ ಸುಲಭದಲ್ಲಿ ಈ ಬಂಡಾಯಕ್ಕೆ ಮಣಿಯುವಂತೆ ಕಾಣುತ್ತಿರಲಿಲ್ಲ. ತನ್ನ ನೆರೆಯಲ್ಲಿ ನಡೆಯುತ್ತಿದ್ದ ಈ ಬೆಳವಣಿಗೆಯನ್ನು ಅಮೇರಿಕ ಆಸಕ್ತಿಯಿಂದ ಗಮನಿಸುತ್ತಿತ್ತು. ಕ್ಯೂಬಾದ ಮೇಲೆ ಸ್ಪೈನ್ ಹಕ್ಕು ಸಾಧಿಸುವುದು ಅಮೇರಿಕಕ್ಕೆ ಎಳ್ಳಷ್ಟೂ ಇಷ್ಟವಿರಲಿಲ್ಲ. 1823ರಲ್ಲೇ ಸ್ಪೈನ್‍ಗೆ ಅದು ಎಚ್ಚರಿಕೆಯನ್ನೂ ಕೊಟ್ಟಿತ್ತು. ಈ ಮಧ್ಯೆ 1898ರಲ್ಲಿ ಅಮೇರಿಕದ USS ಮೈನೆ ಎಂಬ ಹಡಗು ಕ್ಯೂಬಾದ ಹವಾನಾ ಬಂದರಿನಲ್ಲಿ ಅನುಮಾನಾಸ್ಪದವಾಗಿ ಮುಳುಗಿಬಿಟ್ಟಿತು. ಅದಾಗಲೇ ಬದ್ಧ ವೈರಿಗಳಂತೆ ಕಾದಾಟದಲ್ಲಿ ತೊಡಗಿದ್ದ ನ್ಯೂಯಾರ್ಕ್ ಜರ್ನಲ್ ಮತ್ತು ನ್ಯೂಯಾರ್ಕ್ ವರ್ಲ್ದ್ ಗಳು ಈ ಸುದ್ದಿಗೆ ತಮ್ಮಿಷ್ಟದ ವ್ಯಾಖ್ಯಾನಗಳನ್ನು ಕೊಡತೊಡಗಿದುವು. ಹಡಗನ್ನು ಯಾರು ಮುಳುಗಿಸಿರಬಹುದು ಎಂಬ ಚರ್ಚೆಯನ್ನು ಪ್ರಾರಂಭಿಸಿ ಕಪೋಲ ಕಲ್ಪಿತ ವಿವರಗಳನ್ನು ಸೃಷ್ಟಿ ಮಾಡಿದುವು. ಅಮೇರಿಕದ ಅಧ್ಯಕ್ಷ  ವಿಲಿಯಂ ಮೆಕಿನ್ಲೆಗೆ ಗೊತ್ತಿಲ್ಲದ ಗುಪ್ತ ಮಾಹಿತಿಗಳನ್ನು ಅವು ಪ್ರಕಟಿಸಿದುವು. ಇಷ್ಟಕ್ಕೂ, ಆ ವರದಿಗಳಿಗೆ  ಆಧಾರಗಳಿತ್ತು ಎಂದಲ್ಲ. ಆಧಾರಗಳಿರುವ ಸುದ್ದಿಗಳನ್ನು ಮಾತ್ರ ಪ್ರಕಟಿಸಬೇಕೆಂಬ ಮೂಲ ತತ್ವಗಳಿಂದ ಅವೆರಡೂ ಯಾವಾಗಲೋ ಹೊರಹೋಗಿತ್ತು. ಆದ್ದರಿಂದಲೇ ರಂಗುರಂಗಾದ, ಕುತೂಹಲಕರ ಸುದ್ದಿ, ವಿಶ್ಲೇಷಣೆ ಗಳು ದಿನಾ ಬರತೊಡಗಿದುವು. ಹಡಗನ್ನು ಮುಳುಗಿಸಿದ್ದು ಸ್ಪೈನ್ ಎಂದು ಅವು ಸ್ವತಃ ಕಂಡಂತೆ ಬರೆದುವು. ಸ್ಪೈನ್‍ನ ದಬ್ಬಾಳಿಕೆ, ಕ್ಯೂಬನ್ನರ ಅಸಹಾಯಕತೆಯ ಕತೆಗಳು ಧಾರಾಳ ಅಚ್ಚಾಗತೊಡಗಿದುವು. ಪತ್ರಿಕೆಗಳ ಸುದ್ದಿಗಳಿಂದ ಪ್ರಭಾವಿತರಾದ ಅಮೇರಿಕನ್ನರು ಸ್ಪೈನ್ ವಿರುದ್ಧ ಸಿಟ್ಟಾಗತೊಡಗಿದರು. ಕೊನೆಗೆ ಸಾರ್ವಜನಿಕ ಒತ್ತಡಕ್ಕೆ ಮಣಿದು ಅಧ್ಯಕ್ಷ  ಮೆಕಿನ್ಲೆ, ಸ್ಪೈನ್‍ನ ವಿರುದ್ಧ ಯುದ್ಧ ಸಾರಬೇಕಾಯಿತು. ಯುದ್ಧದ ಸಚಿತ್ರ ವರದಿ, ಪೋಟೋಗಳನ್ನು ಪಡಕೊಳ್ಳುವುದಕ್ಕಾಗಿ ಎರಡೂ ಪತ್ರಿಕೆಗಳು ತಮ್ಮ ವರದಿಗಾರರನ್ನು ಕಳುಹಿಸಿದುವು. ಅವರಲ್ಲಿ ನ್ಯೂಯಾರ್ಕ್ ಜರ್ನಲ್‍ನ ಫೆಡ್ರಿಕ್ ರೆಮಿಂಗ್ಟನ್ ಎಂಬ ಕಲಾವಿದನೂ (ಕುಂಚದಲ್ಲಿ ಯುದ್ಧದ ಚಿತ್ರ ಬಿಡಿಸುವವ) ಸೇರಿದ್ದ. ಆತ ಅಲ್ಲಿಗೆ ಹೋಗಿ ನೋಡುವಾಗ, ಪತ್ರಿಕೆಯಲ್ಲಿ ಪ್ರಕಟವಾದಂಥ ಸನ್ನಿವೇಶವೇನೂ ಕಾಣಿಸಲಿಲ್ಲ. ಪತ್ರಿಕೆಯಲ್ಲಿ ಏನೆಲ್ಲ ಪ್ರಕಟವಾಗುತ್ತಿತ್ತೋ ಅವೆಲ್ಲ ಕಲ್ಪಿತ ಎನ್ನುವುದು ಆತನಿಗೆ ಮನವರಿಕೆಯಾಗಿ ಬಿಟ್ಟಿತ್ತು. ವರದಿ ಮಾಡಲು ಕುತೂಹಲ ಕಾರಿಯಾದಂಥ ಏನೊಂದೂ ಇಲ್ಲವೆಂದ ಮೇಲೆ ಆತ ಅಲ್ಲಿರುವ ಅಗತ್ಯವಾದರೂ ಏನಿರುತ್ತದೆ? ಆದ್ದರಿಂದ ಆತ, 'ನನ್ನನ್ನು ಹಿಂದಕ್ಕೆ ಕರೆಸಿಕೊಳ್ಳಿ, ಇಲ್ಲಿ ಯುದ್ಧವೇ ನಡೀತಿಲ್ಲ..' ಎಂದು ಹರ್ಸ್ಟ್ ಗೆ ಟೆಲಿಗ್ರಾಮ್ ಕಳುಹಿಸಿದ. ಆದರೆ, 'ನೀನು ಅಲ್ಲೇ ಇದ್ದು ನನಗೆ ಚಿತ್ರವನ್ನು (ಯುದ್ಧದ ಕಲ್ಪಿತ ಚಿತ್ರ) ಒದಗಿಸು,  ನಾನು ಯುದ್ಧ ವನ್ನು ಒದಗಿಸುತ್ತೇನೆ' (you furnish the pictures and i will furnish the war) ಎಂದು ಹರ್ಸ್ಟ್ ಮರಳಿ ಉತ್ತರ ಕೊಟ್ಟ.
