ಕೊರೋನಾ ಹರಡಿದ್ದು ಮುಸ್ಲಿಮರು ಎಂದುದರಲ್ಲಿ ಆ ಮನೆಗೆಲಸದಾಕೆಯ ತಪ್ಪಿಲ್ಲ, ಅದು ಆಕೆಯ ಮಾತೂ ಅಲ್ಲ...

ಪ್ರಖರ ಜಾತ್ಯತೀತ ಮತ್ತು ಅತ್ಯಂತ ವಿಶ್ವಾಸಾರ್ಹವೆಂದು ಗುರುತಿಗೀಡಾಗಿರುವ ದ ಹಿಂದೂ ಪತ್ರಿಕೆಯು ಮಾರ್ಚ್ 26 ರಂದು ಪ್ರಕಟಿಸಿದ ಕಾರ್ಟೂನ್ ಒಂದು ಅದರ ಓದುಗ ವಲಯವನ್ನು ಮಾತ್ರವಲ್ಲ,  ಅದರ ವಿರೋಧಿಗಳನ್ನೂ ತಬ್ಬಿಬ್ಬುಗೊಳಿಸಿತ್ತು. ಕೊರೋನಾ ವೈರಸ್ ಜಗತ್ತನ್ನೇ ಒತ್ತೆಯಿಟ್ಟುಕೊಂಡಿದೆ ಎಂಬ ಸಂದೇಶವುಳ್ಳ ಆ ಕಾರ್ಟೂನ್‍ನಲ್ಲಿ ವೈರಸ್‍ಗೆ ಮುಸ್ಲಿಮರು ಧರಿಸುವ ಬಟ್ಟೆಯನ್ನು  ತೊಡಿಸಲಾಗಿತ್ತು. ದ ಹಿಂದೂವಿನಂಥ ಪತ್ರಿಕೆಯಿಂದ ಇಂಥದ್ದೊಂದು ಕಾರ್ಟೂನನ್ನು ನಿರೀಕ್ಷಿಸದ ಓದುಗರು ತಕ್ಷಣ ಆಕ್ಷೇಪ ವ್ಯಕ್ತಪಡಿಸಿದರು. ಪತ್ರಿಕೆಯ ಸಂಪಾದಕರನ್ನು ತರಾಟೆಗೆ ತೆಗೆದುಕೊಂಡರು.  ಸಂಪಾದಕರೂ ಅಷ್ಟೇ, ಶೀಘ್ರವಾಗಿ ಆಕ್ಷೇಪಗಳಿಗೆ ಸ್ಪಂದಿಸಿದರು. ಕ್ಷಮೆಯಾಚಿಸಿದರು. ಆ ಕಾರ್ಟೂನನ್ನು ಪ್ರಕಟಿಸಿದ ವಿಷಯದಲ್ಲಿ ಯಾವ ದುರುದ್ದೇಶವೂ ಇರಲಿಲ್ಲ ಎಂದು ಹೇಳಿದ ಪತ್ರಿಕೆ, ಆ ಕಾರ್ಟೂನನ್ನು ಅಳಿಸಿ ಹಾಕಿತು.
ಇಸ್ಲಾಮನ್ನು ಭೀತಿಕಾರಕವಾಗಿ ಬಿಂಬಿಸುವ ಪ್ರಚಾರಗಳಿಗೆ ಹೇಗೆ ಜಾತ್ಯತೀತ ಮನಸುಗಳು ಕೂಡ ಬಲಿಯಾಗಬಹುದು ಅನ್ನುವುದಕ್ಕೊಂದು ಉದಾಹರಣೆ ಇದು.
ಆತ್ಮೀಯ ರೈತ ಗೆಳೆಯರೊಬ್ಬರು ಎಪ್ರಿಲ್ 5 ರಂದು ತಮ್ಮ ಫೇಸ್‍ಬುಕ್‍ನಲ್ಲಿ ಹಂಚಿಕೊಂಡ ನಿಜ ಘಟನೆಯೊಂದನ್ನು ಇಲ್ಲಿ ಉಲ್ಲೇಖಿಸುವುದು ಸೂಕ್ತ ಎಂದು ಅನಿಸುತ್ತದೆ.
ಮಧ್ಯಾಹ್ನ ಸುಮಾರು ಒಂದು ಗಂಟೆ. ಮನೆಗೆಲಸದ ಮಹಿಳೆಯೂ ಸೇರಿದಂತೆ ಕುಟುಂಬ ಸಮೇತ ಟಿ.ವಿ. ನೋಡುತ್ತ ನಾವು ಊಟ ಮಾಡುತ್ತಿದ್ದೆವು. ಪ್ರಧಾನಿ ಮೋದಿಯವರು ಎಪ್ರಿಲ್ 9 ರಂದು ರಾತ್ರಿ  9 ಗಂಟೆಗೆ ದೀಪ ಉರಿಸಲು ಕರೆಕೊಟ್ಟ ಸುದ್ದಿ ಟಿವಿಯಲ್ಲಿ ಪ್ರಸಾರವಾಗುತ್ತಾ ಇತ್ತು. ಏಕಾಏಕಿ ನಮ್ಮ ಜೊತೆ ಕೂತು ಊಟ ಮಾಡುತ್ತಿದ್ದ ಕೆಲಸದ ಮಹಿಳೆ,
ಬ್ಯಾರಿಗಳಿಗೆ (ಮುಸ್ಲಿಮರಿಗೆ) ತುಂಬಾ ಅಹಂಕಾರ, ಇದೆಲ್ಲ (ಕೊರೋನಾ) ಆಗುತ್ತಿರುವುದು ಅವರಿಂದಲೇ' ಎಂದು ತುಳು ಭಾಷೆಯಲ್ಲಿ ಹೇಳಿದಳು. ಒಂದು ಕ್ಷಣ ನಾನು ಶಾಕ್ ಆದೆ. ಗಂಜಿ ಗಂಟಲಲ್ಲಿ  ಇಳಿಯಲಿಲ್ಲ. ಯಾಕೆಂದರೆ, ಆ ಮಹಿಳೆ ಸಣ್ಣ ಮಗುವಾಗಿದ್ದಾಗಲೇ ತಾಯಿಯನ್ನು ಕಳಕೊಂಡವಳು. ವಯಸ್ಸು 50 ದಾಟಿದ್ದರೂ ಮಲತಾಯಿಯಾಗಲೀ ಸೋದರರಾಗಲಿ ಆಕೆಗೆ ಮದುವೆ ಮಾಡಿಸಲು  ಪ್ರಯತ್ನ ನಡೆಸಿಲ್ಲ. ವರ್ಷದ 365 ದಿನವೂ ಕೂಲಿ ಕೆಲಸಕ್ಕೆ ಹೋಗುತ್ತಾಳೆ. ತನ್ನ ಸಂಪಾದನೆಯ ಮೇಲೆ ಆಕೆಗೆ ಯಾವ ಅಧಿಕಾರವೂ ಇಲ್ಲ. ವಿಶೇಷ ಏನೆಂದರೆ, ವರ್ಷಕ್ಕೆ ಒಂದು ಸಲವೂ ಈಕೆ ಪೇಟೆಗೆ  ಹೋದವಳಲ್ಲ. ಮುಸ್ಲಿಮರ ಸಂಪರ್ಕವೇ ಇಲ್ಲ. ಇವಳು ಸೋದರನ ಮನೆಯಲ್ಲಿ ವಾಸವಿದ್ದು, ಆತನೂ ಕೂಲಿ ಕೆಲಸಕ್ಕೆ ಹೋಗುತ್ತಾನೆ. ಅಲ್ಲದೆ, ಇವರ ಕುಟುಂಬಕ್ಕೆ ಯಾವ ಬ್ಯಾರಿಗಳಿಂದಲೂ  (ಮುಸ್ಲಿಮರು) ಯಾವ ಸಮಸ್ಯೆಯೂ ಆಗಿಲ್ಲ. ಇವರು ದಿನಬಳಕೆಯ ದಿನಸಿಗಳನ್ನು ಇದೇ ಊರಿನ ಚೆಯ್ಯಾಕನ(ಮುಸ್ಲಿಮ್) ಅಂಗಡಿಯಿಂದಲೇ ತರುತ್ತಾರೆ. ಈ ಮಹಿಳೆಯ ಬಗ್ಗೆ ನಮಗೆಲ್ಲ ಅನುಕಂಪ.  ತುಂಬಾ ಪಾಪದ ಹುಡುಗಿ. ಕಷ್ಟದ ಬದುಕು. ಹೀಗಿರುವಾಗ, ಕೊರೋನಾ ವೈರಸ್ ಬ್ಯಾರಿಗಳಿಂದ (ಮುಸ್ಲಿಮರಿಂದ) ಹರಡುತ್ತದೆ,
ಅವರಿಗೆ ಅಹಂಕಾರ, ಅವರಿಗೆ ಬುದ್ದಿ ಕಲಿಸಬೇಕು ಎಂಬೆಲ್ಲ ವಿಷಯಗಳನ್ನು ಅವಳ ಮನಸ್ಸಿಗೆ ತುಂಬಿದವರು ಯಾರು?”
ಗೆಳೆಯ ಎತ್ತಿದ ಈ ಪ್ರಶ್ನೆ ಅತ್ಯಂತ ಸಕಾಲಿಕ ಮತ್ತು ಸಾಮಾ ಜಿಕ ಅವಲೋಕನವೊಂದಕ್ಕೆ ಅತ್ಯಂತ ಸೂಕ್ತವೆಂದು ತೋರುತ್ತದೆ.