   ಹೀಗೆ ತನ್ನ ಸುಳ್ಳು, ಉತ್ಪ್ರೇಕ್ಷಿತ ಪತ್ರಿಕೋದ್ಯಮದ (ಯೆಲ್ಲೋ ಜರ್ನಲಿಝಂ) ಮೂಲಕ ಅಮೇರಿಕವನ್ನು ಯುದ್ಧಕ್ಕೆ ದೂಡುವಲ್ಲಿ ಮತ್ತು ಪತ್ರಿಕೆಯ ಪ್ರಸಾರ ಸಂಖ್ಯೆಯನ್ನು ಹೆಚ್ಚಿಸುವಲ್ಲಿ ಹರ್ಸ್ಟ್  ಯಶಸ್ವಿಯಾದ. ಅಂದಹಾಗೆ,
   ಇಂಥ ಪತ್ರಿಕೋದ್ಯಮ 19ನೇ ಶತಮಾನದ ಪಿಡುಗಾಗಿಯಷ್ಟೇ ಇವತ್ತು ಉಳಿದಿದೆಯೇ? ಮೊನ್ನೆಯ ಹೈದಬಾರಾದ್ ಸ್ಫೋಟದ ಸಮಯದಲ್ಲಿ ಹೆಚ್ಚಿನ ಪತ್ರಿಕೆ ಮತ್ತು ಚಾನೆಲ್‍ಗಳು ಕಾಯ್ದುಕೊಂಡ ಸಂಯಮವನ್ನು ಈ ಹಿಂದಿನ ಎಷ್ಟು ಸಂದರ್ಭಗಳಲ್ಲಿ ಕಾಯ್ದುಕೊಂಡಿವೆ? ಈ ಹಿಂದೆ ಅವು ಪ್ರಕಟಿಸಿದ ಚಿತ್ರಗಳು, ವಿಶ್ಲೇಷಣೆಗಳು, ಮುಖಪುಟ ಶೀರ್ಷಿಕೆಗಳೆಲ್ಲ ಯಾವ ಯೆಲ್ಲೋ ಜರ್ನಲಿಝಮ್‍ಗಿಂತ ಕಡಿಮೆಯಿದ್ದುವು? 6 ತಿಂಗಳ ಹಿಂದೆ ಪತ್ರಕರ್ತ ಮುತೀಉರ್ರಹ್ಮಾನ್ ಸಹಿತ ಕೆಲವು ಯುವಕರನ್ನು ಬೆಂಗಳೂರಿನ ಪೊಲೀಸರು ಬಂಧಿಸಿದರಲ್ಲ, ಆ ಸಂದರ್ಭದಲ್ಲಿ ಮಾಧ್ಯಮಗಳು ವರ್ತಿಸಿದ ರೀತಿ ಹೇಗಿತ್ತು? 19ನೇ ಶತಮಾನದ ನ್ಯೂಯಾರ್ಕ್ ವರ್ಲ್ದ್  ಮತ್ತು ಜರ್ನಲ್‍ಗಳನ್ನು ನಾಚಿಸುವಷ್ಟು ಅವು ಯೆಲ್ಲೋ  ಪೀಡಿತವಾಗಿರಲಿಲ್ಲವೇ? ವಿಲಿಯಂ ಹರ್ಸ್ಟ್  ಮತ್ತು ಪುಲಿಟ್ಝರ್‍ನನ್ನೂ ಮೀರಿಸುವ ಸಾಹಸವನ್ನು ನಮ್ಮ ಕೆಲವು ಪತ್ರಕರ್ತರು ಮಾಡಿದ್ದನ್ನು ಮರೆಯಲಾದೀತೇ? 19ನೇ ಶತಮಾನದಲ್ಲಿ ಪ್ರಾರಂಭವಾದ ಈ ಯೆಲ್ಲೋ ಜರ್ನಲಿಝಮ್ ಈ 21ನೇ ಶತಮಾನದಲ್ಲೂ ಮುಂದುವರಿಯುತ್ತದೆಂದರೆ ಮತ್ತು ಅದನ್ನು ನಿರ್ಲಜ್ಜೆಯಿಂದ ಸಮರ್ಥಿಸಿಕೊಳ್ಳಲಾಗುತ್ತದೆಂದರೆ, ಅದಕ್ಕೆ ಏನೆನ್ನ ಬೇಕು? ಮಾಧ್ಯಮಗಳನ್ನು