ಖ್ಯಾತ ಸಮಾಜ ಕಾರ್ಯಕರ್ತೆ ಕವಿತಾ ಕೃಷ್ಣನ್ ಅವರು ಎಪ್ರಿಲ್ 11 ರಂದು ಟ್ವಿಟರ್‍ನಲ್ಲಿ ವೀಡಿಯೊಂದನ್ನು ಪೋಸ್ಟ್ ಮಾಡಿದ್ದರು. ವೈರಲ್ ಆದ ಆ ವೀಡಿಯೋದಲ್ಲಿ ಅವರು ಮಾಧ್ಯಮಗಳನ್ನು ತೀವ್ರ  ತರಾಟೆಗೆ ಎತ್ತಿಕೊಂಡಿದ್ದರು. ಕೊರೋನಾ ವೈರಸನ್ನು ಕೊರೋನಾ ಜಿಹಾದ್ ಎಂದೋ, ಮದ್ರಸಾ ಹಾಟ್‍ಸ್ಪಾಟ್ ಎಂದೋ, ತಬ್ಲೀಗಿ ಟೆರರಿಸಂ ಎಂದೋ ಉಲ್ಲೇಖಿಸುವ ಮಾಧ್ಯಮ ನೀತಿಯನ್ನು  ಖಂಡಿಸುತ್ತಾ- `ಇದು ಜರ್ನಲಿಸಂ ಅಲ್ಲ, ಇತಿಹಾಸ ನಿಮ್ಮನ್ನು ನೆನಪಿಡಲಿದೆ. ನಿಮ್ಮನ್ನು ಜಡ್ಜ್ ಮಾಡಲಿದೆ' ಎಂದು ಭಾವುಕವಾಗಿ ಹೇಳಿದ್ದರು. ಅಷ್ಟಕ್ಕೂ,
ಮುಸ್ಲಿಮ್ ವ್ಯಾಪಾರಿಗಳಿಗೆ ಪ್ರವೇಶವಿಲ್ಲ ಎಂಬ ಭಿತ್ತಿಪತ್ರವು ಕರ್ನಾಟಕ, ತೆಲಂಗಾಣ, ದೆಹಲಿ, ಮಧ್ಯಪ್ರದೇಶವೂ ಸೇರಿದಂತೆ ವಿವಿಧ ಕಡೆ ಕಾಣಿಸಿಕೊಳ್ಳಲು ಏನು ಕಾರಣ? ಮುಸ್ಲಿಮರು ಉಗುಳಿನ ಮೂಲಕ,  ನೀರು, ಹಣ್ಣು-ಹಂಪಲು, ನೋಟು ಇತ್ಯಾದಿಗಳ ಮೂಲಕ ಇತರರಿಗೆ ಉದ್ದೇಶಪೂರ್ವಕವಾಗಿ ಸೋಂಕು ಹರಡುತ್ತಿದ್ದಾರೆ ಎಂಬ ವದಂತಿ ಜನಸಾಮಾನ್ಯರ ಬಳಿಗೂ ತಲುಪಿದ್ದು ಹೇಗೆ?
ಎಪ್ರಿಲ್ 1 ರಂದು ಕೊರೋನಾ ಜಿಹಾದ್ ಹ್ಯಾಶ್‍ಟ್ಯಾಗ್ ಟ್ವೀಟರ್ ನಲ್ಲಿ  ಟ್ರೆಂಡಿಂಗ್ ಆಗಿತ್ತು. ಮಾರ್ಚ್ 28 ರಿಂದ ಎಪ್ರಿಲ್ 3 ರ ಮಧ್ಯೆ ಕೊರೋನಾ ಜಿಹಾದ್ ಹ್ಯಾಶ್‍ಟ್ಯಾಗ್ 3 ಲಕ್ಷಕ್ಕಿಂತಲೂ ಹೆಚ್ಚು ಬಾರಿ  ಕಾಣಿಸಿಕೊಂಡಿದ್ದು, 165 ಮಿಲಿಯನ್‍ಗಿಂತಲೂ ಹೆಚ್ಚು ಮಂದಿ ಈ ಅವಧಿಯಲ್ಲೇ ವೀಕ್ಷಿಸಿರುವ ಸಾಧ್ಯತೆ ಇದೆಯೆಂದು ಟೈಮ್ಸ್ ಮ್ಯಾಗಸಿನ್ ಲೆಕ್ಕ ಹಾಕಿದೆ. ದೆಹಲಿಯ ವ್ಯಕ್ತಿಯೊಬ್ಬರು ಇತರರೆದುರು  ಉದ್ದೇಶ ಪೂರ್ವಕವಾಗಿ ಕೆಮ್ಮುತ್ತಾರೆ ಎಂಬ ಸುಳ್ಳು ವೀಡಿಯೋ ಕೂಡ ಇದೇ ಸಂದರ್ಭದಲ್ಲಿ ವೈರಲ್ ಆಯಿತು. ಇನ್ನೊಂದು ಕುಪ್ರಸಿದ್ಧ ವೀಡಿಯೋ ಯಾವುದೆಂದರೆ ತಬ್ಲೀಗಿ ಸದಸ್ಯರೋರ್ವರು  ಉದ್ದೇಶಪೂರ್ವಕವಾಗಿ ವ್ಯಕ್ತಿಯೊಬ್ಬರ ಮೇಲೆ ಉಗುಳುವುದು. ರೋಗ ಹರಡುವುದೇ ಈತನ ಉದ್ದೇಶ ಎಂಬುದು ಅದಕ್ಕೆ ನೀಡಲಾದ ಒಕ್ಕಣೆ. ಇದು ಕೊರೋನಾ ಜಿಹಾದ್ ಮತ್ತು ತಬ್ಲೀಗಿ ವೈರಸ್  ಎಂಬ ಹ್ಯಾಶ್‍ಟ್ಯಾಗ್‍ನೊಂದಿಗೆ ಲೆಕ್ಕವಿಲ್ಲದಷ್ಟು ಬಾರಿ ಹಂಚಿಕೆಯಾಯಿತು. ಮುಸ್ಲಿಮರು ದುಷ್ಟರು ಎಂಬುದನ್ನು ಸಾರಿ ಸಾರಿ ಹೇಳುವುದಕ್ಕೆ ಅತ್ಯಂತ ಪ್ರಶಸ್ತ ವೀಡಿಯೋವಾಗಿಯೂ ಇದು ಜ ನಪ್ರಿಯಗೊಂಡಿತು. ನಿಜವಾಗಿ,
ಆ ವ್ಯಕ್ತಿ ಭಾರತದವನೇ ಅಲ್ಲ. ಥಾೈಲೆಂಡ್‍ನವ. ಆತ ದೆಹಲಿಯ ತಬ್ಲೀಗಿ ಸಭೆಯಲ್ಲಿ ಭಾಗವಹಿಸಿದ್ದೂ ಇಲ್ಲ. ಆತನ ಹೆಸರು ಅನನ್ ಸಹೋಹ್. ರೈಲಿನಲ್ಲಿ ಪ್ರಯಾಣಿಸುತ್ತಿದ್ದ ವೇಳೆ ಆತ ಸಹ ಪ್ರಯಾಣಿಕನ  ಮೇಲೆ ಉಗುಳಿದ್ದು ನಿಜ. ಆತ ಪಾಕಿಸ್ತಾನದಿಂದ ಥಾೈಲೆಂಡ್‍ಗೆ ಹಿಂತಿರುಗುತ್ತಿದ್ದ. ಆತ ಮಧುಮೇಹಿ. ಪ್ರಯಾಣದ ಮಧ್ಯೆ ಆತ ವಾಂತಿ ಮಾಡಿದ್ದ ಮತ್ತು ಕೆಮ್ಮುತ್ತಲೂ ಇದ್ದ. ಆದ್ದರಿಂದ ಪ್ರಯಾಣವನ್ನು  ಮೊಟಕುಗೊಳಿಸಿ ರೈಲಿನಿಂದ ಇಳಿಯುವಂತೆ ಆತನ ಮೇಲೆ ಒತ್ತಡ ಹೇರಲಾಯಿತಾದರೂ ಆತ ನಿರಾಕರಿಸಿದ್ದ. ಬಳಿಕ ರೈಲಿನಲ್ಲೇ ಸಾವಿಗೀಡಾದ. ಆತನ ಗಂಟಲ ದ್ರವನ್ನು ಪರೀಕ್ಷೆ ನಡೆಸಿದ ಬಳಿಕ  ಕೊರೋನ ಇದ್ದುದು ದೃಢಗೊಂಡಿತ್ತು. ಮಾತ್ರವಲ್ಲ, ಆತನಿಂದ ಉಗುಸಿಕೊಂಡ ವ್ಯಕ್ತಿಗಾಗಿ ಥಾೈಲೆಂಡ್‍ನಲ್ಲಿ ಹುಡುಕಾಟವೂ ನಡೆದಿತ್ತು. ಸ್ವಯಂ ಬಂದು ತಪಾಸಣೆ ಮಾಡಿಕೊಳ್ಳಬೇಕೆಂದು ಆ ವ್ಯಕ್ತಿಗೆ  ಸೂಚನೆ ನೀಡಲಾಗಿತ್ತು. ಈ ಎಲ್ಲ ವಿವರಗಳನ್ನು ಎಪ್ರಿಲ್ 3 ರಂದು ಇಂಡಿಪೆಂಡೆಂಟ್ ಪತ್ರಿಕೆ Man who had Coronavirus appears to be caught on camera  spitting on a strander's face just hours before he died ಎಂಬ ಶೀಷಿರ್ಕೆಯಲ್ಲಿ ಪ್ರಕಟಿಸಿತು.
ಈ ಸತ್ಯ ಬಹಿರಂಗವಾಗುವುದಕ್ಕಿಂತ ಮೊದಲೇ ಆ ವ್ಯಕ್ತಿ ತಬ್ಲೀಗಿ ಸಭೆಯಲ್ಲಿ ಭಾಗವಹಿಸಿದವನೆಂದೂ ಉದ್ದೇಶಪೂರ್ವಕವಾಗಿ ಉಗುಳುತ್ತಿದ್ದಾನೆಂದೂ ಹೇಳುವ ಆ ವೀಡಿಯೋವು ಟ್ವಿಟರ್‍ನಲ್ಲಿ ಎಪ್ರಿಲ್ 3  ರ ವರೆಗೆ 4,200 ಬಾರಿ ಮರು ಟ್ವೀಟ್ ಆಗಿತ್ತು ಮತ್ತು 505 ಉತ್ತರಗಳು ಬಂದಿದ್ದುವು. ಇದೇ ರೀತಿಯಲ್ಲಿ ಇನ್ನೊಂದು ಸುಳ್ಳು ವೀಡಿಯೋ ಮುಸ್ಲಿಮರು ಸೀನುವುದು. ಕೊರೋನಾವನ್ನು ಹಬ್ಬಿಸುವ  ದುರುದ್ದೇಶದಿಂದ ಮುಸ್ಲಿಮನೋರ್ವನು ಸೀನುತ್ತಿದ್ದಾನೆ ಎಂಬ ವೀಡಿಯೋ ಟ್ವಿಟರ್-ಫೇಸ್‍ಬುಕ್‍ನಲ್ಲಿ ಭಾರೀ ಹಂಚಿಕೆ ಕಂಡಿತಾದರೂ ಅದು ಸುಳ್ಳು ಅನ್ನುವುದನ್ನು ಆ ಬಳಿಕ ಆಲ್ಟ್ ನ್ಯೂಸ್ ಬಹಿರಂಗ  ಪಡಿಸಿತು. ಈ ಸಂದರ್ಭ ದಲ್ಲಿ ವಾರ್ತಾಭಾರತಿ ಮತ್ತು ಪ್ರಜಾವಾಣಿಯನ್ನು ಸ್ಮರಿಸಲೇಬೇಕು. ಅದರಲ್ಲೂ ವಾರ್ತಾಭಾರತಿಯಂತೂ ಸುಳ್ಳು ಸುದ್ದಿಗಳ ಬೆನ್ನು ಹತ್ತಿ ಸತ್ಯವನ್ನು ತಿಳಿಸುವುದನ್ನು ಒಂದು  ಅಭಿಯಾನವಾಗಿ ಸ್ವೀಕರಿಸಿತು.