ನಿಯಂತ್ರಿಸುವುದಕ್ಕೂ ಒಂದು ಸಂಸ್ಥೆಯಿರಬೇಕು ಎಂಬ ಒತ್ತಾಯಕ್ಕೆ ಇಂಥ ಘಟನೆಗಳನ್ನು ಯಾಕೆ ಆಧಾರವಾಗಿ ಎತ್ತಿಕೊಳ್ಳಬಾರದು? ಇಷ್ಟಕ್ಕೂ, ಇವತ್ತು ಹೆಚ್ಚಿನ ಮಾಧ್ಯಮಗಳು ಉದ್ದಿಮೆದಾರರ ಕೈಯಲ್ಲೇ ಇವೆ. ಲಾಭವೇ ಇವರ ಮುಖ್ಯ ಗುರಿ. ಅದು ತಪ್ಪು ಎಂದಲ್ಲ. ಆದರೆ ಅದಕ್ಕಾಗಿ ಸಮಾಜವನ್ನು ಪೀಡಿಸಿ, ಬೆತ್ತಲೆಗೊಳಿಸಿ, ಅವಮಾನಿಸುವುದನ್ನು ಯಾಕೆ ಸಹಿಸಬೇಕು? ಮಾಧ್ಯಮ ಕ್ಷೇತ್ರವೊಂದನ್ನು ಬಿಟ್ಟು ಉಳಿದ ಕ್ಷೇತ್ರಗಳನ್ನು ಒಮ್ಮೆ ಅವಲೋಕಿಸಿಕೊಳ್ಳಿ. ನ್ಯಾಯವಾದಿಗಳು ತಮ್ಮ ವೃತ್ತಿ ಬದುಕಿನಲ್ಲಿ ತಪ್ಪು ಮಾಡಿದರೆ ಅವರ ಲೈಸೆನ್ಸನ್ನು ರದ್ದುಪಡಿಸುವ ಅಥವಾ ಅಮಾನತ್ತಿನಲ್ಲಿಡುವ ಅಧಿಕಾರ ಬಾರ್ ಕೌನ್ಸಿಲ್‍ಗಿದೆ. ಸುಪ್ರೀಮ್ ಕೋರ್ಟ್‍ ನ  ನ್ಯಾಯಾಧೀಶರು ಅಥವಾ ಹೈಕೋರ್ಟಿನ ನ್ಯಾಯಾಧೀಶರು 'ಕ್ರಮ' ತಪ್ಪಿದರೆ ಪಾರ್ಲಿಮೆಂಟ್  ವಾಗ್ದಂಡನೆ (Impeachment) ವಿಧಿಸುತ್ತದೆ. ಇದೇ ರೀತಿ ವೈದ್ಯರು, ಚಾರ್ಟರ್ಡ್ ಅಕೌನ್ ಟೆನ್ಸ್ ಗಳೆಲ್ಲ ವೃತ್ತಿ ಬದುಕಿನ ಗೌರವವನ್ನು ಕಾಪಾಡದಿದ್ದರೆ ಸಂಬಂಧಿತ ಸಂಸ್ಥೆಗಳು ಕ್ರಮ ಜರುಗಿಸುತ್ತವೆ. ಹಾಗಂತ ಮಾಧ್ಯಮ ಕ್ಷೇತ್ರದಲ್ಲಿ ಇಂಥದ್ದೊಂದು ಸಂಸ್ಥೆ ಇರದಿರುವುದಕ್ಕೆ ಕಾರಣವೇನು? ಮಾಧ್ಯಮಗಳು ತಮ್ಮನ್ನು ಸ್ವಯಂ ನಿಯಂತ್ರಿಸಿಕೊಳ್ಳಲಾರವು ಎಂಬುದಕ್ಕೆ 'ಸ್ಫೋಟ' ಪ್ರಕರಣಗಳ ಸಂದರ್ಭಗಳಲ್ಲಿ ಪ್ರಕಟವಾಗುವ ಸುದ್ದಿಗಳೇ ಪುರಾವೆಯಲ್ಲವೇ? ಇಷ್ಟಿದ್ದೂ, ಮಾಧ್ಯಮ ಪ್ರಮುಖರೇಕೆ 'ಸ್ವನಿಯಂತ್ರಣ' ಹಕ್ಕಿನ ಬಗ್ಗೆ ವಾದಿಸುತ್ತಿದ್ದಾರೆ? ಇತರೆಲ್ಲ ಕ್ಷೇತ್ರಗಳಿಗೆ ಸಾಧ್ಯವಾಗದ ಸ್ವನಿಯಂತ್ರಣವು ಮಾಧ್ಯಮ ಕ್ಷೇತ್ರಕ್ಕೆ ಸಾಧ್ಯ ಎಂದು - ಅದೂ ಇಷ್ಟೆಲ್ಲಾ ವೈಫಲ್ಯಗಳ ಬಳಿಕವೂ - ವಾದಿಸುವುದು ಎಷ್ಟು ಸರಿ? ಈ ದೇಶದಲ್ಲಿ ಕಳ್ಳತನಕ್ಕೆ ಪ್ರತ್ಯೇಕವಾದ ದಂಡಸಂಹಿತೆ ಇದೆ. ಅತ್ಯಾಚಾರಕ್ಕೆ, ಮೋಸಕ್ಕೆ, ಕೊಲೆ.. ಹೀಗೆ ಎಲ್ಲದಕ್ಕೂ ಬೇರೆ ಬೇರೆ ಕಾನೂನುಗಳಿವೆ. ಹಾಗಂತ, ಈ ದಂಡಸಂಹಿತೆಗಳನ್ನೆಲ್ಲಾ ರದ್ದುಪಡಿಸಿಬಿಡಿ, ನಾವು ಸ್ವಯಂ ನಿಯಂತ್ರಣ ಮಾಡಿಕೊಳ್ಳುತ್ತೇವೆ ಎಂದು ಕಳ್ಳರು, ಅತ್ಯಾಚಾರಿಗಳು, ವಂಚಕರು ಹೇಳಿದರೆ ಅದನ್ನು ಒಪ್ಪಿಕೊಳ್ಳಲಾಗುತ್ತಾ?
   ವಿಲಿಯಂ ಹರ್ಸ್ಟ್  ಮತ್ತು ಪುಲಿಟ್ಝರ್ 19ನೇ ಶತಮಾನದಲ್ಲಿ ಪ್ರಾರಂಭಿಸಿದ ಯೆಲ್ಲೋ ಜರ್ನಲಿಝಮನ್ನು ಇವತ್ತು ಹೆಚ್ಚಿನೆಲ್ಲಾ ಮಾಧ್ಯಮ ಕೇಂದ್ರಗಳೂ ಗೌರವಪೂರ್ವಕ ನೆಚ್ಚಿಕೊಂಡಿವೆ. ಉತ್ಪ್ರೇಕ್ಷಿತ, ಕಪೋಲ ಕಲ್ಪಿತ, ಸುಳ್ಳು ಸುದ್ದಿಗಳು ಮತ್ತು ಶೀರ್ಷಿಕೆಗಳನ್ನೇ ಹೆಚ್ಚಿನ ಪತ್ರಿಕೆಗಳು ತಮ್ಮ ಮಾರಾಟ ತಂತ್ರವಾಗಿ ಅಳವಡಿಸಿಕೊಂಡಿವೆ. ಇಂಥ ಹೊತ್ತಲ್ಲಿ, 19ನೇ ಶತಮಾನದ ಹರ್ಸ್ಟ್ ನನ್ನೋ ಪುಲಿಟ್ಝರ್ ನನ್ನೋ ದೂರಿ ಪ್ರಯೋಜನವಿಲ್ಲ. ಬುದ್ಧಿವಂತಿಕೆ, ಸುದ್ದಿ ಸೃಷ್ಟಿಸುವಿಕೆ, ಮಾರಾಟ ತಂತ್ರದಲ್ಲಿ ಅವರಿಬ್ಬರನ್ನೂ ಮೀರಿಸುವ ನಿಪುಣರು ಇವತ್ತು ಮಾಧ್ಯಮ ಕೇಂದ್ರದಲ್ಲಿ ಕೂತಿದ್ದಾರೆ. ಬಹುಶಃ ಈಗಿನ ಪತ್ರಿಕೋದ್ಯಮಕ್ಕೆ ಯೆಲ್ಲೋದ ಬದಲು ಬ್ಲ್ಯಾಕ್ (ಕರಾಳ) ಜರ್ನಲಿಝಮ್ ಎಂಬ ಹೆಸರು ಸೂಕ್ತವಾದೀತೇನೋ?