ವಿಷಾದ ಏನೆಂದರೆ, ಸಾಮಾಜಿಕ ಮಾಧ್ಯಮ ಮತ್ತು ಖಾಸಗಿ ಟಿವಿ ಚಾನೆಲ್‍ಗಳು ದಿಕ್ಕು-ದಿಸೆಯಿಲ್ಲದೇ ತಬ್ಲೀಗಿಗಳನ್ನು ಮತ್ತು ಅವರ ಬೆನ್ನ ಹಿಂದೆ ನಿಂತು ಇಡೀ ಮುಸ್ಲಿಮ್ ಸಮುದಾಯವನ್ನು ವೈರಸ್  ವಾಹಕರು ಎಂದು ನಿಂದಿಸುತ್ತಿರುವುದರ ಹೊರತಾಗಿಯೂ ದೇಶವನ್ನು ಮತ್ತು ದೇಶದ ಪ್ರಜೆಗಳ ಹಿತವನ್ನೂ ಕಾಯಬೇಕಾದ ಪ್ರಧಾನಿಯವರು ಈ ಬಗ್ಗೆ ಮಾತಾಡಲು ಎಪ್ರಿಲ್ 19ರ ವರೆಗೆ ಕಾದರು  ಎಂಬುದಾಗಿದೆ. ಇದಕ್ಕೂ ಮೊದಲು ಅವರು ಮಾತಾಡಲೇ ಬೇಕಾದ ಸನ್ನಿವೇಶವನ್ನು ಅವರ ಪಕ್ಷದ ಮುಖಂಡರೇ ಸೃಷ್ಟಿಸಿ ದ್ದಾಗ್ಯೂ ಅವರು ಮೌನವಹಿಸಿದರು. ಬಿಜೆಪಿಯ ಐಟಿ ಸೆಲ್‍ನ ಮುಖ್ಯಸ್ಥ  ಅಮಿತ್ ಮಾಳವೀಯ ಅವರು ಎಪ್ರಿಲ್ 1 ರಂದು ಹೀಗೆ ಟ್ವೀಟ್ ಮಾಡಿದರು:

Delhis derk underbelly is exploding! Last 3 months have seen an islamic insurrection of sorts, first in the name of anti-  CAA protests from shaheen bagh to jamia, jaffrabad to seelampur. and now the illegal gathering of radical tablighi  jamaat at the markaz. it needs of fix. 

ಹಿಮಾಚಲ ಪ್ರದೇಶದ ಬಿಜೆಪಿ ಮುಖಂಡ ರಾಜೀವ್ ಬಿಂದಾಲ್ ಅವರು ಎಪ್ರಿಲ್ 4 ರಂದು ಹೀಗೆ ಹೇಳಿದರು:
ಕೊರೋನಾವನ್ನು ಮಟ್ಟ ಹಾಕುವುದಕ್ಕಾಗಿ ಕೇಂದ್ರ ಮತ್ತು ರಾಜ್ಯ ಸರಕಾರಗಳು ಶತ ಪ್ರಯತ್ನ ನಡೆಸುತ್ತಿವೆ. ಆದರೆ, ತಬ್ಲೀಗಿ ಸದಸ್ಯರು ಮಾನವ ಬಾಂಬ್‍ನಂತೆ ತಿರುಗಾಡುತ್ತಿದ್ದಾರೆ.
ಬಿಜೆಪಿ ಸಂಸದೆ ಶೋಭಾ ಕರಂದ್ಲಾಜೆಯವರು ಎಪ್ರಿಲ್ 6 ರಂದು ಹೀಗೆ ಬರೆದರು:
ಬೆಳಗಾವಿಯ ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆಂದು ಸೇರಿಸಲಾಗಿರುವ ತಬ್ಲೀಗಿ ಸದಸ್ಯರು ಆಸ್ಪತ್ರೆ ಸಿಬ್ಬಂದಿಯ ಮೇಲೆ ಉಗುಳುತ್ತಿದ್ದಾರೆ, ಅನುಚಿತವಾಗಿ ವರ್ತಿಸುತ್ತಿದ್ದಾರೆ.
ಆದರೆ, ಸಂಸದೆಯ ಹೇಳಿಕೆಯನ್ನು ಆಸ್ಪತ್ರೆ ಸಿಬ್ಬಂದಿಗಳು ಮತ್ತು ಬೆಳಗಾವಿ ಜಿಲ್ಲಾಧಿಕಾರಿಗಳೇ ನಿರಾಕರಿಸಿದರು. ಆದರೆ, ಸಂಸದೆಯ ಸುಳ್ಳು ಹೇಳಿಕೆಗಾಗಿ ಅವರ ಮೇಲೆ ಯಾವ ಕ್ರಮವನ್ನೂ  ಜರುಗಿಸಲಾಗಿಲ್ಲ.
ಮಹಾರಾಷ್ಟ್ರದ ಮಾಜಿ ಮುಖ್ಯಮಂತ್ರಿ ದೇವೆಂದ್ರ ಫಡ್ನವಿಸ್ ಅವರು ಎಪ್ರಿಲ್ 9 ರಂದು ತಬ್ಲೀಗಿ ಸದಸ್ಯರನ್ನು ಮಾನವ ಬಾಂಬ್ ಎಂದು ಕರೆದರು.
ಈ ಎಲ್ಲ ಟ್ವೀಟ್‍ಗಳೂ ಖಾಸಗಿ ಟಿವಿ ಚಾನೆಲ್‍ಗಳು ಮತ್ತು ಪತ್ರಿಕೆಗಳಿಗೆ ಮುಸ್ಲಿಮರ ಮೇಲೆ ಏರಿ ಹೋಗಲು ಬಹುದೊಡ್ಡ ಧೈರ್ಯ ಒದಗಿಸಿದುವು. ಅವು ಸುದ್ದಿಗಳು ಮತ್ತು ವೀಡಿಯೋಗಳ ಸಾಚಾತ ನವನ್ನು ಪರಿಶೀಲಿಸುವ ಗೋಜಿಗೇ ಹೋಗದೇ ಇನ್ನಷ್ಟು ಮಸಾಲೆಯನ್ನು ಈ ಸುದ್ದಿಗಳಿಗೆ ಲೇಪಿಸಿ 24 ಗಂಟೆ ಪ್ರಸಾರ-ಪ್ರಚಾರ ಮಾಡಿದುವು. ಜನವರಿ ಮತ್ತು ಮಾರ್ಚ್‍ನ ಮಧ್ಯೆ 1.5 ಮಿಲಿಯನ್ ಜ ನರು ಯಾವುದೇ ಪರೀಕ್ಷೆ ಇಲ್ಲದೇ ಮತ್ತು ಸ್ಕ್ರೀನಿಂಗ್ ಇಲ್ಲದೇ ದೇಶ ಪ್ರವೇಶಿಸಿದ್ದಾರೆ ಎಂಬುದು ಗೌಣವಾಯಿತು. ಲಾಕ್‍ಡೌನ್ ಘೋಷಣೆಯಾದ ಬಳಿಕ ಈ ದೇಶದಲ್ಲಿ ನಡೆದ ಮದುವೆ, ಸೀಮಂತ,  ಅಂತ್ಯಸಂಸ್ಕಾರ, ಜಾತ್ರೆ, ರಥೋತ್ಸವ, ಧಾರ್ಮಿಕ ಕಾರ್ಯಕ್ರಮ, ಔತಣ ಇತ್ಯಾದಿ ಇತ್ಯಾದಿಗಳನ್ನೆಲ್ಲ ತಬ್ಲೀಗನ್ನು ಮುಂದಿಟ್ಟುಕೊಂಡು ಮರೆಸಲಾಯಿತಲ್ಲದೇ ಮುಸ್ಲಿಮರನ್ನೇ ಗುರಿ ಮಾಡಿ ಸುಳ್ಳು ಸುದ್ದಿಗಳನ್ನೇ  ಮತ್ತೆ ಮತ್ತೆ ಪ್ರಸಾರ ಮಾಡುವ ಪ್ರಯತ್ನವನ್ನು ಎಗ್ಗಿಲ್ಲದೇ ನಡೆಸಲಾಯಿತು. ಈ ನಡುವೆ ಪ್ರಧಾನಿಯವರು ಎಪ್ರಿಲ್ 9 ರಂದು ವೀಡಿಯೋ ಕಾನ್ಫ ರೆನ್ಸ್ ಮೂಲಕ ಸಂಸದರನ್ನುದ್ದೇಶಿಸಿ ಮಾತಾಡಿದರು.  ಸಾಮಾಜಿಕ ತುರ್ತುಸ್ಥಿತಿಯ ಕುರಿತಂತೆ ವಿಚಾರ ವಿನಿಮಯ ನಡೆಸಿದರು. ಇದು ಎಂಥ ಸಂದರ್ಭವಾಗಿತ್ತೆಂದರೆ ಮಾಧ್ಯಮಗಳು ಮತ್ತು ಬಿಜೆಪಿ ಸಂಸದರು ಮುಸ್ಲಿಮರ ವಿರುದ್ಧ ತಾರಕ ಧನಿಯಲ್ಲಿ  ಮಾತಾಡುತ್ತಿದ್ದರು. ಆದರೂ ಪ್ರಧಾನಿಯವರು ಈ ವೀಡಿಯೋ ಕಾನ್ಫರೆನ್ಸ್ ವೇಳೆ ಈ ಬಗ್ಗೆ ಒಂದೇ ಒಂದು ಪದವನ್ನೂ ಉಚ್ಚರಿ ಸಲಿಲ್ಲ. ಈ ನಡುವೆ ದೇಶವನ್ನುದ್ದೇಶಿಸಿ ಅವರು ಎರಡೆರಡು ಬಾರಿ  ಮಾತಾಡಿದರಾದರೂ ಮುಸ್ಲಿಮರನ್ನು ಗುರಿ ಮಾಡಬೇಡಿ ಎಂಬ ಏಕ ವಾಕ್ಯವನ್ನು ಉಚ್ಚರಿಸಲೂ ಅವರು ಹಿಂಜರಿದರು.
ಈ ನಡುವೆ ಒಂದು ಅಭೂತಪೂರ್ವ ಬೆಳವಣಿಗೆ ನಡೆಯಿತು.
ಬಿಜೆಪಿ ಹಾಲಿ ಸಂಸದ ತೇಜಸ್ವಿ ಸೂರ್ಯ ಅವರು ಅರಬ್ ಮಹಿಳೆಯರನ್ನು ಹೀನಾಯವಾಗಿ ನಿಂದಿಸಿ 2015ರಲ್ಲಿ ಮಾಡಿದ್ದ ಟ್ವೀಟ್‍ನ ಸ್ಕ್ರೀನ್‍ಶಾಟನ್ನು ಕುವೈಟಿನ ಅಬ್ದುಲ್ ರಹ್ಮಾನ್ ನಾಸರ್ ಎನ್ನುವ  ಸಾಮಾಜಿಕ ಕಾರ್ಯಕರ್ತ ಟ್ವೀಟರ್‍ನಲ್ಲಿ ಪುನಃ ಹಂಚಿಕೊಂಡರು. ಪ್ರಧಾನಿ ನರೇಂದ್ರ ಮೋದಿ ಅವರ ವೈಯಕ್ತಿಕ ಟ್ವಿಟರ್ ಖಾತೆಗೂ ಮತ್ತು ಅವರ ಕಾರ್ಯಾಲಯದ ಖಾತೆಗೂ ಅದನ್ನು ಟ್ಯಾಗ್ ಮಾಡಿದರು.  ಅಷ್ಟೇ ಅಲ್ಲ, ಸರಣಿ ಟ್ವೀಟ್‍ಗಳನ್ನು ಮಾಡಿ ಪ್ರಧಾನಿ ಮತ್ತು ಅವರ ಮುಸ್ಲಿಮ್ ಧೋರಣೆಯನ್ನು ಪ್ರಶ್ನಿಸಿದರು. `ಪ್ರತಿ ವರ್ಷ 120 ಬಿಲಿಯನ್ ಡಾಲರ್ ಮೊತ್ತವನ್ನು 53 ಅರಬ್ ಮುಸ್ಲಿಮ್ ರಾಷ್ಟ್ರಗಳಿಂದ  ಅನಿವಾಸಿ ಭಾರತೀಯರು ತವರಿಗೆ ಕಳುಹಿಸುತ್ತಿದ್ದಾರೆ. ಇವರಲ್ಲಿ ಹೆಚ್ಚಿನ ಉದ್ಯೋಗಿಗಳೂ ಹಿಂದುಗಳೇ. ಅವರನ್ನು ನಾವು ಅತ್ಯುತ್ತಮ ರೀತಿಯಲ್ಲಿ ನೋಡಿಕೊಳ್ಳುತ್ತಿದ್ದೇವೆ. ನೀವೇಕೆ ಹೀಗೆ’ ಎಂದು ಪ್ರಧಾ ನಿಯನ್ನು ಮತ್ತು ಅವರ ಬೆಂಬಲಿಗರನ್ನು ಪ್ರಶ್ನಿಸಿದರು. ಇದು ಇಡೀ ಅರಬ್ ವಲಯದಲ್ಲೇ ಕಿಡಿ ಹೊತ್ತಿಸಿತು. ಶಾರ್ಜಾ ರಾಜ ಕುಟುಂಬದ ರಾಜಕುಮಾರಿ ಹಿಂದ್ ಅಲ್ ಖಾಸ್ಮಿಯು ಎಪ್ರಿಲ್ 16 ರಂದು  ಟ್ವೀಟ್ ಮಾಡಿ, ಮುಸ್ಲಿಮ್ ವಿರೋಧಿ ಟ್ವೀಟ್‍ಗಳ ಬಗ್ಗೆ ಎಚ್ಚರಿಕೆ ನೀಡಿದರು. ಕುವೈಟ್ ಮತ್ತು ಯುಎಇಗಳು ಭಾರತೀಯ ಮುಸ್ಲಿಮರ ಪರಿಸ್ಥಿತಿ ಮತ್ತು ದ್ವೇಷ ಪ್ರಚಾರಗಳ ಕುರಿತಂತೆ ಮೊದಲ ಬಾರಿ  ಗಂಭೀರವಾಗಿ ಅವಲೋಕನಕ್ಕೆ ಇಳಿಯಿತು. ಅರಬ್ ಪಾರ್ಲಿಮೆಂಟ್ ಕಾರ್ಯದರ್ಶಿ ಮತ್ತು ಜಾಗತಿಕ ಸಂಸದೀಯ ಸಂಪರ್ಕ ಕಾರ್ಯದರ್ಶಿ ಜಮಾಲ್ ಬಹ್ರೈನ್ ಅವರು ಭಾರತದಲ್ಲಿ ಮುಸ್ಲಿಮರ ವಿರುದ್ಧ  ನಡೆಸಲಾಗುತ್ತಿರುವ ಅಪಪ್ರಚಾರ ಮತ್ತು ಹಿಂಸೆಯ ಕುರಿತಂತೆ ವಿಶ್ವಸಂಸ್ಥೆ ಮತ್ತು ಓಐಸಿ(ಇಸ್ಲಾಮಿಕ್ ರಾಷ್ಟ್ರಗಳ ಒಕ್ಕೂಟ)ಗೆ ದೂರು ಕೊಟ್ಟರು. ಇದಾದ ಬಳಿಕ ಎಪ್ರಿಲ್ 19 ರಂದು ಓಐಸಿಯೇ  ರಂಗಕ್ಕಿಳಿಯಿತು. ಮುಸ್ಲಿಮರ ಹಿತ ರಕ್ಷಣೆಗೆ ಕ್ರಮಕೈಗೊಳ್ಳಿ ಎಂದು ನೇರವಾಗಿಯೇ ಪ್ರಧಾನಿ ಮೋದಿಯವರನ್ನು ಅದು ಅಗ್ರಹಿಸಿತು. ಈ ಬೆಳವಣಿಗೆಯ ಒಂದು ಗಂಟೆಯ ನಂತರ ಪ್ರಧಾನಿಯವರು  ಎಪ್ರಿಲ್ 19 ರಂದು ಅತ್ಯಂತ ಸುಂದರ ಟ್ವೀಟ್ ಮಾಡಿದರು:
"ಯಾವುದೇ ಜನಾಂಗ, ಧರ್ಮ, ಬಣ್ಣ, ಜಾತಿ, ಭಾಷೆ, ಗಡಿಗಳನ್ನು ನೋಡಿ ಕೋವಿಡ್- 19 ದಾಳಿ ಮಾಡುವುದಿಲ್ಲ. ನಾವು ಒಟ್ಟಾಗಿ ಮತ್ತು ಸಹೋದರತ್ವದ ಮೂಲಕ ಈ ವೈರಸನ್ನು ಎದುರಿಸಬೇಕು. ಈ  ವಿಷಯದಲ್ಲಿ ನಾವೆಲ್ಲರೂ ಜೊತೆಯಾಗಿ ಹೋರಾಡಬೇಕು" ಎಂದವರು ಕರೆಕೊಟ್ಟರು.
ಒಂದುವೇಳೆ, ಕೊರೋನಾ ಜಿಹಾದ್, ತಬ್ಲೀಗಿ ವೈರಸ್, ತಬ್ಲೀಗಿ ಟೆರರಿಸಂ, ತಬ್ಲೀಗಿ ನಂಜು, ಮದ್ರಸ ಹಾಟ್‍ಸ್ಪಾಟ್ ಇತ್ಯಾದಿ ಇತ್ಯಾದಿ ಹ್ಯಾಶ್‍ಟ್ಯಾಗ್‍ಗಳೊಂದಿಗೆ ಸಾಮಾಜಿಕ ಮಾಧ್ಯಮಗಳು ಮತ್ತು  ಖಾಸಗಿ ಟಿವಿ ಚಾನೆಲ್‍ಗಳು ಎಪ್ರಿಲ್ ಒಂದರಿಂದ ಪುಂಖಾನುಪುಂಖವಾಗಿ ಜನಾಂಗ ದ್ವೇಷಿ ಸುದ್ದಿಗಳನ್ನು ಹರಡಲು ಪ್ರಾರಂಭಿಸಿದ ಹೊತ್ತಲೇ ಇದೇ ಸಂದೇಶವನ್ನು ಪ್ರಧಾನಿಯವರು ನೀಡಿರುತ್ತಿದ್ದರೆ ಏ ನಾಗುತ್ತಿತ್ತು? ಅಪ್ಪಟ ಸುಳ್ಳು ವೀಡಿಯೋಗಳನ್ನು ಹಂಚುತ್ತಿರುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಿ ಎಂದು ಎಲ್ಲ ರಾಜ್ಯಗಳಿಗೂ ಆದೇಶ ನೀಡಿರುತ್ತಿದ್ದರೆ ದೇಶದ ಪರಿಸ್ಥಿತಿ ಈಗ ಹೇಗಿರುತ್ತಿತ್ತು?
ಬಾಯಿ ಬಡುಕ ಸಂಸದರ ಪೈಕಿ ಒಬ್ಬರಿಗಾದರೂ ಶೋಕಾಸ್ ನೋಟೀಸ್ ಜಾರಿ ಮಾಡಿರುತ್ತಿದ್ದರೆ ದೇಶದಲ್ಲಿ ಏನೆಲ್ಲ ಬದಲಾವಣೆಗಳಾಗುತ್ತಿತ್ತು? ಸುಳ್ಳು ಸುದ್ದಿ ಹರಡುವವರನ್ನು ಮತ್ತು ದ್ವೇಷ ಪ್ರಚಾರ  ನಡೆಸುವವರನ್ನು ಜೈಲಿಗಟ್ಟಿ ಎಂದು ಆದೇಶಿಸಿರುತ್ತಿದ್ದರೆ ನಮ್ಮ ವಾಟ್ಸ್‍ಪ್‍ಗಳು ಹೇಗಿರುತ್ತಿತ್ತು? ಯಾಕೆ ನನ್ನ ಪ್ರಧಾನಿ ಇವವುದನ್ನೂ ಮಾಡದೇ ಉಳಿದರು? ಅತಿ ಹೀನಾಯ ದ್ವೇಷ ಪ್ರಚಾರಗಳನ್ನು ಯಾಕೆ  ಅವರು ಸಹಿಸಿಕೊಂಡರು? ಅವರೇ ಕಾವಲು ನಿಂತು ಸಂರಕ್ಷಿಸಬೇಕಾದ ಜನರ ಮೇಲೆ ದಾಳಿಗೆ ಯಾಕೆ ಅವಕಾಶ ಮಾಡಿಕೊಟ್ಟರು? ಅವರ ಒಂದೇ ಒಂದು ಕಟು ಎಚ್ಚರಿಕೆಯು ಟಿವಿ ಚಾನೆಲ್‍ಗಳ  ಬೊಂಬಡವನ್ನು ತಡೆಯಲು ಸಾಕಾಗುತ್ತಿರಲಿಲ್ಲವೇ? ಅಂದಹಾಗೆ,
ಬ್ಯಾರಿಗಳು ಕೊರೋನಾ ಹರಡುತ್ತಿದ್ದಾರೆ ಎಂದು ಆ ಮನೆಗೆಲಸದ ಮಹಿಳೆ ಹೇಳಿದರಲ್ಲ, ಅದರಲ್ಲಿ ಆಕೆಯ ತಪ್ಪಿಲ್ಲ. ಆಕೆ ಆಡಿದ್ದು ಆಕೆಯ ಮಾತೂ ಅಲ್ಲ.